Steven Gerrard គិតថាក្រុម Real Madrid នឹងទទួលបានមេរៀនឈឺចាប់ប្រសិនបើពួកគេប៉ះជាមួយក្រុម Liverpool នាវគ្គផ្ដាច់ព្រ័ត្រពានរង្វាន់ UEFA Champions League ។
ក្រុមអធិរាជស បានកក់សំបុត្រយន្ដហោះទៅវគ្គផ្ដាច់ព្រ័ត្រហើយ ក្រោយទីទម្លាក់ក្រុម Bayern Munich កាលពីយប់មិញ។ ជាមួយគ្នានេះដែរ ពួកគេនឹងត្រូវប៉ះក្រុមមួយក្នុងចំណោម២គឺ Liverpool និង Roma ដែលប្រកួតគ្នានារាត្រីនេះ។ ភាគរយខ្ពស់បានទៅលើ Liverpool ដែលពួកគេបានយកឈ្នះ Roma ៥-២ កាលពីជើងទី១កន្លងទៅហើយ។
វីរបុរសរបស់ក្រុមហង្សក្រហម Steven Gerrard បានចេញមុខមកអះអាងថា វគ្គផ្ដាច់ព្រ័ត្រនឹងកាន់តែល្អមើល បើ Liverpool អាចឡើងទៅប៉ះ Real Madrid បាន។ មួយវិញទៀត វាក៏ជាឱកាសដែលក្រុម Liverpool អាចផ្ដល់មេរៀនដល់ក្រុមការពារតំណែងជើងឯកមួយនេះដែរ ព្រោះថាពួកគេគ្រងជើងឯកនេះ២ឆ្នាំជាប់គ្នាមកហើយ។
Gerrard បានបន្ដទៀតថា Real Madrid នាឆ្នាំនេះមិនល្អដូច Real Madrid កាលពីឆ្នាំមុនឡើយ ហើយ Liverpool នេះឯងដែលជាក្រុមនឹងធ្វើឱ្យពួកគេឈឺចាប់នៅ Champions League វគ្គផ្ដាច់ព្រ័ត្រ។ នេះអាចជាឆ្នាំរបស់ Liverpool ដែលត្រលប់ទៅរកពានរង្វាន់វិញហើយ ក្រោយពីខកខានច្រើនឆ្នាំ។
ក្រុម Real Madrid ជាក្រុមជោគជ័យខ្លាំងបំផុតក្នុងពានរង្វាន់ UEFA Champions League ដោយឈ្នះបាន១២ពានរង្វាន់ទៅហើយ។ ស្របពេល Liverpool វិញ ជាក្រុមជោគជ័យជាងគេក្នុងពានរង្វាន់នេះ នៅអង់គ្លេស ដោយឈ្នះបាន៥ដង៕