ក្នុងចំណោមក្រុមទាំង ២៤ ដែលមានកៅអីនៅការប្រកួតផ្លូវការ Euro 2020 តើអ្នកគិតថាក្រុមណាមួយ ដែលមានសង្ឃឹមខ្ពស់អាចឈ្នះពានរង្វាន់សារនេះ?
ជឿថាមតិពីអ្នកគាំទ្រប្រាកដជាទស្សន៍ទាយផ្អែកទៅតាមឈ្មោះក្រុមដែលខ្លួនស្រលាញ់ និងខ្លះទៅមើលតាមចំណាត់ថ្នាក់ FIFA Ranking ហើយប្រាកដជារំពឹងច្រើនទៅលើក្រុមជម្រើសជាតិបែលហ្សិក។ ជាការពិតបាល់មូល គឺមើលមិនឃើញមុននោះទេ ពេលខ្លះក្រុមកម្រិតមធ្យមដែលយើងនឹកស្មានមិនដល់ ឡើងមកលោងក្រុមខ្លាំងម្ដងម្កាលក៏មាន ហើយក្រុមខ្លាំងខ្លះកុំថាឡើយត្រឹមកៅអីវគ្គ ១៦ ក្រុមក៏ឡើងមិនដល់ផង។
យ៉ាងណាតាមការព្យាករណ៍ពីប្រភពគេហទំព័រ TheAnalyst ដែលយើងលើកមកចែករំលែកក្នុងអត្ថបទនេះ គ្រាន់តែជាចំណែកមួយដែលពួកគេប្រើប្រាស់ Stats Perfome AI ក្នុងការវិភាគនិងវាយតម្លៃភាគរយក្រុមដែលសង្ឃឹមខ្ពស់តែប៉ុណ្ណោះ ពោលក៏មិនច្បាស់ដូចគ្នាថាក្រុមណាអាចឈ្នះជើងឯកពិតប្រាកដនោះដែរ។ ក្រុមទាំង ១០ មានភាគរយខ្ពស់បំផុតអាចឈ្នះពាន Euro 2020 មានដូចខាងក្រោម៖
ក្រុមបារាំង សង្ឃឹម ២០,៥ ភាគរយ
ក្រុមបែលហ្សិក សង្ឃឹម ១៥,៧ ភាគរយ
ក្រុមអេស្ប៉ាញ សង្ឃឹម ១១,៣ ភាគរយ
ក្រុមអាល្លឺម៉ង់ សង្ឃឹម ៩,៨ ភាគរយ
ក្រុមព័រទុយហ្គាល់ សង្ឃឹម ៩,៦ ភាគរយ
ក្រុមអ៊ីតាលី សង្ឃឹម ៧,៦ ភាគរយ
ក្រុមហូឡង់ សង្ឃឹម ៥,៩ ភាគរយ
ក្រុមដាណឺម៉ាក សង្ឃឹម ៥,៤ ភាគរយ
ក្រុមអង់គ្លេស សង្ឃឹម ៥,២ ភាគរយ
ក្រុមស្វីស សង្ឃឹម ២,៣ ភាគរយ
ខណៈក្រុមដែលសង្ឃឹមទាបជាងគេបង្អស់មាន ម៉ាសេដូនីខាងជើងសង្ឃឹម ០,០២ ភាគរយ និង ស្លូវ៉ាគីសង្ឃឹម ០,០៤ ភាគរយ ខណៈស្កុតឡែននិងហុងគ្រីសង្ឃឹម ០,១ ភាគរយ។
បញ្ជាក់ថា មាន់គកបារាំងឆ្នាំនេះ នរណាក៏ចាប់អារម្មណ៍ទៅលើពួកគេខ្លាំងដែរ ជាពិសេសក្រោយការវិលត្រលប់របស់ Karim Benzema មកកាន់ជម្រើសជាតិសារជាថ្មី។ បារាំងក៏អាចនឹងក្លាយជាក្រុមទី ៤ ក្នុងលោក ដែលអាចឈ្នះពានរង្វាន់បណ្ដាក់គ្នានៅពាន FIFA World Cup និង UEFA Euro Championship ដែល ៣ លើកកន្លងមកគឺរួមមាន អាល្លឺម៉ង់ខាងលិច ឈ្នះ Euro 1972 និង World Cup 1974 , អេស្ប៉ាញឈ្នះ Euro 2008, World Cup 2010 និង Euro 2012, បារាំងឈ្នះ World Cup 1998 និង Euro 2020 ហើយបារាំងដដែលឈ្នះ World Cup 2018 និង Euro… (អេឈប់សិន មិនទាន់ហ៊ានថា មានតែរង់ចាំមើលទាំងអស់គ្នាលើទំព័រ CTS Sports)។
ដោយឡែកសម្រាប់អ្នកចាត់ការជម្រើសជាតិបារាំង លោក Didier Deschamps ក៏អាចនឹងក្លាយជាបុគ្គលទី ១ ក្នុងលោក ដែលអាចឈ្នះពាន World Cup និង Euro នាមជាកីឡាករផង និងជាអ្នកចាត់ការផង។ កាលនៅជាកីឡាករលោកឈ្នះ World Cup នៅឆ្នាំ ១៩៩៨ និង Euro នៅឆ្នាំ ២០០០ ហើយជាអ្នកចាត់ការទើបតែបានឈ្នះ World Cup នៅឆ្នាំ ២០១៨ ខណៈ Euro 2020 កំពុងរង់ចាំអុតមើល។
គួរបញ្ជាក់ថាពានរង្វាន់ UEFA Euro Championship ត្រូវបានបង្កើតឡើងនៅឆ្នាំ ១៩៥៨ ដែលគិតមកទល់ពេលនេះមានអាយុកាល ៦៣ ឆ្នាំ ដោយក្រុមឈ្នះជើងឯកច្រើនបំផុតបានទៅលើអាល្លឺម៉ង់/អេស្ប៉ាញ ឈ្នះ ៣ លើករៀងគ្នា ហើយបារាំងឈ្នះ ២ លើក និងក្រុមផ្សេងៗទៀតឈ្នះ ១ លើកមានដូចជាសហភាពសូវៀត អ៊ីតាលី សាធារណរដ្ឋឆែក ព័រទុយហ្គាល់ ហូឡង់ ដាណឺម៉ាក និងក្រិក។ ចំពោះកាលបរិច្ឆេទប្រកួតឆ្នាំ ២០២១ នេះ គឺធ្វើឡើងចាប់ពីថ្ងៃទី ១១ មិថុនា ដល់ ១១ កក្កដា ដែលមានម្ចាស់ផ្ទះចំនួន ១១ ប្រទេស ហើយបណ្ដាកីឡដ្ឋានទាំងអស់អនុញ្ញាតឲ្យមានអ្នកចូលទស្សនាតែចន្លោះពី ២០ ទៅ ៥០ ភាគរយ ផ្អែកតាមគោលការណ៍កំណត់របស់ប្រទេសនីមួយៗ៕
ប្រភព៖ TheAnalyst