ខ្សែប្រយុទ្ធ Romelu Lukaku រកបាន២គ្រាប់ម្នាក់ឯងជួយក្រុមជម្រើសជាតិបែលហ្សិកយកឈ្នះលើក្រុមជម្រើសជាតិរុស្ស៊ី ក្នុងលទ្ធផល ៣-០ សម្រាប់ការប្រកួតពានរង្វាន់ Euro 2020 ។
ក្រុមបែលហ្សិកហាក់ដូចជាមិនពិបាកនោះទេសម្រាប់ការប្រកួតនេះ។ នៅនាទីទី១០ Lukaku រកបាន១គ្រាប់ទៅហើយ មុនពេល Meunier ថែមបានគ្រាប់ទី២ទៀតនៅនាទី៣៤។ ការប្រកួតជិតនឹងបញ្ចប់ទៅហើយនាទី៨៨ ខ្សែប្រយុទ្ធរបស់ក្រុម Inter Milan ដដែលក៏រកបាន១គ្រាប់ទៀត ដើម្បីជួយក្រុមបែលហ្សិកយកឈ្នះលើក្រុមរុស្ស៊ី ក្នុងលទ្ធផល ៣-០ តែម្ដង។
ក្រោយចប់ការប្រកួត Lukaku ក៏បាននិយាយសុំឱ្យ Eriksen ដែលបានដួលសន្លប់ក្នុងការប្រកួតកន្លងទៅនោះ ឆាប់ជាសះស្បើយផងដែរ។ អតីតកីឡាករ Manchester United បាននិយាយថា៖ “ខ្ញុំបានទាក់ទងទៅគាត់ ខ្ញុំបានដំណឹងថាគាត់រួចផុតពីគ្រោះថ្នាក់ហើយ។ ខ្ញុំសង្ឃឹមថាគាត់នឹងមានសុខភាពល្អត្រលប់មកវិញ”៕
ប្រភព៖ dailymail