នៅ Mongkolpetch Petchyindee Academy បានប្រើកណ្តាប់ដៃស្តាំធ្វើឲ្យដៃគូ Elias “The Sniper” Mahmoudi ដួលរាប់ទី១ វាបានបង្ហាញយ៉ាងច្បាស់ណាស់ថា រូបគេពិតជាឈានដល់កម្រិតមួយក្នុងស្វែងរកខ្សែក្រវាត់មួយថៃពិភពលោកហើយ។
តាមពិតទៅ Mahmoudi បានធ្វើការវ៉ៃសម្រុកយ៉ាងខ្លាំងទាំងបីទឹក ហើយដេញឲ្យកីឡាករថៃព្យាយាមការពារ និងវ៉ៃបកវិញស្ទើរពេញសង្វៀន។ ទន្ទឹមជាមួយនឹងការពារបានល្អ Mongkolpetch ចេញអាវុធលឿនៗដោយកណ្តាប់ដៃ និងចាប់អោបដើម្បីមិនឲ្យដៃគូធ្វើអ្វីបានតាមចិត្ត។
កីឡាករវ័យ២៥ឆ្នាំបានដួលនៅក្នុងទឹកទី២ក្នុងការប្រកួតលក្ខណៈមួយថៃនៅព្រឹត្តិការណ៍ ONE: FULL BLAST II កាលពីថ្ងៃទី១១ ខែមិថុនា កន្លងទៅនេះ។ ប្រការនេះចៅក្រមបានកាត់សេចក្តីឲ្យកីឡាករមកពីក្លឹប Petchyindee Academy ទទួលបានជ័យជម្នះដោយពិន្ទុដាច់ទៅលើជើងខ្លាំងចំណាត់ថ្នាក់លេខ៤ក្នុងទម្ងន់ flyweight ដើម្បីបង្កើតកំណត់ត្រាជ័យជម្នះ៤-០នៅសង្វៀនពិភពលោក។
តាមមតិលើកឡើងថា តើ Mongkolpetch ស័ក្តិសមដល់ពេលវ៉ៃដណ្តើមខ្សែក្រវាត់ពិភពលោកជាមួយអធិរាជសង្វៀន Rodtang “The Iron Man” Jitmuangnon ហើយឬនៅ?
លំដាប់ចំណាត់ថ្នាក់គួរជួប
តាមរយៈជ័យជម្នះលើ Mahmoudi មានន័យថា Mongkolpetch អាចនឹងស័ក្តិសមទៅជួបអធិរាជសង្វៀន Rodtang នៅពេលណាមួយហើយ។
ទោះបីជាយ៉ាងណា មានជើងខ្លាំង៤នាក់ដែលស្ថិតនៅក្នុងទម្ងន់នេះដែលកំពុងរង់ចាំជួបនឹងមនុស្សដែក ដូច្នេះវាកាន់តែប្រសើរបើ Mongkolpetch ត្រូវឆ្លងកាត់ជើងខ្លាំងទាំង៤នាក់នោះជាមុនសិន មុនពេលជួបម្ចាស់ខ្សែក្រវាត់។ ក្នុងចំណោមមានទាំងកីឡាករចំណាត់ថ្នាក់លេខ៥ Petchdam “The Baby Shark” Petchyindee Academy ប៉ុន្តែមិនអាចទៅរួចទេ ពីព្រោះជាមិត្តរួមក្លឹបហាត់ជាមួយគ្នា។
ចំណែកអ្នកផ្សេង កីឡាករចំណាត់ថ្នាក់លេខ២របស់អង់គ្លេស Jonathan “The General” Haggerty ដែលបានប្រកួតចាញ់ Rodtang ពីរដង ហើយមិត្តរួមក្លឹប Petchdam ក៏ធ្លាប់បានជួបម្តងដែរ ដែលអ្នកទាំងពីរនេះក៏អាចវ៉ៃខ្សែក្រវាត់ជាថ្មីបានដែរ។ ចំណែកជើងខ្លាំងចំណាត់ថ្នាក់លេខ១រន្ទះជើងម៉ាស៊ីន Superlek “The Kicking Machine” Kiatmoo9 និងកីឡាករលេខ៣ “The Angel Warrior” Panpayak Jitmuangnon ដែលរូបគេគួរឆ្លងកាត់។
តាមការលើកឡើងគឺ Superlek ដែលមានប្រវត្តិប្រកួតឈ្នះ ៤ និងចាញ់១នៅ ONE Super Series ក៏អាចជាដៃគូបន្ទាប់របស់ Rodtangដែរ។
ប្រសិនបើ Rodtang និង Superlek ជួបគ្នាដណ្តើមខ្សែក្រវាត់មួយថៃពិភពលោក ONE Flyweight អីចឹង Mongkolpetch ក៏អាចស័ក្តិសមនឹងជួប Haggerty ឬ Panpayak។ វាប្រសើរណាស់ ប្រសិនបើ Mongkolpetch ឈ្នះនរណាម្នាក់ក្នុងចំណោមអ្នកទាំងពីរ មុនពេលបោះជំហានទៅជួបអ្នកឈ្នះរវាង Rodtang និង Superlek។
មិនដែលចាញ់ ≠ សមទទួលបាន
ហេតុផលមួយទៀតសម្រាប់ Mongkolpetch ដែលសមទៅប្រកួតដណ្តើមខ្សែក្រវាត់ពិភពលោកនោះគឺ គាត់មិនទាន់ស្គាល់បរាជ័យឡើយនៅ ONE Super Series។
ចាប់តាំងពីឆ្នាំ២០១៩មក តារាប្រដាល់ថៃរូបនេះបានជួបដៃគូខ្លាំងដូចជា Alex “Phet” Serepisos សម្រាប់ការប្រកួតលើកដំបូង ហើយលើកទី២ឈ្នះ Joseph “The Hurricane” Lasiri និងឈ្នះជើងឯកគុនខ្មែរពិភពលោក សុខ ធី សម្រាប់ការប្រកួតលើកទី៣ និងលើកទី៤ឈ្នះ Mahmoud។
ប៉ុន្តែកីឡាករជាច្រើនដែលមិនទាន់ស្គាល់បរាជ័យបានឡើងទៅប្រកួតខ្សែក្រវាត់ពិភពលោក ប៉ុន្តែបរាជ័យ។ ដូចជា កីឡាករចំណាត់ថ្នាក់លេខ១ bantamweight គឺ Saemapetch Fairtex ឈ្នះ៣លើកជាប់គ្នានៅ ONE Super Series និងមិនទាន់ស្គាល់បរាជ័យឡើយ មុនពេលប្រកួតដណ្តើមខ្សែក្រវាត់ពិភពលោក ONE Bantamweight ជាមួយ Nong-O Gaiyanghadao។ ជើងឯកពិភពលោក Nong-O បានផ្តួល Fairtex ក្នុងទឹកទី៣។
ជាមួយគ្នានេះ Superlek ក៏មិនធ្លាប់ចាញ់ដែរមុនពេលប្រកួតដណ្តើមខ្សែក្រវាត់ ប៉ុន្តែត្រូវបរាជ័យក្រោមកណ្តាប់ដៃជើងឯកឃីកបុកសីងពិភពលោក Ilias “Tweety” Ennahachi។
ជម្រើសគួរឲ្យចាប់អារម្មណ៍ផ្សេងទៀត
Mongkolpetch ទីបំផុតជាកីឡាករម្នាក់ដែលអាចទៅប្រជែងនឹង Rodtang ហើយ ហើយក៏មានកម្លាំងចិត្តពីមិត្តរួមក្លឹប។
នៅខែកក្កដា ឆ្នាំ២០២០ “មនុស្សដែក”បានយកឈ្នះមិត្តរួមក្លឹប Petchdam ដោយពិន្ទុនៅ ONE: NO SURRENDER។ នៅពេលនោះ Petchdam ក៏បានក្លាយជាដៃគូល្អម្នាក់សម្រាប់មិត្តរួមជាតិដែរ ប៉ុន្តែភាពរឹងមាំ និងការវ៉ៃមិនចុះថយរបស់ Rodtang ស្ទើរតែផ្តួល Petchdam ឲ្យសន្លប់ទៅហើយ។
តាមរយៈការឈ្នះ Petchdam នៅពេលនោះ ឥឡូវ Mongkolpetch បានកាន់តែកៀកនឹង Rodtang ជាងមិត្តរួមក្លឹបរបស់ខ្លួនថែមទៀត។ វាគួរណាស់ដែលរូបគេអាចជួបជើងឯកហើយ។ មិនត្រឹមតែជើងឯកពិភពលោកជាកម្លាំងជំរុញទឹកចិត្តប៉ុណ្ណោះទេ ប៉ុន្តែមិត្តរួមក្លឹប Petchyindee Academy ក៏ជាផ្នែលមួយដ៏សំខាន់ដើម្បីផ្តល់គំនិតឲ្យប្រកួតជាមួយមនុស្សដែក។
ទោះបីជាយ៉ាងណា Superlek ក៏កំពុងស្វែងរកជម្រើសរបស់ខ្លួនដែរ។ បរាជ័យក្រោមកណ្តាប់ដៃ Ennahachi ក្នុងការប្រកួតដណ្តើមខ្សែក្រវាត់ឃីកបុកសីងពិភពលោក ហើយក៏ជាឱកាសលើកទី២ដែលត្រូវប្រកួតខ្សែក្រវាត់ពិភពលោកជាមួយមិត្តរួមជាតិ។
ប្រសិនបើ Mongkolpetch ជួប Superlek សម្រាប់ការប្រកួតបន្ទាប់នោះ វាជារឿងមួយគួរឲ្យចាប់អារម្មណ៍ដែរ។ ក្នុងចំណោមអ្នកទាំងពីរដែលឈ្នះនឹងឡើងទៅជួប Rodtang៕