ក្លឹបធំៗដូចជា Man Utd, Man City និង Chelsea លេចលឺថាអាចចាយដល់ច្រើនជាង ១០០ លានផោន លើទីផ្សារដោះដូររដូវក្តៅខាងមុខ តែសម្រាប់ Liverpool ហាក់ស្តួចស្តើងជាងគេ ដោយតាមរបាយការណ៍ចុងក្រោយចុះផ្សាយថាលោក Jurgen Klopp អាចមានសិទ្ធចំណាយត្រឹម ៥០ លានផោនប៉ុណ្ណោះ។
នេះមានន័យថា ក្លឹបនឹងមិនអាចចំណាយលើការនាំយកកីឡាករធំៗដូចជា Erling Haaland ឬ Jadon Sancho អ្វីនោះទេ ពោលត្រឹមបានបណ្តុំយុវជន ឬកីឡាករកៀកផុតកុងត្រាតម្លៃទាបណាមួយប៉ុណ្ណោះ។ នេះបើតាម ESPN បានចុះផ្សាយ។
យ៉ាងណាក្រៅពីការចំណាយនេះហើយ លោក Klopp ក៏នឹងលក់ចេញកីឡាករមួយចំនួនចេញពីក្លឹប ដូចជា Naby Keita, Xherdan Shaqiri និង Divock Origi ដែលពួកគេលែងសំខាន់តទៅទៀតហើយ។ ស្របពេលដែល Mohamed Salah ក៏លេចលឺពាក្យថាក្លឹបអាចលក់ចេញដែរ តែពិបាករកក្លឹបដែលហ៊ានចំណាយលើតម្លៃផ្ទេររបស់គេ
គួររំឭកថា Liverpool បានព្យាយាមពង្រឹងតំបន់ការពារឥតឈប់ឈរនៅរយៈពេលចុងក្រោយ បន្ទាប់ពីឃើញបញ្ហាដែលកើតមាននៅ រដូវកាល ២០២០/២១ ក្រោយពេល Virgil van Dijk និង Joel Matip ដែលជាជញ្ជាំងសំខាន់បានរបួសជាបន្តបន្ទាប់រយៈពេលយូរ៕