Kylian Mbappe កំពុងស្ថិតក្នុងចចាមអារ៉ាមនៃការផ្ទេរទៅចូលរួមជាមួយក្លឹបយក្សអេស្ប៉ាញ Real Madrid នៅរដូវក្តៅខាងមុខ តែមិនទាន់ច្បាស់ថាគេព្រមទៅចូលរួមនៅទីនោះឬបន្តឈរជើងឲ្យក្លឹបបារាំង PSG នៅឡើយ។
យ៉ាងណារំឭកមករឿងចាស់កាលពីគេនៅអាយុ ១៤ ឆ្នាំ Mbappe ក៏គេមានឱកាសមកហ្វឹកហាត់នៅក្លឹប Real Madrid និងបណ្តុះបណ្តាលខ្លួនឯងនៅទីនោះដែរ តែគេបដិសេធហើយបន្តឈរជើងនៅទ្រនំថ្នាលនៃក្លឹបក្នុងប្រទេសបារាំង រហូតមានឈ្មោះបោះសំឡេងទល់សព្វថ្ងៃ។
ប្រាប់ពីហេតុផលដែលគេច្រានចោលសំណើផ្ទេរមក Real កាលពីជិត ១០ ឆ្នាំមុននោះ គឺដោយសារគេមិនចង់ផ្លាស់ប្តូរវប្បធម៌និងទម្លាប់នៃការរស់នៅលឿនពេក កុំថាឡើយទោះមាន Zinedine Zidane ក៏គេមិនសម្រេចចិត្តទៅដែរ។
ប្រាប់ Diario AS បុរសវ័យ ២២ ឆ្នាំនិយាយ៖ “ឪពុកម្តាយខ្ញុំចង់ឲ្យខ្ញុំចាប់អាជីពនៅបារាំង ចង់ឲ្យមានចំណេះដឹងនៅបារាំងនិងក្នុងវិស័យបាល់ទាត់ដូចគ្នា ហើយការដែលទៅអេស្ប៉ាញទោះមាន Zidane ក៏វានៅតែជាប្រទេសផ្សេងពីប្រទេសរបស់យើង និងវប្បធម៌ផ្សេងគ្នា ហើយឥឡូវពេលនេះ Zidane ក៏លែងឈរជើងនៅ Madrid ស្របពេលដែលលោក Ancelotti បានមកក្លាយជាអ្នកចាត់ការថ្មី”៕
ប្រភព៖ Football-Espana