តើ​អត្តពលិក​រូប​ណា​ជា​បុគ្គល​មាន​ឥទ្ធិពល​បំផុត​នៅ​លើ​បណ្ដាញ​សង្គម ដែល​អ្នក​ធ្លាប់​បាន​ស្គាល់? ជា​ការ​ពិត​បើ​និយាយ​ក្នុង​វិស័យ​កីឡា​បាល់ទាត់ ជឿ​ថា​អ្នក​គាំទ្រ​ភាគ​ច្រើន​ប្រាកដ​ជា​មិន​រំលង​ឈ្មោះ​ Cristiano Ronaldo, Lionel Messi និង Neymar Jr នោះ​ទេ។

យ៉ាង​ណា​តាម​រយៈ​ការ​ប្រែប្រួល​នៅ​តួ​លេខ​ថ្មី​លើ​បណ្តាញ​សង្គម Instagram នា​ពេល​ចុង​ក្រោយ​នេះ យើង​ឃើញ​ថា​តារា​ឆ្នើម​សញ្ជាតិ​ប្រេស៊ីល Neymar បាន​បាត់​ឈ្មោះ​ចេញ​ពី​បញ្ជី Top 10 ហើយ ពោល​បើ​រាប់​ជា​រួម​សម្រាប់​បុគ្គល​ទាំង​អស់​ក្នុង​លោក គេ​បាន​ធ្លាក់​មក​ឈរ​នៅ​លេខ​រៀង​ទី ១៦ ។

នេះ​ជា​ការ​ធ្លាក់​ចុះ​យ៉ាង​គំហុក ដែល​កាល​ពី​ខែ​មករា ឆ្នាំ ២០២០ Neymar នៅ​ឈរ​លេខ ១០ មិន​ទាន់​មាន​អ្នក​មក​ប្រជែង​បាន​ឡើយ តែ​ប្រហែល​ជា​ប្រជាប្រិយភាព​មាន​ការ​ធ្លាក់​ចុះ ទើប​នាំ​ឲ្យ​ការ​កើន​ឡើង​ចំនួន Follower ក៏​មាន​ការ​ថមថយ​ដែរ​នោះ។ គិត​ត្រឹម​ពាក់​កណ្ដាល​ខែ​មិថុនា យើង​បង្ហាញ​បុគ្គល ១០ រូប​ដែល​មាន Follower ច្រើន​ដាច់​គេ​ក្នុង​លោក៖

១០) តារា​ម៉ូដែល Kendall Jenner ជនជាតិ​អាមេរិក មាន Follower ១៧០ លាន​នាក់
៩) តន្ត្រីករ Justin Bieber ជនជាតិ​កាណាដា មាន Follower ១៧៨ លាន​នាក់
៨) តន្ត្រីករ Beyonce ​ជនជាតិ​អាមេរិក មាន Follower ១៨៦ លាន​នាក់
៧) កីឡាករ​បាល់ទាត់ Lionel Messi ជនជាតិ​អាហ្សង់ទីន មាន Follower ២១៨ លាន​នាក់
៦) តារា​ម៉ូដែល​និង​អ្នក​ជំនួញ​ស្រី Kim Kardashian ជនជាតិ​អាមេរិក មាន Follower ២២៩ លាន​នាក់

៥) តន្ត្រីករ​និង​តារា​សម្ដែង Selena Gomez ជនជាតិ​អាមេរិក មាន Follower ២៣៨ លាន​នាក់
៤) តារា​សម្ដែង​និង​អ្នក​ជំនួញ​ស្រី Kylie Jenner ជនជាតិ​អាមេរិក មាន Follower ២៤១ លាន​នាក់
៣) តន្ត្រីករ​និង​តារា​សម្ដែង Ariana Grande ជនជាតិ​អាមេរិក មាន Follower ២៤៤ លាន​នាក់
២) តារា​សម្ដែង​និង​អ្នក​កីឡាកាស Dwayne Johnson ជនជាតិ​អាមេរិក មាន Follower ២៤៧ លាន​នាក់
១) កីឡាករ​បាល់ទាត់ Cristiano Ronaldo ជនជាតិ​ព័រទុយហ្គាល់ មាន Follower ៣០០ លាន​នាក់

ដូច​បាន​បង្ហាញ​ខាង​លើ គឺ Ronaldo ទើប​តែ​បំបែក​កំណត់ត្រា​ថ្មី​នាម​ជា​បុគ្គល​ដំបូង​ក្នុង​លោក ដែល​អាច​យក​បាន​ចំនួន Follower ដល់​ទៅ ៣០០ លាន​នាក់​នៅ​លើ Instagram។ តួ​លេខ​នេះ បុរស​វ័យ ៣៦ ឆ្នាំ​នៅ​ចាញ់​តែ​គណនី​ផ្លូវការ​របស់​ក្រុមហ៊ុន​បង្កើត​ Instagram ផ្ទាល់​តែ​ប៉ុណ្ណោះ ដែល​មាន Follower ៣៩៧ លាន​នាក់។

យើង​នឹង​រង់​ចាំ​មើល​ថា​តើ Ronaldo អាច​បន្ត​កើនឡើង​តួ​លេខ Follower ដល់​យក​ឈ្នះ ក្រុមហ៊ុន​ដែល​ជា​ស្ថាបនិក​ផ្ទាល់​បាន​ឬ​យ៉ាង​ណា​នៅ​ពេល​ខាង​មុខ? ស្រប​ពេល​ដែល​តួ​លេខ​អ្នក​ប្រើប្រាស់​សរុប​លើ Instagram គិត​មក​ទល់​ឆ្នាំ ២០២១ នេះ មាន​ប្រមាណ​ជាង ១,០៧៤ ពាន់​លាន​នាក់ ដែល​នេះ​តិច​ជាង​​បណ្ដាញ​សង្គម Facebook ដែល​មាន​ជាង ២,៨ ពាន់​លាន​នាក់។

បញ្ជាក់​ថា ទន្ទឹម​នឹង​តួ​លេខ​ Follower នាំ​មុខ​ដាច់​គេ ក៏​នាំ​ឲ្យ Ronaldo អាច​កើប​ចំណូល​ពី​ការ​ប្រើប្រាស់ Instagram បាន​ក្រាស់ក្រែល​ផង​ដែរ តែ​លោក​មិន​បែរ​ជា​ចាញ់​បុគ្គល ២ រូប​ទៅ​វិញ។ ដោយ​តាម​របាយការណ៍​ពី Manofmany បាន​ចុះ​ផ្សាយ​ថា Ronaldo ឈរ​លេខ ៣ រក​បាន ៨៨៩ ០០០ ដុល្លារ​ក្នុង​ការ​បង្ហោះ​មួយ​លើក ស្រប​ពេល​ដែល​ Kylie Jenner ឈរ​លេខ ២ រក​បាន ៩៨៦ ០០០ ដុល្លារ និង Dwayne Johnson រក​បាន ១,០១ លាន​ដុល្លារ៕

ប្រភព៖ Manofmany | Wikipedia​