តាមរបាយការណ៍ចុងក្រោយបានឲ្យដឹងថា ក្នុងអាជីពជាអ្នកប្រដាល់របស់ Floyd Mayweather បើគិតមកទល់ពាក់កណ្ដាលឆ្នាំ ២០២១ នេះ លោកអាចរកបានជាង ១,២ ពាន់លានដុល្លារអាមេរិក។
ប្រាក់ខ្ទង់រយលានដុល្លារសម្រាប់ Floyd កាលពីប៉ុន្មានឆ្នាំមុន ហាក់មិនជាបញ្ហាធំឡើយសម្រាប់លោក ដោយត្រឹមតែប្រកួតធំ ២ លោករកបានជាងកន្លះពាន់លានដុល្លារទៅហើយ ពោលកាលប៉ះ Manny Pacquiao នៅឆ្នាំ ២០១៥ បាន ២៥០ លានដុល្លារ និងប៉ះ Conor McGregor នៅឆ្នាំ ២០១៧ បាន ៣០០ លានដុល្លារ។ រីឯប្រកួតចុងក្រោយវ៉ៃទល់ក្មេងដៃថ្មីដែលជា YouTuber គឺ Logan Paul សម្រាប់ Floyd លេចមុខលើសង្វៀនតែប៉ុន្មាននាទី លឺថារកបានជាង ២០ លានដុល្លារឯណោះ។
ទន្ទឹមនឹងការរកបានចំណូលដ៏ច្រើនសន្ធឹកនេះ តើអ្នកដឹងទេថា បុរសសញ្ជាតិអាមេរិកចាយវាយលើរបស់របររស់នៅប្រចាំថ្ងៃបែបណាខ្លះ? ក្នុងអត្ថបទនេះ CTS Sports ជីកកកាយលើកមកបង្ហាញ នៅរបស់ថ្លៃបំផុតទាំង ៥ ដែល Floyd បានចាយវាយទាំងមិនញញើតដៃ៖
៥) រថយន្តលំដាប់អភិជន
មិនមានទិន្នន័យច្បាស់នោះទេ ថា Floyd មានរថយន្តប៉ុន្មានគ្រឿងក្នុងដៃនៅពេលបច្ចុប្បន្ន? ប៉ុន្តែបើផ្អែកតាមបណ្ដុំរថយន្តលោកបានចំណាយហើយសារព័ត៌មានព័ត៌មានធ្លាប់ចុះផ្សាយ គឺមិនក្រោម ៧ គ្រឿងឡើយ ដោយមានគ្រប់សេរ៊ីខ្ពស់ៗនៃយីហោ Bugatti, Lamborghini, Ferrari, Porsche និង Koenigsegg ជាដើម។
សរុបទៅអាចចូលដល់ជាង ១០ លានដុល្លារ ព្រោះត្រឹមតែមួយគ្រឿងដែលមានតម្លៃថ្លៃបំផុតគឺម៉ាក Koenigsegg CCXR Trevita មានតម្លៃដល់ជាង ៤,៧ លានដុល្លារទៅហើយ។
៤) គ្រឿងអលង្ការ
របស់លំអខ្លួនភ្លឺចិញ្ចាចតាំងពីក្បាលដល់ចុងជើង Floyd ធ្លាប់ចាយវាយអស់រាប់លានដុល្លារ។ របាយការណ៍កាលពីប៉ុន្មានឆ្នាំមុន ដែល TMZ បានចុះផ្សាយ ត្រឹមតែការដើរ Shopping ទៅទិញគ្រឿងអលង្ការពីហាង Peter Marco នៅឯរដ្ឋ California អ្នកប្រដាល់វ័យ ៤៤ ឆ្នាំ ចាយអស់ ៥,៣ លានដុល្លារត្រឹមមួយពព្រិចភ្នែក។
ក្នុងនោះមានដូចជាចិញ្ចៀនពេជ្រ VVS តម្លៃ ២,៣ លានដុល្លារ ខ្សែដៃពេជ្រតម្លៃ ២,៥ លានដុល្លារ និងខ្សែកមាស Cuban ទម្ងន់ជិត ១ គីឡូក្រាមតម្លៃ ៥០ មុឺនដុល្លារ។
៣) នាឡិកាតម្លៃកប់ពពក
អាចនិយាយបានថា Floyd ជាអត្តពលិកដែលហ៊ានចំណាយលើតម្លៃនាឡិកាខ្ពស់ជាងគេបង្អស់ក្នុងលោក ដែលមួយគ្រឿងដែលលោកប្រើប្រាស់មានតម្លៃដល់ទៅ ១៨ លានដុល្លារ។
នាឡិកាលំដាប់មហាសេដ្ឋីមួយគ្រឿងនេះ ផលិតដោយក្រុមហ៊ុន Jacob&Co, ដោយមានដាំពេជ្រចំនួន ២៨០ ការ៉ាត់ កើតចេញពីសមាសធាតុបង្គំ ១៦៧ ផ្សេងពីគ្នា ដែលវាមានតែមួយគត់ក្នុងលោក។
២) ភូមិគ្រឹះនៅទីក្រុង Los Angeles
ដ្បិតវាមិនមានតម្លៃឈរនៅលំដាប់កំពូល បើធៀបនឹងភូមិគ្រឹះតម្លៃរយលានឯទៀតក្នុងទីក្រុង Los Angeles តែតម្លៃ ២៥ លានដុល្លារសម្រាប់អត្តពលិក គឺរាប់បាន ជាតម្លៃកប់ពពកមួយហើយ។
នៅខាងក្នុងភូមិគ្រឹះរបស់ Floyd ក៏មានបំពាក់នូវរបស់របរដ៏ប្រណីតជាច្រើន ហើយក៏មានចុងភៅឯកជនលំដាប់ផ្កាយ ស៊ីថ្លៃរាប់សិបមុឺនដុល្លារក្នុងមួយខែៗ ដើម្បីតែចម្អិនម្ហូបអាហារឈ្ងុយឆ្ងាញ់ជូនដល់អ្នកប្រដាល់មិនដែលចាញ់រូបនេះ។
១) យន្តហោះឯកជន
យន្តហោះ Gulfstream G650 ដែលត្រូវបាន Floyd ដាក់ឈ្មោះឲ្យថា “Air Mayweather” ជាយន្តហោះដ៏ប្រណីតមួយដែលមានតម្លៃដល់ទៅ ៦០ លានដុល្លារឯណោះ។ យន្តហោះនេះ Floyd ធ្លាប់ជិះទៅមកច្រើនសារមកហើយ ដោយវាមានចំណុះអាចផ្ទុកអ្នកដំណើរ ១៥ នាក់។
រឿងរ៉ាវគួរឲ្យចាប់អារម្មណ៍ ២ ជាមួយយន្តហោះនេះ គឺនៅផ្នែកស្លាបមានឆ្លាក់លេខ ៥០-០ ដែលតំណាងឲ្យស្ថិតិប្រកួតមិនដែលចាញ់របស់លោក ហើយនៅលើកម្រាលជើងដែលលោកត្រូវជាន់ពេលចុះពីលើយន្តហោះម្តងៗ មានពាក្យថា “TBE” តំណាងឲ្យពាក្យពេញ “The Best Ever” ដែលមានន័យថា ជាអ្នកប្រដាល់ល្អបំផុតគ្រប់ពេលវេលា៕