ក្នុងវិស័យកីឡាបាល់ទាត់ តាមពិតទៅមកដល់ខែមិថុនាគឺមិនសូវមានការប្រកួតសំខាន់នោះទេ ហើយសម្រាប់កីឡាករក៏រមែងមានពេលវេលាសម្រាក ហើយអ្នកគាំទ្រក៏សល់ពេលឲ្យសង្សារច្រើនជាងខែផ្សេងៗដែរ។
ប៉ុន្តែនៅឆ្នាំ ២០២១ នេះ ខែមិថុនាគឺជាខែដ៏សកម្មទៅវិញសម្រាប់អ្នកគាំទ្របាល់ទាត់ ព្រោះមានព្រឹត្តិការណ៍ធំៗ ២ រួមមាន Euro នៅទ្វីបអឺរ៉ុប និង Copa America នៅទ្វីបអាមេរិកខាងត្បូង បានលើកពេលពីឆ្នាំចាស់មកធ្វើនៅឆ្នាំនេះ ហើយសម្រុកបញ្ចប់រកក្រុមឈ្នះជើងឯក ត្រឹមរយៈពេល ១ ខែពីចន្លោះខែមិថុនាដល់ខែកក្កដា។
ខាងក្រោម CTS Sports ធ្វើការសង្ខេបជុំវិញរូបមន្តនៃការប្រកួត Euro និង Copa America ក៏ដូចជាបង្ហាញកាលបរិច្ឆេទប្រកួតសំខាន់ទាំង ១០ គូ ដែលអ្នកគាំទ្រមិនគួររំលង៖
១) Euro 2020
ព្រឹត្តិការណ៍នេះ នឹងធ្វើឡើងចាប់ពីថ្ងៃទី ១១ មិថុនា ដល់ ១១ កក្កដា ឆ្នាំ ២០២១ នៅទឹកដីម្ចាស់ផ្ទះទាំង ១១ ប្រទេស។ ក្រុមដែលមានកៅអីនៅវគ្គចែកពូលសរុបមាន ២៤ ក្រុម បែងចែកជា ៦ ពូលពីពូល A ដល់ពូល F ហើយក្នុងមួយពូលគេចម្រាញ់យក ២ ក្រុមដែលឈរលេខ ១&២ តាមរយៈការប្រកួតសន្សំពិន្ទុមួយជើង ដើម្បីចាប់យកកៅអីឡើងទៅកាន់វគ្គ ១៦ ក្រុម។
ដូច្នេះមានន័យថាក្នុងចំណោមពូលទាំង ៦ នឹងមាន ១២ ក្រុម ទទួលបានកៅអីទៅកាន់វគ្គបន្ទាប់។ ចុះចំណែក ៤ កៅអីផ្សេងទៀត UEFA សម្រេចយកដោយរបៀបណា? នោះគឺប្រមូលយកក្រុមលេខ ៣ ប្រចាំពូលនីមួយៗមកជម្រុះសារជាថ្មី ហើយចាប់យក ៤ ក្រុមល្អបំផុត ដើម្បីបង្គ្រប់កៅអីវគ្គ ១៦ ក្រុម។
ការប្រកួតព្រឹត្តិការណ៍ Euro ខុសពី Champions League ដោយគ្មានការប្រកួត ២ ជើងនោះទេ ពោលគឺលេង ១ ជើងតាំងពីវគ្គដំបូង ដល់វគ្គចុងក្រោយ។ ចាប់ពីថ្ងៃទី ២៦ មិថុនាតទៅ ការប្រកួតវគ្គ ១៦ ក្រុមនឹងចាប់ផ្ដើម ហើយបន្តរហូតដល់ថ្ងៃទី ១១ កក្កដា ដែលជាវគ្គផ្ដាច់ព្រ័ត្រ នឹងមានការប្រកួតនៅឯកីឡដ្ឋានក្នុងទីក្រុងឡុងដុង ដើម្បីសម្រេចយកក្រុមឈ្នះជើងឯក។
យើងបង្ហាញកាលបរិច្ឆេទប្រកួតសំខាន់ៗទាំង ៦ នៅ Euro 2020៖
- អង់គ្លេស ប៉ះ ក្រូអាត វេលាម៉ោង ០៨:០០ នាទីយប់ ថ្ងៃអាទិត្យ ទី ១៣ មិថុនា
- បារាំង ប៉ះ អាល្លឺម៉ង់ វេលាម៉ោង ០២:០០ នាទីរំលងអាធ្រាត្រ ថ្ងៃពុធទី ១៦ មិថុនា
- ព័រទុយហ្គាល់ ប៉ះ អាល្លឺម៉ង់ វេលាម៉ោង ១១:០០ នាទីយប់ ថ្ងៃសៅរ៍ ទី ១៩ មិថុនា
- អេស្ប៉ាញ ប៉ះ ប៉ូឡូញ វេលាម៉ោង ០២:០០ នាទីរំលងអាធ្រាត្រ ថ្ងៃអាទិត្យ ទី ២០ មិថុនា
- អ៊ីតាលី ប៉ះ វែល វេលាម៉ោង ១១:០០ នាទីយប់ ថ្ងៃអាទិត្យ ទី ២០ មិថុនា
- ព័រទុយហ្គាល់ ប៉ះ បារាំង វេលាម៉ោង ០២:០០ នាទីរំលអាធ្រាត្រ ថ្ងៃព្រហស្បតិ៍ ទី ២៤ មិថុនា
២) Copa America 2020
ព្រឹត្តិការណ៍នេះនឹងធ្វើឡើងចាប់ពីថ្ងៃទី ១៣ មិថុនា ដល់ ១០ កក្កដា ដោយមានក្រុមចំនួន ១០ ហើយមានម្ចាស់ផ្ទះចំនួន ៤ ប្រទេស។
ការប្រកួតនេះរៀបចំដោយសហព័ន្ធបាល់ទាត់ប្រចាំតំបន់អាមេរិកខាងត្បូង CONMEBOL ដោយមានការបែងចែកជា ២ Zone ក្នុង ១ Zone មាន ៥ ក្រុម។ ទី ១) North Zone មានប្រេស៊ីល, កូឡុំប៊ី, អេក្វាឌ័រ, ប៉េរូ និងវេណេហ្ស៊ុយអេឡា ហើយទី ២) South Zone មានអាហ្សង់ទីន, បូលីវី, ឈីលី, ប៉ារ៉ាហ្គាយ និងអ៊ុយរុយហ្គាយ។
ក្រុមនៅ Zone នីមួយៗនឹងប្រកួតតតាំងគ្នា ដើម្បីយកក្រុមដែលមានពិន្ទុខ្ពស់បំផុតទាំង ៤ ឆ្ពោះទៅកាន់វគ្គ Knockout ៨ ក្រុមចុងក្រោយ ដែលនឹងធ្វើឡើងនៅថ្ងៃទី ២/៣ កក្កដា ហើយប្រកួតមួយជើងយកចាញ់ឈ្នះ ជម្រុះរហូតមកដល់វគ្គផ្ដាច់ព្រ័ត្រ ដែលនឹងធ្វើឡើងក្នុងកីឡដ្ឋាន Rio de Janeiro ប្រទេសប្រេស៊ីលនាថ្ងៃទី ១០ កក្កដា ឆ្នាំ ២០២១។
យើងបង្ហាញកាលបរិច្ឆេទប្រកួតសំខាន់ៗទាំង ៦ នៅ Copa America 2020៖
- អាហ្សង់ទីន ប៉ះ ឈីលី វេលាម៉ោង ០៤:០០ នាទីទាបភ្លឺ ថ្ងៃអង្គារ៍ ទី ១៥ មិថុនា
- ប្រេស៊ីល ប៉ះ ប៉េរូ វេលាម៉ោង ០៧:០០ នាទីព្រឹក ថ្ងៃសុក្រ ទី ១៨ មិថុនា
- អាហ្សង់ទីន ប៉ះ អ៊ុយរុយហ្គាយ វេលាម៉ោង ០៧:០០ នាទីព្រឹក ថ្ងៃសៅរ៍ ទី ១៩ មិថុនា
- ប្រេស៊ីល ប៉ះ កូឡុំប៊ី វេលាម៉ោង ០៧:០០ នាទីព្រឹក ថ្ងៃព្រហស្បតិ៍ ទី ២៤ មិថុនា