ជើងឯកមួយថៃពិភពលោក រហស្សនាមមនុស្សដែក Rodtang “The Iron Man Jitmuangnon ជោគជ័យយ៉ាងសម្បើមសម្រាប់៦ខែដំបូងដើមឆ្នាំ២០២១។
រូបគេបានឡើងសង្វៀនពីរដងដោយលើកទី១ឈ្នះTagir Khalilov សម្រាប់ការចូលប្រឡូកក្នុងអាជីពប្រដាល់ឃីកបុកសីងជាផ្លូវការ និងនៅព្រឹត្តិការណ៍ “ONE on TNT I” ដែលផ្សាយផ្ទាល់ទៅម៉ោងពិសេសនៅអាមេរិកទទួលបានជ័យជម្នះលើ “Mini T” Danial Williams សម្រាប់ការប្រកួតទី២។
រហូតដល់ពេលនេះ Rodtang ជាកីឡាករដែលមានអ្នកគាំទ្រអន្តរជាតិច្រើនតាមការទស្សនាវីដេអូ “SportsCenter,” ហើយថ្មីៗរូបគេបានបញ្ចេញមតិស្វាគមន៍ជើងខ្លាំងគុនចម្រុះគ្រប់សម័យកាល Demetrious “Mighty Mouse” Johnson ដែលចង់ចូលប្រឡូកក្នុងអាជីពប្រដាល់ឃីកបុកសីង។
នៅក្នុងបទសម្ភាសន៍ផ្តាច់មុខ មនុស្សដែកបានឆ្លុះបញ្ចាំងពីបទពិសោធក្នុងការប្រកួតនៅព្រឹត្តិការណ៍ “ONE on TNT” និងបានបង្ហាញពីផែនការសម្រាប់ពេលវេលាដែលនៅសល់ក្នុងឆ្នាំ២០២១នេះ។
ONE Championship: កាលពីពីរសប្តាហ៍មុន លោកបានប្រកួតលើកដំបូងការផ្សាយបន្តផ្ទាល់ទៅកាន់ម៉ោងមាសអាមេរិកជាមួយដៃគូ “Mini T” Danial Williams តើមានអារម្មណ៍យ៉ាងណាដែរ?
Rodtang Jitmuangnon: ខ្ញុំរីករាយចំពោះឱកាសថ្មីសម្រាប់ខ្លួនឯងនេះ។ ក្នុងនាមតំណាងឲ្យប្រទេសថៃ ខ្ញុំបានបង្ហាញសិល្បៈក្បាច់គុនមួយថៃដល់អ្នកគាំទ្រទូទាំងពិភពលោក ជាពិសេសពលរដ្ឋអាមេរិក។ ខ្ញុំពិតជាសប្បាយចិត្ត និងមានកិត្តិយសណាស់។
កីឡាករជាច្រើនដែលចង់បានឱកាសបែបនេះ ប៉ុន្តែ ONE ទុកចិត្តខ្ញុំ ហើយជ្រើសរើសខ្ញុំ ដូច្នេះខ្ញុំដឹងថា ខ្ញុំត្រូវប្រឹងបង្ហាញជំនាញរបស់ខ្ញុំដល់ពលរដ្ឋអាមេរិក។ ពួកគាត់ប្រហែលយល់ច្បាស់ពីកីឡាគុនចម្រុះ តែខ្ញុំនាំយកមួយថៃដល់ពួកគាត់ ហើយខ្ញុំចង់បង្ហាញថា មួយថៃអាចប្រៀបធៀបជាមួយកីឡាផ្សេងៗទៀត។ ខ្ញុំចង់ឲ្យពួកគាត់ស្រឡាញ់ចូលចិត្តមួយថៃ។
ONE: តើលោកយល់យ៉ាងណាសម្រាប់ការប្រកួតឈ្នះ “Mini T”?
RJ: នៅពេលដៃត្រូវបានផ្លាស់ប្តូរភ្លាមៗ នោះមានន័យថា ខ្ញុំត្រូវការកែសម្រួលផែនការប្រកួតរបស់ខ្ញុំ និងសិក្សាស្វែងយល់ពីដៃគូថ្មីក្នុងរយៈពេលខ្លី។
ដំបូងឡើយ ខ្ញុំបានត្រៀមគ្រប់ស្នៀតទាំងអស់ ប៉ុន្តែកីឡាករ “Mini T”ជាកីឡាករមានបទពិសោធមួយថៃ និងគុនចម្រុះ ហើយគាត់ពិតជាមានបេះដូងថ្មីមែន។ គាត់មានតិកនិកល្អ ដូច្នេះហើយបានជាខ្ញុំមិនអាចសម្រុកលើគាត់ដោយគ្មានការគិតពិចារណាទេ។ ខ្ញុំបានរកចន្លោះឃើញដើម្បីវ៉ៃលុកគាត់។ គាត់ពិតជាធ្វើឲ្យខ្ញុំភ្ញាក់ផ្អើលមែនទែន ពីព្រោះគាត់មានស្មារតីជាអ្នកប្រយុទ្ធពិតៗ។
ONE: លោកទទួលបានការកោតសរសើរយ៉ាងខ្លាំងពីអ្នកគាំទ្រអាមេរិក។ តើការប្រកួតរបស់លោកមានឥទ្ធិពលបែបណាលើអ្នកគាំទ្របរទេស?
RJ: នៅលើ Instagram របស់ខ្ញុំបានកើនឡើងអ្នកគាំទ្រយ៉ាងលឿន ហើយកេរ្តិ៍ឈ្មោះខ្ញុំកាន់តែសាយភាយ។ បន្ទាប់ពីព្រឹត្តិការណ៍ “ONE on TNT” អ្នកគាំទ្ររបស់ខ្ញុំបានកើនស្ទើរតែ១០ម៉ឺននាក់ ដែលភាគច្រើនជនជាតិអាមេរិក អាល្លឺម៉ង់ ជប៉ុន និងប្រទេសផ្សេងទៀត។
មានម្នាក់បានផ្ញើសារមកខ្ញុំនិយាយថា «បើខ្ញុំបានទៅប្រទេសថៃ ខ្ញុំនឹងទៅហាត់មួយថៃជាមួយអ្នក»។ សារនោះបានធ្វើឲ្យខ្ញុំមានមោទនភាព ហើយខ្ញុំចង់និយាយថា អរគុណអ្នកទាំងអស់គ្នាដែលគាំទ្រ និងស្រឡាញ់មួយថៃ។
ONE: លោកប្រកួតឈ្នះ១០លើកជាប់គ្នានៅ ONE Super Series ដែលមិនមានកីឡាករមួយថៃ ឬឃីកបុកសីងណាធ្វើដូច។ វាជាកំណត់ត្រាមួយ។ តើមានអារម្មណ៍យ៉ាងណាចំពោះការសម្រេចបានសមិទ្ធផលដ៏ល្អនេះ?
RJ: អ្នកប្រដាល់ថៃច្រើនណាស់ចង់មានឱកាសដូចខ្ញុំ តែខ្ញុំទទួលបានឱកាសនេះពី ONE Championship ដូច្នេះខ្ញុំពិតជារីករាយ និងមោទនភាពណាស់។
ពីមុន ខ្ញុំជាកីឡាករល្បីនៅស្រុកកំណើត។ នៅពេលខ្ញុំទៅក្រុងបាំងកក ខ្ញុំមិនរំពឹងក្លាយជាជើងឯកពិភពលោកទេ។ វាពិតពិបាករៀបរាប់ណាស់។ វាជាអារម្មណ៍ដ៏កក់ក្តៅ។ ខ្ញុំមានកេរ្តិ៍ឈ្មោះល្បី ហើយអ្នករាល់គ្នាស្វាគមន៍ខ្ញុំរាល់ពេលខ្ញុំទៅណាមកណា។
ជីវិតបានផ្លាស់ប្តូរច្រើនណាស់ ចាប់តាំងពីខ្ញុំចូលប្រឡូកមួយថៃ និងឃីកបុកសីង។ ខ្ញុំអាចឃើញឱកាសជាច្រើននៅក្នុងអាជីព។ ខ្ញុំបានហៅវាជាផលប្រយោជន៍នៅក្នុងជីវិតខ្ញូំ។ រឹតតែសំខាន់ទៀតនោះដោយសារអាជីពប្រដាល់ ខ្ញុំអាចមើលឪពុកម្តាយ និងចិញ្ចឹមមនុស្សជិត២០នាក់នៅក្នុងគ្រួសារដែលនោះជាមោទនភាពបំផុតរបស់ខ្ញុំ។
ONE: ប៉ុន្មានខែមុនជើងខ្លាំងលំដាប់លេខ១ក្នុងតារាងចំណាត់ថ្នាក់គឺមិត្តរួមជាតិ Superlek Kiatmoo9 បានប្រកួតជាមួយ Ilias Ennahachi ដើម្បីដណ្តើមខ្សែក្រវាត់ឃីកបុកសីងពិភពលោក ONE Flyweight ហើយចាញ់ដោយពិន្ទុ។ តើលោកយល់ឃើញយ៉ាងណាដែរការប្រកួតនោះ?
RJ: ខ្ញុំគិត Superlek ឈ្នះ ប៉ុន្តែកីឡាឃីកបុកសីង វាមិនមែនជារឿងចម្លែកទេសម្រាប់ Ennahachi មានចលនាផ្លាស់ប្តូររត់ពេញសង្វៀន ពីព្រោះឃីកបុកសីងគឺជើង ដែលត្រូវទាត់ចូល និងចេញ ផ្លាស់ទីកន្លែង និងព្យាយាមកុំឲ្យបាត់ពិន្ទុ។
បើយើងទាត់ ហើយគាត់រត់ អីចឹងការទាត់របស់យើងអត់មានទម្ងន់ទេ ខណៈគាត់អាចចេញកណ្តាប់ដៃលើដងខ្លួនដើម្បីទទួលបានពិន្ទុ។ មនុស្សដែលចង់វ៉ៃក្រោមច្បាប់ឃីកបុកសីងត្រូវតែស្វែងយល់ឲ្យច្បាស់ពីរបៀបទទួលបានពិន្ទុ។ ខ្ញុំនៅមិនទាន់សិក្សាច្បាស់លាស់នៅឡើយទេ ពីព្រោះខ្ញុំទើបតែប្រកួតបានពីរបីដងប៉ុណ្ណោះ តែបើខ្ញុំត្រូវប្រកួតសំខាន់ ឬខ្សែក្រវាត់ ខ្ញុំនឹងស្វែងយល់ឲ្យច្បាស់ ហើយបន្ទាប់មកផ្តោតយកចិត្តទុកដាក់។
ONE: នៅពេលខាងមុខតើលោកត្រូវធ្វើអ្វី ត្រូវឡើងការពារខ្សែក្រវាត់មួយថៃពិភពលោក ONE Flyweight ជាមួយ Superlek ឬដណ្តើមខ្សែក្រវាត់ឃីកបុកសីងពី Ennahachi ?
RJ: ខ្ញុំចង់ប្រកួតដណ្តើមខ្សែក្រវាត់ឃីកបុកសីងមុន។ ខ្ញុំជាជើងឯកមួយថៃពិភពលោក ដូច្នេះខ្ញុំមានអារម្មណ៍ដូចជាធូរស្រាលឥឡូវនេះ ហើយខ្ញុំចង់បង្កើនការងារធ្ងន់គឺឆ្ពោះទៅមុខ និងដណ្តើមខ្សែក្រវាត់ឃីកបុកសីងពិភពលោក។ បន្ទាប់មក ខ្ញុំនឹងផ្តោតលើអាជីពគុនចម្រុះថែមទៀត ពីព្រោះខ្ញុំចង់ព្យាយាមធ្វើអ្វីថ្មី។
បើយើងផ្តោតលើអ្វីច្រើនរឿងក្នុងពេលជាមួយគ្នា វានឹងធ្វើឲ្យយើងច្របូកច្របល់ ហើយយើងនឹងបាត់បង់ការផ្ទង់ស្មារតី ពីព្រោះយើងត្រូវការពេលវេលាអនុវត្តឲ្យបានម៉ត់ចត់។
សម្រាប់កីឡាគុនចម្រុះ ខ្ញុំគ្មានបទពិសោធសោះ។ វាត្រូវការពេលវេលាយូរដើម្បីហ្វឹកហាត់ និងលះបង់ខ្លួនធ្វើវា។ ដូច្នេះខ្ញុំចង់បានខ្សែក្រវាត់ឃីកបុកសីងមុន រួចព្យាយាមចូលប្រឡូកគុនចម្រុះ។
ONE: សម្រាប់ពេល៦ខែបន្ទាប់នៅឆ្នាំ២០២១ តើលោកចង់បានអ្វីមុនបញ្ចប់ឆ្នាំ?
RJ: ខ្ញុំជាមនុស្សម្នាក់ដែលចូលចិត្តប្រកួតឲ្យបានញឹកញាប់។ ខ្ញុំចូលចិត្តប្រកួត ហើយបើខានឡើងសង្វៀនយូរ ខ្ញុំមិនស្រួលចិត្តសោះ។ វាមិនដូចអ្នកប្រដាល់បរទេសដែលប្រកួតតែពីរឬបីដងប៉ុណ្ណោះក្នុងមួយឆ្នាំ។ សម្រាប់ខ្ញុំចង់ធ្វើឲ្យខ្លួនសកម្ម។
ពីមុនខ្ញុំរស់នៅ Isaan ខ្ញុំតែងតែប្រកួតពីរដងក្នុងមួយថៃ ដូច្នេះខ្ញុំធ្លាប់ហើយ។ ជូនកាល ខ្ញុំរបួសពីការប្រកួតចុងក្រោយ តែខ្លួនប្រាណ និងបេះដូងខ្ញុំនៅរឹងមាំ និងចង់ចេញទៅប្រកួតទៀត។ ដូច្នេះ ខ្ញុំចង់បានប្រកួតឲ្យបានញឹកញាប់៕