ក្រោយឆ្លងកាត់ការប្រកួត ២ ជុំ ពូល F ដែលជាពូលមរណៈប្រចាំវគ្គចែកពូល Euro 2020 មិនទាន់សម្រេចរកឃើញក្រុមណាមួយដែលអាចធានាសុវត្ថិភាព ១០០ ភាគរយ ក្នុងការឆ្ពោះទៅកាន់វគ្គបន្ទាប់នោះទេ។ លទ្ធផលដ៏ភ្ញាក់ផ្អើលបានកើតឡើង ដោយបារាំងជាក្រុមឈ្នះជើងឯក World Cup 2018 បែរជាមិនអាចយក ៣ ពិន្ទុពីក្រុមហុងគ្រី ហើយបានត្រឹមស្មើ ១-១ ខណៈដែលជំនួបអាល្លឺម៉ង់ ទល់ព័រទុយហ្គាល់ បានកើតឡើងគ្រាប់បាល់ដល់ទៅ ៦ គ្រាប់ ក្រោមលទ្ធផល ៤-២។
ដ្បិតបើបារាំងពេលនេះមាន ៤ ពិន្ទុឈរនៅលេខ ១ ក្នុងពូល តែមិនទាន់អាចធានានោះទេ ថាអាចឡើងទៅកាន់វគ្គបន្ទាប់ ១៦ ក្រុម ដោយវាជាការសោកស្ដាយបំផុតមួយ ព្រោះបើអាចយកឈ្នះហុងគ្រីនៅជុំទី ២ នោះក្រុមមាន់គក ពេលនេះស្រួលចិត្តអស់កង្វល់បាត់ទៅហើយ។
បញ្ជាក់ថានេះជាការប៉ះគ្នាលើកទី ៥ រវាងហុងគ្រីនិងបារាំង ហើយស្ថិតិសរុបជារួម គឺហុងគ្រី ឈ្នះ ៣ ស្មើ ២ មិនទាន់ស្គាល់ពាក្យថា “ចាញ់”។ យើងរំឭកការប៉ះគ្នាទាំង ៥ លើកដូចខាងក្រោម៖
- ខែមេសា ឆ្នាំ ១៩៦៤ ហុងគ្រី យកឈ្នះ បារាំង ៣-១
- ខែឧសភា ឆ្នាំ ១៩៦៤ ហុងគ្រី យកឈ្នះ បារាំង ២-១
- ខែមេសា ឆ្នាំ ១៩៧១ ហុងគ្រី ស្មើ បារាំង ១-១
- ខែតុលា ឆ្នាំ ១៩៧១ ហុងគ្រី យកឈ្នះ បារាំង ២-០
- ខែមិថុនា ឆ្នាំ ២០២១ ហុងគ្រី ស្មើ បារាំង ១-១
ពាក់ព័ន្ធនឹងលទ្ធផលសារនេះដែរ មតិខ្លះយល់ឃើញថា មកពីវាជាប្រវត្តិសាស្ត្រដែលមិនអាចកែប្រែបាន ដែលបារាំងមិនធ្លាប់លេងឈ្នះហុងគ្រីតាំងពីដំបូងមកហើយ តែសម្រាប់ Antoine Griezmann មិនយល់ឃើញដូច្នោះទេ ផ្ទុយទៅវិញថាមកពី សំឡេងហ៊ោកញ្ជ្រៀវរបស់អ្នកគាំទ្រហុងគ្រីនៅឯកីឡដ្ឋានទៅវិញ។
ប្រាប់ beIN Sports ក្រោយចប់ការប្រកួត កីឡាកររកបានគ្រាប់បាល់តាមស្មើឲ្យបារាំង និយាយថា៖ “យើងមិនទាន់អាចសម្របបាននឹងការលេងលើទីលាន ជាមួយបរិយាកាសបែបនេះនៅឡើយទេ ដោយកន្លងមកវាបានធ្វើឲ្យយើងក្លាយទៅជាទម្លាប់ ក្នុងការលេងដោយមានភាពស្ងប់ស្ងាត់នៅកីឡដ្ឋាន យើងក៏បានដឹងមុនហើយដែរថានេះនឹងក្លាយជាប្រកួតដ៏ស្មុគស្មាញមួយ”។
ជាការពិតកីឡដ្ឋាន Puskas Arena ក្នុងទីក្រុង Budapest ប្រទេសហុងគ្រី គឺជាកីឡដ្ឋានតែមួយគត់ប្រចាំព្រឹត្តិការណ៍ Euro 2020 ដែលអនុញ្ញាតឲ្យមានអ្នកចូលទស្សនាពេញ ១០០ ភាគរយ ហើយនៅជំនួបជុំទី ២ រវាងហុងគ្រី-បារាំង មានអ្នកគាំទ្រដល់ទៅ ៦១ ០០០ នាក់ ដែលភាគច្រើនសុទ្ធតែអ្នកគាំទ្ររបស់ហុងគ្រី ហើយអ្នកគាំទ្របារាំងមានតែមួយផ្នែកតូចប៉ុណ្ណោះក្នុងកីឡដ្ឋាន។
សំឡេងកងរំពងពីការស្រែកហ៊ោកញ្ជ្រៀវ និងបន្ទុះនៃស្គរ បានពន្លឺឡើងតាំងពីនាទីទី ១ ដល់នាទីទី ៩០ ហើយវាជាបរិយាកាសមួយដែលកីឡាករខកខានជួបប្រទះរយៈពេលជាង ១ ឆ្នាំកន្លះមកហើយ ពោលចាប់តាំងពីខែមិនា ឆ្នាំ ២០២០ ក្រោយបាល់ទាត់ផ្អាកឲ្យលែងមានអ្នកចូលទស្សនាដោយសារជំងឺរាតត្បាត COVID-19។
ជាមួយនឹងអំណោយផលនៃប្រជាជនដែលបានចាក់វ៉ាក់សាំងមានជាង ៧០ ភាគរយនៃផ្ទៃប្រទេស និងច្បាប់មិនសូវតឹងរ៉ឹងរបស់ហុងគ្រី ក៏នាំឲ្យ UEFA កំពុងធ្វើការពិភាក្សាគ្រោងផ្លាស់ប្ដូរពីការលេងវគ្គផ្ដាច់ព្រ័ត្រ Euro 2020 ពីកីឡដ្ឋាន Wembley នៅចក្រភពអង់គ្លេស មកកីឡដ្ឋាន Puskas Arena ក្នុងទឹកដីហុងគ្រីនេះវិញ តែយ៉ាងណាបច្ចុប្បន្នកំពុងស្ថិតក្នុងការជជែករកដំណោះស្រាយជាមួយភាគីខាងរដ្ឋាភិបាលអង់គ្លេស។
អ៊ីចឹងយើងនឹងរង់ចាំមើលទាំងអស់គ្នា ថាតើអាល្លឺម៉ង់ នឹងអាចយកបាន ៣ ពិន្ទុពីហុងគ្រីឬអត់នៅជុំចុងក្រោយ តែសារនេះលេងនៅកីឡដ្ឋាន Allianz Arena នៅឯអាល្លឺម៉ង់ ស្របពេលដែលព័រទុយហ្គាល់ពួកគេធ្លាប់ស៊ីហុងគ្រីដល់ក្នុងដី ៣-០ យ៉ាងធូរ គ្មានរអ៊ូមួយម៉ាត់ តែស្ដាយបែរជាមកទក់សាច់របស់អាល្លឺម៉ង់នៅជុំទី ២ នេះ៕
ប្រភព៖ Independent