ថ្មីៗនេះប្រធានក្លឹប Paris Saint-Germain លោក Nasser Al-Khelaifi បានបញ្ជាក់ចំៗពីអនាគតរបស់ Kylian Mbappe និង Neymar Jr ថាពួកគេសុទ្ធសឹងតែបន្តឈរជើងឲ្យក្លឹបបារាំងតទៅទៀត ពោលគឺគ្មានការចាកចេញអ្វីនោះឡើយ ដ្បិតបើមានចចាមអារ៉ាមផ្ទុះជាហែហូរក៏ដោយ។
Neymar គេក៏ទើបតែបន្តកុងត្រាថ្មីនៅក្លឹប PSG ដល់ឆ្នាំ ២០២៥ ដែលនេះនាំឲ្យចចាមអារ៉ាមនៃការចាកចេញត្រូវកាត់ផ្តាច់ត្រឹមប៉ុណ្ណឹង។ យ៉ាងណាតាមការបញ្ជាក់របស់លោក Al-Khelaifi ប្រាប់ទៅកាន់ L’Equipe និយាយថា៖ “Barcelona ព្យាយាមណាស់ក្នុងការចុះហត្ថលេខានាំយក Neymar តែសំខាន់ពួកយើងបានបដិសេធសំណើពួកគេ”។
លោកបន្ថែម៖ “ខ្ញុំគិតថាក្លឹប [Barcelona] បានជួបវិបត្តិហិរញ្ញវត្ថុ តែវាមិនមែនជារឿងរបស់យើងនោះទេ ដោយខ្ញុំមិនលាក់បាំងទេ គឺ Barcelona តែងតែនៅស្រលាញ់ Neymar ដដែល គ្រាន់តែ Neymar ផ្ទាល់ក៏គេមិនចង់ទៅទីនោះដែរ ដ្បិតគេមិនទាន់អាចសម្របខ្លួនបានល្អទៅនឹងការលេងឲ្យ PSG ក៏ដោយ ហើយបើអ្នកសួរគេពេលនេះ គេប្រាកដជានិយាយថាគេកំពុងសប្បាយរីករាយជាមួយ PSG”៕
ប្រភព៖ Marca