Janet “JT” Todd បានរក្សាខ្សែក្រវាត់ឃីកបុកសីងពិភពលោកយូរដែរហើយ ហើយក៏មិនទាន់មាននរណាម្នាក់ដណ្តើមយកនាងបានឡើយ។
យ៉ាងណានាងដឹងថា តារាថ្មីកំពុងរះលើឆាកប្រដាល់ពិភពលោក ONE Championship កីឡាការិនី Anissa “C18” Meksen អាចជាគូប្រជែងដ៏ល្អសម្រាប់នាង ដូច្នេះនាងសង្ឃឹមបានជួបគ្នានៅលើសង្វៀនថ្ងៃណាមួយ។
Todd បានស្គាល់យ៉ាងច្បាស់ថា ការប្រកួតជាមួយកីឡាការិនីបារាំងរូបនេះអាចជាបញ្ហាប្រឈមខ្លាំងសម្រាប់នាង។ ប៉ុន្តែកីឡាការិនីអាមេរិកម្ចាស់ខ្សែក្រវាត់រូបនេះចង់ជួបដៃគូដែលល្អដូច Meksen។
Todd និយាយថា ៖«គាត់ (Anissa) មានកេរ្តិ៍ឈ្មោះល្បី ហើយជាជើងខ្លាំងនៅកម្មវិធី GLORY។ ប្រសិនបើខ្ញុំមានឱកាសបានជួបជាមួយនាងនោះ វានឹងក្លាយជាការប្រកួតដ៏អស្ចារ្យ»។មានកំណើតនៅ Nancy ប្រទេសបារាំង ប៉ុន្តែឥឡូវស្ថិតនៅទីក្រុងបារីស នាង Meksen មានកេរ្តិ៍ឈ្មោះគ្រប់ទីកន្លែងដែលនាងប្រកួត។
កីឡាការិនីរហស្សនាម “C18″មានប្រវត្តិប្រកួតអាជីពឈ្នះ១០០ដង និងចាញ់៥ដងប៉ុណ្ណោះ ក្នុងនោះផ្តួលដៃគូឲ្យសន្លប់៣២ដង។ អ្វីដែលគួរឲ្យចាប់អារម្មណ៍ទៀតនោះ តារាស្រីបារាំងរូបនេះបានជួបប្រកួតជាមួយដៃគូជើងខ្លាំងលើលោកដូចជា Jady Menezes, Sofia Olofsson និង Iman “Pretty Killer” Barlowជាដើម។
លើវិថីប្រដាល់ សមាជិកក្លឹប Tiger Muay Thai បានឈ្នះជើងឯកឃីកបុកសីង និងមួយថៃពិភពលោក៦ដង។ មុនពេលចូលប្រឡូកនៅ ONE Super Series កីឡាការិនីរូបនេះបានក្លាយជាកីឡាការិនីដ៏ឆ្នើមម្នាក់ក្នុងលោកទៅហើយសម្រាប់ទម្ងន់ atomweight។
ដូច្នេះមានន័យថា ការបោះជំហានចូល ONE គឺជាតារាគ្រោះកាចសម្រាប់រាជនីសង្វៀនពិភពលោក ONE Atomweight។
Todd ជាកីឡាការិនីម្នាក់ដែលបានឆ្លងកាត់ដៃគូល្អៗជាច្រើននាក់ និងធ្វើបានយ៉ាងល្អបំផុត។ អ្វីដែលជំរុញទឹកចិត្តកីឡាការិនីអាមេរិករូបនេះគឺទទួលបានជ័យជម្នះ៦ប្រកួតជាប់គ្នាក្នុងនោះឈ្នះអតីតជើងឯកពិភពលោក២ប្រភេទកីឡា Stamp Fairtex និងឈ្នះ Alma Juniku និង Anne “Ninja” Line Hogstad។
ឈ្មោះហៅក្រៅ “C18″អាចនឹងក្លាយជាដៃគូដ៏ស្វិតស្វាញសម្រាប់នាង ប៉ុន្តែម្ចាស់ខ្សែក្រវាត់ពិភពលោកហៅក្រៅ “JT”ប្រហែលជាត្រៀមខ្លួនស្វាគមន៍គ្រប់ក្បាច់ ហើយនាងសង្ឃឹមថា ថ្ងៃណាមួយបានជួបកីឡាការិនីបារាំងម្នាក់នេះនៅលើសង្វៀន។
Todd និយាយថា ៖«ខ្ញុំគិតថា បើបានប្រកួតជាមួយនាងពិតជាល្អណាស់។ នាងមានចលនាលឿនណាស់។ ជាពិសេសនាងមានកម្លាំងស៊ុហ្វខ្លាំង និងបច្ចេកទេសល្អ។ នាងជាជើងឯកពិភពលោកនៅ GLORY»។
«ដូច្នេះខ្ញុំគិតថា បើបានប្រកួតជាមួយនាងពិតជាល្អណាស់ ។ មិនថាប្រកួតការពារខ្សែក្រវាត់ ឬ Grand Prix ឬក៏វ៉ៃដណ្តើមខ្សែក្រវាត់មួយថៃដែលនៅទំនេរ គឺខ្ញុំស្វាគមន៍ជានិច្ច។ វានឹងក្លាយជាការប្រកួតដ៏អស្ចារ្យសម្រាប់ខ្ញុំ។ ខ្ញុំគិតថា ល្អ»៕