ព្រឹត្តិការណ៍ ONE: FULL BLAST II មានតារាទម្ងន់ flyweight ខ្លាំងៗនឹងឡើងសង្វៀនក្នុងការប្រកួតមួយថៃ ONE Super Series ។គូឯកនៅព្រឹត្តិការណ៍នាថ្ងៃសុក្រទី ១១ ខែ ឧសភា ជាជំនួបរវាងជើងខ្លាំង Mongkolpetch Petchyindee Academy ប៉ះកីឡាករលំដាប់ទី៤Elias “The Sniper” Mahmoudi ហើយអ្នកទាំងពីរសុទ្ធតែស្វែងរកកៅអីទៅដណ្ដើមខ្សែក្រវាត់ពិភពលោកនាពេលខាងមុខ។
លើសពីនេះទៅទៀត បើសិនអ្នកណាអាចបញ្ចប់គូប្រកួតបាន ពួកគេកាន់តែស្ថិតនៅក្នុងបញ្ជីនៅសង្វៀន ONE Super Series ទម្ងន់ flyweight ឃីកបុកសីង និង មួយថៃ មិនខាន។
មុនពេល Mongkolpetch ជួប Mahmoudi សូមក្រឡេកមើលការប្រកួតផ្ដួលគូប្រកួតឲ្យសន្លប់ ៥នាក់នៅទម្ងន់ flyweight នៅកម្មវិធី ONE Super Series។
#1 Rodtang បញ្ចប់ Haggerty ដោយការវ៉ៃដងខ្លួន
កាលខែ មករា ឆ្នាំ ២០២០ ម្ចាស់ខ្សែក្រវាត់មួយថៃ ONE Flyweight កីឡាករ Rodtang “The Iron Man” Jitmuangnon បានជួបគូសត្រូវចាស់ Jonathan “The General” Haggerty ក្នុងជំនួបសងសឹក។
តារាទម្ងន់ flyweights ទាំងពីរប៉ះគ្នានៅសង្វៀន ONE: A NEW TOMORROW នាក្រុងបាងកក ខណៈ Haggerty ព្យាយាមយកខ្សែក្រវាត់ត្រលប់ពី Rodtang វិញក្រោយរបូតកាលពី ៤ ខែមុន។ យ៉ាងណាក្ដី “The Iron Man” ចង់បង្ហាញថាគេជាស្ដេចក្នុងទម្ងន់នេះ។
ការប្រកួតដ៏ឃគ្លើនតាំងពីទឹកទី១ ដែល Rodtang ដើរចូលជាទម្លាប់ទៅហើយ។ ចូលទឹកទី២ Rodtang ដើរសំដៅលឿនៗដើម្បីវ៉ៃក្បាលពោះ Haggerty ។ ការប្រកួតរង់ចាំដល់ទឹកទី៣ ដែលជើងខ្លាំងថៃវ៉ៃក្បាលពោះឲ្យកីឡាករមកពីចក្រភពអង់គ្លេសដួល ៣ដង និងងើបលែងរួចត្រឹមទឹកនេះតែម្ដង។
#2 Ennahachi ឆក់បានខ្សែក្រវាត់ពី Petchdam
មិនមានកីឡាករច្រើនទេដែលបង្ហាញខ្លួនដំបូង ប៉ុន្តែឈ្នះខ្សែក្រវាត់នោះ។ ប៉ុន្តែតារា ONE Super Series ចំនូលថ្មី Ilias Ennahachi អាចធ្វើបានដោយដណ្ដើមខ្សែក្រវាត់ ONE Flyweight Kickboxing World Champion ពី Petchdam “The Baby Shark” Petchyindee Academy កាលខែ សីហា ឆ្នាំ ២០១៩។
ខ្សែក្រវាត់នោះ ជាប់ខ្លួនរបស់ Petchdam ក្រោយផ្ដួល Mahmoudi ពេលខ្សែក្រវាត់សម្ពោធដាក់ឲ្យដណ្ដើមលើកដំបូង និងចង់បន្តគ្រងខ្សែក្រវាត់បន្តទៀតឲ្យបានយូរ។ យ៉ាងណាក្ដី Ennahachi បានបញ្ចប់តារាថៃនៅមុខអ្នកគាំទ្រម្ចាស់ផ្ទះនៅព្រឹត្តិការណ៍ ONE: DREAMS OF GOLD។
ការផ្ដួលឲ្យសន្លប់ បានកើតឡើងនៅទឹកទី៣ បន្ទាប់ពីកីឡាករហូឡង់-ម៉ារ៉ុក ធ្វើឲ្យ Petchdam ដួលទៅក្ដាររេញដោយកណ្ដាប់ដៃឆ្វេងខ្លាំងៗជាច្រើន។ “The Baby Shark” ត្រូវបានរាប់ដល់ ៨ ប៉ុន្តែ មិនអាចឈរនឹងឡើយ។ មិនយូរទេ Ennahachi ចូលសម្រុកមួយប្រាវទៀតធ្វើឲ្យ Petchdam ដួលមិនអាចតដៃបាន។
#3 ‘Momotoro’ បង្កើតប្រវត្តិសាស្ត្រផ្ដួលវីរបុរសថៃឲ្យសន្លប់
អ្នកជំនាញប្រយុទ្ធជប៉ុន Kohei “Momotaro” Kodera បានបំបែកកំណត់ត្រាមួយថៃក្នុងទម្ងន់ flyweight ទល់នឹងជើងឯក Lumpinee Stadium និង ជើងឯក WMC Muay Thai World Champion កីឡាករ Singtongnoi Por Telakun ដោយប្រើពេលត្រឹម ៤១ វិនាទីប៉ុណ្ណោះដែលផ្ដួលដៃគូឲ្យសន្លប់ និងក្លាយជាការផ្ដួលឲ្យសន្លប់លឿនបំផុតនៅសង្វៀន ONE Super Series ជាប្រវត្តិសាស្ត្រ។
ការផ្ដួលឲ្យសន្លប់ជាប្រវត្តិសាស្ត្រនេះកើតឡើងនៅសង្វៀន ONE: IMMORTAL TRIUMPH អំឡុងពេលខែ កញ្ញា ឆ្នាំ ២០១៩ ដែលនាំឲ្យរូបគេកើនលំដាប់ថ្នាក់ទម្ងន់ flyweight ។
គ្រាន់តែកណ្ដឹងរោទ៍ភ្លាម “Momotaro” បានហក់ចូលដើម្បីបញ្ចប់ដៃគូតែម្ដងដោយប្រើកណ្ដាប់ដៃយ៉ាងច្រើន, កែង, និង ជង្គង់ទៀតផងដើម្បីផ្ដួលគូប្រកួត។
តាំងពីពេលនោះមក បុរសដែលអាចបំបែកកំណត់ត្រារបស់ “Momotaro” បាន គឺម្ចាស់ខ្សែក្រវាត់ ONE Bantamweight Kickboxing World Champion កីឡាករ Capitan Petchyindee Academy ដែលផ្ដួលដៃគូឲ្យសន្លប់ត្រឹម ៦វិនាទីប៉ុណ្ណោះពេលផ្ដួល Petchtanong Petchfurgus ក្នុងរយៈពេល ១ ឆ្នាំបន្ទាប់។
#4 Petchdam ឈ្នះដោយការទាត់ដងខ្លួនលើបុរសអូស្ត្រាលី
Petchdam បង្ហាញខ្លួនដំបូងទល់នឹង Josh “Timebomb” Tonna និងបង្ហាញឲ្យអ្នកគាំទ្រ ONE Super Series ដឹងថា គេជាអ្នកជំនាញបញ្ចប់គូប្រកួតម្នាក់។
នៅព្រឹត្តិការណ៍ ONE: PURSUIT OF POWER តារាថៃបានធ្វើឲ្យគេគ្រប់គ្នាស្គាល់កាន់តែច្បាស់។ ពួកគេទាំងពីរសុទ្ធតែចង់ដណ្ដើមខ្សែក្រវាត់ពិភពលោក និងចំណាត់ថ្នាក់ល្អ។ ពេលនោះ Petchdam ទេដែលទទួលជ័យជម្នះកាលខែកក្កដា ឆ្នាំ២០១៨។
ការបញ្ចប់ឲ្យសន្លប់ដោយកណ្ដាប់ដៃចំគំថ្គាមកើតឡើងនៅទឹកទី២ នៅពេល Tonna បោះកណ្ដាប់ដៃស្ដាំ ប៉ុន្តែ បែរជារងជង្គង់ឆ្វេងពី Petchdam ទៅវិញ។ ការទាត់យ៉ាងច្បាស់ថែមទៀតធ្វើឲ្យ Tonna កាន់តែវិលក្បុង ហើយបន្ទាប់មក កីឡាករថៃទាត់ចូលឆ្អឺងជំនី និងអុកជង្គង់ចំចង្កា ធ្វើឲ្យកីឡាករអូស្ត្រាលីចុះចាញ់តែម្ដង។
#5 Naito ធ្វើឲ្យ Serepisos ភ្ញាក់ផ្អើលយ៉ាងខ្លាំង
Taiki “Silent Sniper” Naito ចូលកម្មវិធីប្រកួតមួយថៃ ONE Super Series ទម្ងន់ flyweight ជាមួយនឹងជ័យជម្នះដ៏ល្អទល់នឹង Alexi “Phet” Serepisos កាលខែ តុលា ឆ្នាំ ២០១៩ កន្លងទៅ និងក្លាយជាកីឡាករម្នាក់គួរឲ្យចាប់អារម្មណ៍។
នៅព្រឹត្តិការណ៍ ONE: DAWN OF VALOR ប្រកួត ៣ ទឹកយ៉ាងល្អមើលទល់នឹង Serepisos ដែលព្យាយាមប្រយុទ្ធដោយប្រើកណ្ដាប់ដៃ និងជង្គង់ផង។ បែបណាក្ដី “Silent Sniper” ពិតជាមិនអាចប្រកែកបាន ព្រោះគេបានទទួលជ័យជម្នះ ៣ លើកជាប់គ្នានៅសង្វៀន ONE Super Series។
ក្រោយការប្រកួត ២ ទឹកពេញ Naito បានប្រើកណ្ដាប់ដៃខ្លាំងវ៉ៃលើ Serepisos នៅទឹកទី២។ “Phet” ងើបឈរដើម្បីប្រកួតបន្ត ប៉ុន្តែ រងការឈឺចាប់រួចទៅហើយ។ Naito ដើរចូលដោយប្រើកណ្ដាប់ដៃ និងផ្ដួលដៃគូឲ្យសន្លប់ពេលសល់ ១៥ វិនាទីមុនចប់ទឹកចុងក្រោយ។