រុះរើ​អ្នក​ចាស់​ចោល​ហើយ! នេះ​ឈុត ១១ រូប​រដូវ​កាល​ថ្មី បើ Barcelona យក​បាន ២ រូប​នេះ​ទៀត

មុន​ឈាន​ចូល​រដូវ​កាល ២០២១/២២ ក្លឹប FC Barcelona បាន​នឹង​កំពុង​រុះរើ​រៀបចំ​សារ​ឡើង​វិញ សឹង​គ្រប់​តំណែង​ទាំង​អស់​លើ​ទីលាន ដើម្បី​អាច​ធានា​បាន​ថា​នៅ​រដូវ​កាល​ក្រោយ​ក្លឹប​នឹង​មាន​ទឹក​មាត់​លេប​ខ្លះ​នៅ​ការ​ប្រជែង​ពាន​រង្វាន់​ធំៗ កុំ​ឲ្យ​ដូច​រដូវ​កាល​នេះ​ទៀត។

អ្នក​មាន​បុណ្យ​អាច​នឹង​នាំ​យក​កីឡាករ​ថ្មី​ចូល​ក្រុម​យ៉ាង​ហោច​ណាស់ ៥ រូប ហើយ​ក៏​គ្រោង​លក់​ចេញ​ទៅ​​វិញ​ប្រហែល​គ្នា​នោះ​ដែរ។ កីឡាករ​ធំៗ​ដែល Barcelona ចង់​វ៉ៃ​ចេញ​មាន​ដូច​ជា ខ្សែ​ប្រយុទ្ធ Antoine Griezmann, Martin Braithwaite ខ្សែ​បម្រើ Miralem Pjanic, Philippe Coutinho និង​ខ្សែ​ការពារ Samuel Umtiti។ យ៉ាង​ណា​ចំណូល​ថ្មី ៣ រូប​ដែល​ក្លឹប​ទើប​តែ​យក​បាន ក៏​ទំនង​ជា​មក​បំពេញ​ចន្លោះ​ទាំង​អស់​នោះ​ដែរ តួ​យ៉ាង​ខ្សែ​ប្រយុទ្ធ Sergio Aguero និង​ខ្សែ​ការពារ​ Eric Garcia ក៏​ដូច​ជា Emerson Royal។

​ក្រោម​ការ​ដឹកនាំ​របស់​លោក Ronald Koeman ដែល​ប្រធាន​ក្លឹប​ទើប​តែ​ធានា​ពី​ការ​ឈរ​ជើង​នៅ​រដូវ​កាល​ក្រោយ នោះ​ Barcelona អាច​ជា​ប្រើប្រាស់​កីឡាករ​ទាំង ៣ ទៅ​ក្នុង​ឈុត ១១ រូប​ល្អ​បំផុត​ដូច​ខាង​ក្រោម៖

ឈុត ១១ រូប: Ter Stegen, Alba, Araujo, Garcia, Emerson, Busquets, De Jong, Pedri, Fati, Messi, Aguero.

ប៉ុន្តែ​ប្រសិន​អាច​យក​បាន ដូច​ការ​គ្រោង​ទុក​នៅ​តំណែង ២ ផ្សេង​ទៀត មាន​ខ្សែ​បម្រើ Georginio Wijnaldum និង​ខ្សែ​ប្រយុទ្ធ Memphis Depay នោះ​ឈុត ១១ រូប​រដូវ​កាល​ថ្មី ប្រហែល​អាច​ជា​រៀប​ចេញ​មក​បែប​នេះ៖ Ter Stegen, Alba, Araujo, Garcia, Emerson, De Jong, Wijnaldum, Pedri, Depay, Messi, Aguero.

យ៉ាង​ណា​យើង​ក៏​មិន​ច្បាស់​នោះ​ដែរ​ថា Barcelona អាច​យក​បាន Depay និង Wijnaldum ឬ​អត់ ព្រោះ​បើ​ទោះ​បី​ជា​កីឡាករ​ទាំង​ពីរ​មាន​សញ្ជាតិ​ហូឡង់ អាច​នឹង​សម្រប​ខ្លួន​ឆាប់​រហ័ស​ក្រោម​ការ​ដឹកនាំ​របស់​លោក Ronald Koeman ក៏​ដោយ តែ​ថ្មីៗ​នេះ​លេចលឺ​ថា​មាន​ក្លឹប​ធំៗ ​កំពុង​ចង់​កាត់​មុខ Barcelona លើ​ការ​នាំ​យក​ពួក​គេ។ ជាក់ស្តែង​ដូច​ជា PSG កាន់​តែ​កៀក​ជិត​លើ​ការ​នាំ​យក Wijnaldum មក​ទីក្រុង​ប៉ារីស ហើយ Depay ក៏​មិន​ទាន់​សម្រេច​ចិត្ត​ច្បាស់លាស់​ដែរ​ថា​នឹង​មក​ Camp Nou ឬ​អត់ ព្រោះ​តំណែង​ចម្បង​របស់​គេ គឺ​ប្រយុទ្ធ​កណ្តាល​ត្រូវ​បាន​បំពេញ​ដោយ Aguero ទៅ​ហើយ។

ដោយឡែក​ពាក់ព័ន្ធ​នឹង​អនាគត​របស់ Lionel Messi ដ្បិត​លោក​មិន​ទាន់​សម្រេច​ថា​នឹង​បន្ត​នៅ​ឬ​ចាកចេញ តែ​តាម​ស្ថានការណ៍​ចុង​ក្រោយ​គឺ​ប្រហែល​ជា​មាន​ចម្លើយ​វិជ្ជមាន​ច្រើន​ជាង​អវិជ្ជមាន នោះ​គឺ​លឺ​ដំណឹង​ថា កីឡាករ​អាហ្សង់ទីន​ព្រម​បន្ត​កុងត្រា​រយៈ​ពេល ២ ឆ្នាំ​ទៀត​នៅ​ទឹកដី Camp Nou មុន​ផ្ទេរ​ទៅ​លេង​ឲ្យ​ក្លឹប​នៅ​អាមេរិក Inter Miami រយៈ​ពេល ២ ឆ្នាំ​បន្ថែម ហើយ​ត្រលប់​មក​អេស្ប៉ាញ​វិញ ដើម្បី​ចូលរួម​ជា​ឯកអគ្គរដ្ឋទូត​ឬ​មុខ​តំណែង​ជា​ដៃ​គូ​សហការ​ណា​មួយ លើ​កុងត្រា​រយៈ​ពេល ១០ ឆ្នាំ​ពេញ​ជាមួយ​ក្លឹប Barcelona៕

ភ្ជាប់ទំនាក់ទំនងជាមួយ CTS SPORT