ជើងឯកគុនចម្រុះពិភពលោក ONE Lightweight កីឡាករ Christian “The Warrior” Lee ជឿជាក់ថា Eddie “The Underground King” Alvarez ធ្វើមិនទាន់បានគ្រប់គ្រាន់ដើម្បីឈ្នះខ្សែក្រវាត់ពិភពលោកទេ។
បន្ទាប់ពីកីឡាករអាមេរិកអាយុ៣៧ឆ្នាំបានបន្តអះអាងពីការបន្តស្វែងរកការប្រកួតដណ្តើមខ្សែក្រវាត់ពិភពលោកជាថ្មីតាមបណ្តាញទំនាក់ទំនងសហ្គម កីឡាករអាមេរិក-សិង្ហបុរីជាអធិរាជសង្វៀនបានលើកឡើងថា ៖«វាជាការប្រកួតប្រជែងនឹងពេលវេលាសម្រាប់ Eddie»។
កីឡាកររៀបរាប់ថា ៖«គាត់កាន់តែចាស់ហើយ។ គាត់បានប្រកួតចាញ់ជាបន្តបន្ទាប់នៅ ONE Championship ហើយគាត់ចង់វ៉ៃដណ្តើមខ្សែក្រវាត់ខ្លាំងណាស់។ ខ្ញុំគិតថា គាត់គ្រាន់តែកំពុងព្យាយាមធ្វើអ្វីដែលគាត់ចង់បិទមាត់អ្នករិះគន់ ដូច្នេះសង្ឃឹមថា ONE Championship អាចផ្តល់ឱកាសឲ្យគាត់ទៀត»។
ចាប់តាំងពីគាត់ចុះកុងត្រាចូល ONE Championship កាលពីខែតុលា ឆ្នាំ២០១៨មក Alvarez បានដាក់គោលដៅស្វែងរកខ្សែក្រវាត់ពិភពលោក Lightweight ប៉ុន្តែមិនទាន់បានសម្រេចទេ។ សម្រាប់ការប្រកួត៣លើកកន្លងមក គាត់បានឈ្នះខ្លាចាស់ Eduard “Landslide” Folayang ប៉ុន្តែត្រូវបានប្រកាសឲ្យចាញ់ Iuri Lapicus ដោយសារវ៉ៃខុសលក្ខន្តិកៈ និងចុងក្រោយចាញ់ពិន្ទុ Ok Rae Yoon កាលពីខែមេសា។
ទោះជាយ៉ាងណា កីឡាករអាមេរិករហស្សនាម “The Underground King”ជឿជាក់ថា គាត់ជិតនឹងផ្តួល Lapicus ទៅហើយ ប៉ុន្តែបែរជាដៃគូបែរខ្នងដែលបណ្តាលឲ្យគាត់មានឱកាសវ៉ៃពីក្រោយ។
ទោះយ៉ាងណា Lee មិនគិតថា ខ្លាចាស់អាមេរិក Alvarez ស័ក្តិសមទទួលបានឱកាសប្រកួតដណ្តើមខ្សែក្រវាត់ទេឥឡូវនេះ គាត់បានវិលមកកាន់សង្វៀន បន្ទាប់ពីឃ្លាតឆ្ងាយពីសង្វៀន៦ឆ្នាំហើយ។
សម្រាប់ជាឧទាហរណ៍ កីឡាករសិង្ហបុរី-អាមេរិកបានកត់សំគាល់៣សប្តាហ៍ប៉ុណ្ណោះដើម្បីជំនួស Alvarezដែលរបួសដើម្បីប្រកួតជាមួយ Saygid “Dagi” Guseyn Arslanaliev ក្នុងវគ្គផ្តាច់ព្រ័ត្រពានរង្វាន់ ONE Lightweight World Grand Prix ដែលទីបំផុតឈ្នះដោយពិន្ទុប៉ុណ្ណោះ។
ក្នុងចិត្ត តាមពិតទៅ អធិរាជសង្វៀនចង់ប្រកួតគារពារខ្សែក្រវាត់របស់ខ្លួនជាមួយ Alvarez ណាស់ ប្រសិនបើអ្នកផ្គូផ្គងនៅ ONE រៀបចំឲ្យជួបគ្នា។
Lee បាននិយាយថា ៖«អ្វីក៏ដោយ ការប្រកួតដែលពួកគេដាក់ឲ្យខ្ញុំ គឺខ្ញុំតែងតែទទួលយក។ ខ្ញុំពិតជាមើលមិនឃើញទេថា តើសមហេតុផលទេដែលវ៉ៃជាមួយ Eddie។ ប៉ុន្តែជាថ្មីម្តងទៀត បើក្រុមហ៊ុនរៀបចំឲ្យកើតឡើង ខ្ញុំមិនប្រកែកទេ»៕