សហព័ន្ធបាល់ទាត់អាមេរិកខាងត្បូងបានប្រកាសយកប្រទេសប្រេស៊ីល ធ្វើជាម្ចាស់ផ្ទះព្រឹត្តិការណ៍ Copa America ដែលនឹងឈានចូលមកដល់នៅថ្ងៃទី ១៣ខែមិថុនាឆ្នាំ២០២១ខាងមុខនេះហើយ។
ការប្រកួតនេះដែរ ដំបូងឡើយត្រូវធ្វើឡើងនៅប្រទេសអាហ្សង់ទីន និងកូឡុំប៊ីទេ ប៉ុន្តែដោយសារកូវីដ១៩ ប្រទេស២នេះបានបោះបង់ឱកាសធ្វើជាម្ចាស់ផ្ទះនេះវិញ។ សហព័ន្ធបាល់ទាត់អាមេរិកខាងត្បូង ក៏ស្វះស្វែងដើម្បីរកប្រទេសមកធ្វើជាម្ចាស់ផ្ទះជំនួស ខណៈដែលពេលវេលានៃការប្រកួតកាន់តែកៀកមកដល់មែនទែនទៅហើយ។
ក្រោយពីចរចាជាមួយប្រេស៊ីល ប្រទេសនេះក៏សម្រេចចិត្តទទួលយកដំណើរធ្វើជាម្ចាស់ផ្ទះនេះ។ ខណៈដែលពួកគេក៏ស្ថិតក្នុងការរាតត្បាតកូវីដ១៩ខ្លាំងដែរ តែសហព័ន្ធបាល់ទាត់ប្រេស៊ីលជឿថាពួកគេអាចគ្រប់គ្រងនិងរៀបចំការប្រកួតបានដោយរលូនទៅមុខ។
រំលឹកថាប្រេស៊ីល ជាប្រទេសទី៣នៅលើលោកនេះ ដែលមានចំនួនឆ្លងកូវីដ១៩ច្រើនជាងគេ។ ដោយពេលនេះមាន១៦លាននាក់ជាងហើយដែលបានឆ្លង ស្លាប់ជិត៥០ម៉ឺននាក់ និងក្នុងមួយថ្ងៃឆ្លងជាច្រើនម៉ឺននាក់៕ប្រភព Goal
