រដូវកាល ២០២០/២១ រាប់បានថា ជារដូវកាលដ៏ជក់ចិត្តមួយនៅរយៈពេលជាង ១ ទសវត្សចុងក្រោយនេះ។ ដ្បិតបើបណ្ដាកីឡាករទាំងអស់ ត្រូវរស់នៅក្នុងបរិបទថ្មីនៃការរាតត្បាតជំងឺ COVID-19 ដែលទាមទារឲ្យមានការប្រយ័ត្នខ្ពស់ជាងមុន និងប្រឈមហានិភ័យនៃការខកខានឈរជើងលើទីលានច្រើនជាងមុន តែក្រុមខ្លះក៏នៅតែបង្ហាញផ្លែផ្កាជោគជ័យគួរឲ្យកត់សម្គាល់។
នៅ Premier League និង Bundesliga អាចថាមិនជាពិបាកប៉ុន្មាននោះទេ សម្រាប់ក្រុមដែលបានឈ្នះពាននៅរដូវកាលនេះ ផ្ទុយទៅវិញបើទៅមើលក្របខ័ណ្ឌ ៣ ផ្សេងទៀតនៅលីគកំពូល និងពានរង្វាន់មួយចំនួនផ្សេងទៀតនៅតំបន់អឺរ៉ុប គឺបានកើតឡើងនៅលទ្ធផលដ៏អស្ចារ្យ ដែលយើងនឹកគិតមិនដល់ពេលបើករដូវកាលដំបូង។
តទៅនេះ CTS Sports ធ្វើការបង្ហាញពានរង្វាន់ចំនួន ៧ នៅអឺរ៉ុបរដូវកាល ២០២០/២១ ដែលក្រុមនីមួយៗត្រូវការពេលលើសពី ៦ ឆ្នាំដើម្បីឈ្នះ ហើយមានក្រុមមួយធ្វើបានជាលើកដំបូងក្នុងប្រវត្តិសាស្ត្រ៖
១) ពាន La Liga
Atletico Madrid ប៊ិះតែរបូតឱកាសពាន ឲ្យទៅ Real Madrid នៅប្រកួតជុំចុងក្រោយ ដោយសរុប ៣៨ ប្រកួតក្រុមដឹកនាំដោយលោក Diego Simeon នាំមុខទៅលើក្រុមដឹកនាំដោយលោក Zinedine Zidane តែ ២ ពិន្ទុប៉ុណ្ណោះ។ មុនឈ្នះពានរង្វាន់សារនេះ លើកចុងក្រោយបង្អស់ដែល At ឈ្នះពាន La Liga គឺនៅឆ្នាំ ២០១៤ ពោលគឺមានរយៈពេល ៧ ឆ្នាំមកហើយ។
២) ពាន UEFA Champions League
Man City ប៊ិះតែនឹងបានស្គាល់រសជាតិឈ្នះពាន UCL ជាលើកដំបូង តែចុងក្រោយពួកគេធ្លាក់ក្នុងបរាជ័យដូចតែ PSG កាលពីរដូវកាលមុនអ៊ីចឹង នោះគឺឡើងមកដល់វគ្គផ្ដាច់ព្រ័ត្រជាលើកដំបូង ហើយក៏មិនអាចឈ្នះពានលើកដំបូងដូចគ្នា។
ផ្ទុយទៅវិញលទ្ធផល ១-០ បានសមល្មមជួយឲ្យ Chelsea ឈ្នះពាន UCL រដូវកាលនេះ តែតោខៀវក៏ពួកគេចំណាយពេលយូរដែរ នោះគឺមានគម្លាត ៩ ឆ្នាំ រាប់ពីឆ្នាំ ២០១២ ទម្រាំពួកគេបានឈ្នះម្តងទៀត។
៣) ពាន Scottish Premiership
ការដឹកនាំរបស់លោក Steven Gerrard បានធ្វើឲ្យអ្នកគាំទ្របាល់ទាត់មានការភ្ញាក់ផ្អើលជាខ្លាំងនៅរដូវកាល ២០២០/២១ សម្រាប់ពានរង្វាន់លីគកំពូលស្កុតឡែន។ អតីតកីឡាករនៅ Liverpool បានដឹកនាំក្លឹប Rangers យកឈ្នះ ៣២ ស្មើ ៦ នៅ ៣៨ ប្រកួត មិនស្គាល់ពាក្យថា “ចាញ់” បានលើសពី ១០០ ពិន្ទុនៅបញ្ចប់រដូវកាល។
វាជាពានរង្វាន់ទី ៥៥ ហើយរបស់ Rangers ប៉ុន្តែពួកគេត្រូវរង់ចាំដល់ទៅ ១០ ឆ្នាំ ទម្រាំបានលើកពាន Scottish Premiership សារជាថ្មី។
៤) ពាន Ligue 1
ក្លឹប Lille បានផ្តាច់ចង្វាក់ឈ្នះពានបណ្តាក់គ្នារបស់ PSG នៅឆ្នាំ ២០២១ ដោយនៅក្របខ័ណ្ឌ Ligue 1 ក៏កាន់តែតានតឹងជាងនៅ La Liga ទៅទៀត។ ក្រុមដឹកនាំដោយលោក Christophe Galtier នាំមុខតែ ១ ពិន្ទុគត់ទៅលើក្រុមរបស់លោក Mauricio Pochettino ពោលគឺឈ្នះទាំងប្រផុតប្រផើយ។ ក្នុងប្រវត្តិសាស្ត្ររបស់ Lille ធ្លាប់ឈ្នះពាន Ligue 1 តែ ៥ លើកគត់ ដោយលើកចុងក្រោយមុនឆ្នាំ ២០២១ នេះគឺកើតឡើងនៅឆ្នាំ ២០១១។
៥) ពាន Serie A
Inter Milan ក៏ធ្វើបានល្អខ្លាំងដែរនៅ Serie A រដូវកាល ២០២០/២១ ដោយពួកគេនាំមុខដល់ទៅ ១២ ពិន្ទុធៀបនឹងក្រុមលេខ ២ AC Milan។ Inter បានបំភ័យ Juventus ដែលជាក្រុមការពារជើងឯក តាំងពីសល់ជិត ១០ ជុំចុងក្រោយ ថាពួកគេនឹងមានសង្ឃឹមអាចឈ្នះពានលីគកំពូលអ៊ីតាលីសារជាថ្មី ក្រោយខកខានរយៈពេល ១១ ឆ្នាំ។ មុនលើកពានឆ្នាំ ២០២១ កន្លងមក Inter លើកពាន Serie A ១៨ លើកហើយ ដោយលោកចុងក្រោយនៅឆ្នាំ ២០១០។
៦) ពាន Primeira Liga
ពានលីគកំពូលព័រទុយហ្គាល់ ជាទូទៅច្រើនតែធ្លាក់ក្នុងដៃរបស់ក្រុម FC Porto និង Benfica តែឆ្នាំ ២០២១ វាក៏ត្រូវបានផ្លាស់ប្តូរ ហើយធ្លាក់ទៅដល់ដៃអ្នកចាស់ដែលខានស្គាល់រសជាតិ ១៩ ឆ្នាំវិញ។
នោះគឺ Sporting CP ដែលបានក្លាយជាម្ចាស់ជើងឯកនៅរដូវកាល ២០២០/២១ ក្រោយខកខានតាំងពីរដូវកាល ២០០១/០២។
៧) ពាន Europa League
គ្រូដែលមានបទពិសោធន៍ជោកជាំ នៅតែជាគ្រូដែលអាចដឹកនាំក្រុមឲ្យឈ្នះពានបាន ដោយមិនខ្វល់ថាស្ថិតនៅក្រុមណាមួយនោះទេ។ នោះគឺជាលោក Unai Emery ដែលត្រួសត្រាយផ្លូវឲ្យក្លឹប Villarreal ស្គាល់រសជាតិឈ្នះពាន Europa League ជាលើកដំបូងក្នុងប្រវត្តិសាស្ត្រ នៅឆ្នាំ ២០២១ នេះ៕