ក្រុមជម្រើសជាតិអេស្ប៉ាញហាក់ដូចជាយ៉ាប់បន្តិចហើយនៅមុនព្រឹត្តិការណ៍ Euro នេះ បន្ទាប់ពីរកឃើញខ្សែការពារម្នាក់ទៀតឆ្លងកូវីដ១៩ដែរហើយ។
កាលពី២ថ្ងៃមុន ប្រធានក្រុម Busquets ត្រូវបានរកឃើញថាឆ្លងកូវីដ១៩ ដែលតម្រូវឱ្យនៅដោយឡែកព្យាយបាលសិន។ ខណៈដែលថ្ងៃនេះស្រាប់តែខ្សែការពារ Llorente ក៏ត្រូវបានរកឃើញថាឆ្លងកូវីដ១៩ម្នាក់ទៀតផងដែរ។ ការរកឃើញសមាជិកក្រុមបន្ដឆ្លងនេះ នឹងធ្វើឱ្យអេស្ប៉ាញត្រូវដាក់កីឡាករដទៃទៀតនៅដោយឡែកសិនផងដែរ។
អ្វីដែលកាន់តែបារម្ភនោះគឺការប្រកួតព្រឹត្តិការណ៍ Euro កាន់តែកៀកមកដល់ហើយ។ នៅថ្ងៃចន្ទសប្ដាហ៍ក្រោយ អេស្ប៉ាញនឹងត្រូវប្រកួតហើយ។ ដោយការបើកឆាករបស់ពួកគេ នឹងប៉ះជាមួយក្រុមជម្រើសជាតិស៊ុយអែត។ កីឡាករយុវជនជាច្រើននាក់ត្រូវកោះហៅហ្វឹកហាត់បន្ថែមទៀត បន្ទាប់ពីសមាជិកក្រុមធំបានឆ្លងកូវីដជាបន្ដបន្ទាប់នេះ៕ប្រភព Goal
