នេះគឺជាព្រឹត្តិការណ៍ UEFA Euro Championship លើកទី ១៦ ដែលវាក៏រាប់បានជាលើកទី ១ សម្រាប់កីឡាករមួយចំនួន ហើយក៏អាចនឹងក្លាយជាលើកចុងក្រោយសម្រាប់កីឡាករវ័យចំណាស់ៗស្រករ ៣០ ឆ្នាំក្រាស់ផងដែរ។
មើលតាមកត្តាអាយុ គុណភាពនៃការបង្ហាញលើទីលាន យើងអាចព្យាករណ៍បានថា កីឡាករកំពូល ៥ រូប ទំនងជានឹងចូលនិវត្តពីជម្រើសជាតិត្រឹម Euro សារនេះហើយ ពោល Euro នៅឆ្នាំ ២០២៤ ប្រហែលជានឹងគ្មានវត្តមានរបស់ពួកគេទៀតឡើយ ពោលកីឡាករខ្លះក៏អាចជាចូលនិវត្តត្រឹមឆ្នាំ ២០២១ នេះ ឬអាចរង់ចាំដោយក្រោយចប់ FIFA World Cup 2022។ អ្នកទាំង ៥ នោះមានដូចជា៖
៥) Yuri Zhirkov ជម្រើសជាតិរុស្ស៊ី
ជាខ្សែការពារស្លាបឆ្វេង ដែលមានវ័យ ៣៧ ឆ្នាំទៅហើយ។ នៅរដូវកាលចុងក្រោយជាមួយការលេងឲ្យក្លឹប Zhirkov ក៏កាន់តែខ្សត់ឱកាសក្នុងការបង្ហាញខ្លួនលើទីលាន បែបនេះគេជឿថា នៅ Euro 2020 អាចជាការបញ្ចប់អាជីពរយៈពេល ១៦ ឆ្នាំរបស់លោកនៅជម្រើសជាតិ។ បញ្ជាក់ថា Zhirkov បង្ហាញខ្លួនឲ្យរុស្ស៊ី ១០៥ ប្រកួត រាប់បានជាកីឡាករបង្ហាញខ្លួនច្រើនបំផុតលំដាប់ទី ៤។
៤) Lukasz Fabianski ជម្រើសជាតិប៉ូឡូញ
ស្ថិតនៅវ័យ ៣៦ ឆ្នាំ ដោយសម្រាប់ការលេងឲ្យក្លឹបលោកជាដៃទី ១ នៅក្លឹប West Ham United។ យ៉ាងណានៅជម្រើសជាតិ គេជឿថាគ្រូជម្រើសជាតិប៉ូឡូញហាក់ជឿជាក់លើសមត្ថភាពរបស់ Wojciech Szczesny ជាង។ បែបនេះមានន័យថា Fabianski អាចមានភាគរយចូលនិវត្តច្រើន ក្រោយចប់ Euro 2020 បើនៅតែបន្តដើរតួជាស្រមោលរបស់កីឡាករ Juventus។ សរុបនៅការបង្ហាញខ្លួនឲ្យជម្រើសជាតិ Fabianski ឈរជើងបាន ៥៦ ប្រកួត របូត ៤៥ គ្រាប់និងទប់បាល់ Clean Sheet ២៦ លើក។
៣) Giorgio Chiellini ជម្រើសជាតិអ៊ីតាលី
ជាខ្ញីចាស់មានបទពិសោធន៍ជោកជាំនៅ Euro សារនេះ ហើយបើទោះបីជាវ័យជ្រេចូល ៣៦ ឆ្នាំហើយក្តី តែភាពរឹងមាំរបស់ Chiellini នៅតែអាចធានាបានឲ្យគេជាប់ជម្រើសដំបូង ក្រោមការដឹកនាំរបស់លោក Roberto Mancini។
យ៉ាងណានៅរយៈពេលជាងមួយឆ្នាំចុងក្រោយ គេឃើញ Chiellini រាងទន់ជាងមុនបន្តិច ពោលគឺជួបបញ្ហារបួសច្រើនជាមួយសេះបង្កង់ ហើយបើទៅមើលអ៊ីតាលីក៏កំពុងសម្បូរជើងថ្មីដែលមានគុណភាពផងនោះ អ៊ីចឹង Euro 2020 ថាមិនត្រូវក៏អាចក្លាយជាឆ្នាំចុងក្រោយរបស់ខ្សែការពារកណ្តាលរូបនេះនៅជម្រើសជាតិផងដែរ។
២) Pepe ជម្រើសជាតិព័រទុយហ្គាល់
ដ្បិតវ័យចូលដល់អាយុ ៣៨ ឆ្នាំ ក៏ Pepe នៅតែជាប់ឈ្មោះលេងឲ្យជម្រើសជាតិ ក្រោមការដឹកនាំរបស់លោក Fernando Santos។ ចំណុចខ្លាំងរបស់អតីតខ្សែការពារ Real Madrid រូបនេះ គឺល្បឿន និងភាពរឹងមាំក្នុងការតតាំងជាមួយគូប្រជែង។ យ៉ាងណាស្រដៀងនឹង Chiellini ដែរ នៅរយៈពេលចុងក្រោយ Pepe គឺទន់ និងឆាប់ជួបរបួសលើទីលាន ដែលនាំឲ្យលោកប្រហែលជាពិបាកនឹងស៊ូទៅព្រឹត្តិការណ៍ឆ្នាំក្រោយៗទៀតណាស់។
បង្ហាញខ្លួនឲ្យព័រទុយហ្គាល់តាំងពីឆ្នាំ ២០០៧ សរុបមាន ១១៥ ប្រកួត រកបាន ៧ គ្រាប់និង Assist ៣ លើក។
១) Luka Modric ជម្រើសជាតិក្រូអាត
ក្រោយចូលមកដល់វ័យ ៣០ ឆ្នាំ Modric ហាក់ឡើងជើងខ្លាំង ជាពិសេសបានត្រួសត្រាយឲ្យក្រូអាតឡើងដល់វគ្គផ្ដាច់ព្រ័ត្រ World Cup ជាលើកដំបូង កាលពីឆ្នាំ ២០១៨។ យ៉ាងណាខ្សែបម្រើរូបនេះ ត្រៀមនឹងហៀរចូលអាយុ ៣៦ ឆ្នាំហើយនៅខែកញ្ញាខាងមុខ ដែលវាក៏ល្មមនឹងដល់ពេលដែលជើងថ្មីមានទេពកោសល្យឯទៀតមកស្នងបន្ត មានដូចជា Marcelo Brozovic, Mateo Kovacic និង Nikola Vlasic ដែលអាចជំនួសតំណែងបម្រើរបស់ Modric បាន។
Modric ដែលបង្ហាញខ្លួនឲ្យជម្រើសជាតិតាំងពីឆ្នាំ ២០០៦ សរុបឆ្លងកាត់ ១៣៦ ប្រកួត រកបាន ១៧ គ្រាប់និង Assist ២១ លើក៕
ប្រភព៖ Sportskeeda