៣១ សីហា ២០០៥ ជាថ្ងៃដែល Sergio Ramos បានក្លាយឈ្មោះជាកីឡាកររបស់ក្លឹប Real Madrid ហើយនៅថ្ងៃទី ១ កក្កដា ២០២១ ក៏សម្រេចនឹងក្លាយជាថ្ងៃដែល Ramos លែងឈរឈ្មោះជាកីឡាកររបស់ក្លឹបអធិរាជសតទៅទៀត។
ឆ្លងកាត់រយៈពេល ១៦ ឆ្នាំមកនេះ ប្រធានក្រុមជាប់រហស្សនាម “បងធំប្រចាំទីក្រុង Madrid” បានធ្វើព្យុះភ្លៀងទល់ក្លឹបគូប្រជែងទាំងក្នុងនិងក្រៅតំបន់ ហើយជោគជ័យលើការឈ្នះពានរង្វាន់សរុបចំនួន ២២ គ្រឿង។ សរុបការបង្ហាញខ្លួន ៧១៦ ប្រកួត កីឡាករអេស្ប៉ាញរកបាន ១០៤ គ្រាប់និង Assist ៤០ លើក។ ដ្បិតបើគុណភាពនៅឃើញថាល្អ តែការចរចាកុងត្រាថ្មីមិនត្រូវរ៉ូវ ក៏នាំឲ្យខ្សែការពារវ័យ ៣៥ ឆ្នាំ ជ្រើសយកផ្លូវបែក ហើយខកខានការឈរជើងក្រោមការដឹកនាំលើកទី ២ របស់អ្នកចាត់ការលោក Carlo Ancelotti។
មានអ្នកគាំទ្រចោទសួរមកកាន់ទំព័រ CTS Sports ថាតើកីឡាករលេងកាចរូបនេះ ប្រហែលជានឹងផ្ទេរទៅក្លឹបថ្មីណាមួយនៅពេលបន្ទាប់? តាមសមត្ថភាពនិងកត្តាអាយុរបស់ Ramos យើងអាចធានាបានថា គេនឹងមិនទាន់ចាកចេញពីលីគកំពូលអឺរ៉ុបនៅឆ្នាំ ២០២១ នេះទេ ពោលគឺធីបចោលការផ្ទេរទៅក្លឹបនៅសហរដ្ឋអាមេរិក។ ផ្ទុយទៅវិញគឺក្លឹបធំៗ ៤ នេះ ដែលមានភាគរយខ្ពស់អាចនឹងស្វាគមន៍ការមកដល់របស់ខ្សែការពារកណ្ដាលពោរពេញដោយបទពិសោធន៍ខាងលើ៖
៤) Sevilla
ជាអតីតក្លឹបកំណើត និងកន្លែងអភិវឌ្ឍខ្លួន របស់ Ramos ដែលលោកបានរួមរស់នៅទីនោះតាំងពីឆ្នាំ ២០០២ មកទល់ឆ្នាំ ២០០៥ មុនត្រូវបាន Real Madrid ទិញយកនៅតម្លៃខ្លួន ២៧ លានអឺរ៉ូ។
យ៉ាងណាការទំនេរជើងសារនេះ ខាង Sevilla ក៏លេចលឺថាចង់បាន Ramos ត្រលប់ទៅវិញដែរ ដោយមានរបាយការណ៍ថាផ្ដល់កុងត្រាឲ្យរយៈពេល ៥ ឆ្នាំឯណោះ ហើយមួយឆ្នាំទទួលបានប្រាក់ពលកលម្ម ៧ លានអឺរ៉ូ។ ស្តាប់ទៅសំណើនេះល្អគួរសម តែតាមការព្យាករណ៍ពីអ្នកជំនាញលើទីផ្សារដោះដូរ គេថា Ramos នឹងមិនផ្ទេរទៅក្លឹបថ្មីដែលមានឈ្មោះនៅ La Liga ទេ ដើម្បីបង្ហាញពីការគោរពដល់ក្លឹប Real Madrid ជាក្លឹបដែលខ្លួនឈរជើងអស់រយៈពេល ១៦ រដូវកាលមកហើយ។
៣) Paris Saint-Germain
ដរាបណា PSG មិនទាន់ឈ្នះពាន Champions League នោះការចាយវាយលើការនាំយកកីឡាករកំពូលៗមកចូលរួម នៅតែបន្តកើតមាន ហើយគោលដៅជាមួយខ្សែការពារកណ្តាល Ramos ក៏រំលេចក្នុងផែនការណ៍របស់ក្លឹបនៅទីផ្សារដោះដូរខាងមុខផងដែរ។
គេជឿថា Ramos អាចមកបំពេញចន្លោះនៅតំបន់ការពារ ក្រោយ Thiago Ssilva ជាខ្សែការពាររឹងមាំម្នាក់បានចាកចេញកាលពីឆ្នាំទៅ។ ការព្យាករណ៍ដ៏គួរឲ្យចាប់អារម្មណ៍មួយនោះ មានគេនិយាយថា Ramos ប្រហែលជាដើរចេញពី Real ដើម្បីបបួល Ronaldo ទៅចូលរួមនៅ PSG ហើយប្រហែលជាមានអតីតគ្រូចាស់ Zidane មករួបរួមផងដែរ។
២) Manchester United
តាមពិតទៅ Man Utd មិនមែនទើបតែចាប់អារម្មណ៍ Ramos នោះទេ ដោយពួកគេធ្លាប់ស្ថិតក្នុងចរចាតាំងពីឆ្នាំ ២០១៥ មកម្ល៉េះ តែកាលនោះ Ramos ជ្រើសយកការបន្តឈរជើងតាមរយៈការចុះហត្ថលេខាលើកុងត្រាថ្មីឲ្យ Real Madrid។
ប៉ុន្តែសារនេះ វាអាចក្លាយជាការពិត ដោយ United ក៏នៅតែបាក់ចិត្តមកលើកីឡាករអេស្ប៉ាញរូបនេះផងដែរ ហើយយើងសាកស្រមៃទៅមើល បើ Harry Maguire និង Sergio Ramos ចាប់ដៃគ្នា តើល្មមអាចបន្លាចក្រុមកំពូលៗនៅតំបន់អឺរ៉ុបបានដែរឬទេ ព្រោះសព្វថ្ងៃគេឃើញថា Maguire ល្អហើយ នៅឡើយតែខ្វះកម្លាំងចលករថ្មី មកចាំជួយជំរុញបន្ថែមតែប៉ុណ្ណោះ។ ដូចនេះក្រុមដឹកនាំដោយលោក Ole Gunnar Solskjaer ពេលនេះជឿថាប្រហែលជាបង្វែររ៉ាដាពីការសម្លឹងចង់បាន Varane មកជា Ramos វិញហើយ ព្រោះមិនចាំបាច់ចំណាយលើតម្លៃផ្ទេរកប់ពពក។
១) Manchester City
United និង PSG កាលពីមួយរយៈមុនអាចថាមានប្រៀប លើការនាំយក Ramos តែប៉ុន្មានសប្ដាហ៍ចុងក្រោយ ក៏មានក្លឹបយក្សមួយផ្សេងទៀតរំលេចវត្តមានមកដែរ នោះគឺ Man City។ មានដំណឹងថា ភ្នាក់ងាររត់ការរបស់ Ramos ក៏បានទាក់ទងជាមួយភាគីក្លឹបឈ្នះជើងឯក Premier League មួយនេះដែរ ហើយស្របពេលដែលក្លឹបទើបតែបាត់បង់ Eric Garcia ដែលជាជញ្ជាំងការពារដ៏រឹងមាំមួយផង អ៊ីចឹងការនាំយកអ្នកថ្មីដូចជា Ramos គឺសក្ដិសមជាគោលដៅដែលក្លឹបមិនគួរមើលរំលង។
បើ Ramos ផ្ទេរទៅ City នោះគេអាចនឹងចាប់ដៃគូ ជាមួយ Ruben Dias ឬ John Stones ឬអាចជា Nathan Ake ដែលជាជម្រើសល្អបំផុតរបស់លោក Pep Guardiola នៅពេលបច្ចុប្បន្ននេះ។ សរុបមកតាមការយល់ឃើញរបស់អ្នករាល់គ្នា តើចង់ឲ្យ Sergio Ramos ផ្ទេរទៅក្លឹបថ្មីណាមួយ?
ប្រភព៖ AS