បើនិយាយពីឈ្មោះ Neymar Jr មនុស្សជាច្រើនស្គាល់កីឡាករប្រេស៊ីលរូបនេះ តាមរយៈទេពកោសល្យដ៏ប៉ិនប្រសព្វរបស់គេលើទីលាន នោះគឺបច្ចេកទេសញាក់បាល់ និងជំនាញនៃការបញ្ចប់ទី ហើយបើនិយាយពីចំណុចគួរឲ្យចាប់អារម្មណ៍មួយនោះ គឺ Neymar ជាកីឡាករដែលមានតម្លៃផ្ទេរចេញខ្ពស់បង្អស់ក្នុងប្រវត្តិសាស្ត្របាល់ទាត់ ដែលថ្លៃដល់ទៅ ២២២ លានអឺរ៉ូនៅឆ្នាំ ២០១៧។
ប៉ុន្តែបើសួររឿងរ៉ាវរសើបផ្សេងទៀត ជឿថាមិនសូវមានអ្នកដឹងនោះទេ ដ្បិតបើអ្នកនោះជាអ្នកគាំទ្រកាន់ឆ្នាំរបស់ Neymar ម្នាក់ក៏ដោយ។ ខាងក្រោម CTS Sports ធ្វើការបង្ហាញការពិតនិងអាថ៌កំបាំង ៥ យ៉ាងអំពីកីឡាករវ័យ ២៩ ឆ្នាំ ឲ្យអ្នករាល់គ្នាបានដឹង៖
៥) គេធ្លាប់ឈ្នះពាន ដែល Messi មិនធ្លាប់បានឈ្នះ
ជាអតីតមិត្តរួមក្រុមនឹងគ្នាកាលនៅ Barcelona តែបើនិយាយអំពីពានរង្វាន់ដែលពួកគេឈ្នះ ក៏មានប្រៀបជាងគ្នាម្យ៉ាងម្នាក់ដែរ។ អាចនិយាយថា Messi ជារៀមច្បងដែលប្រលូកមុនច្រើនឆ្នាំមកហើយ ខណៈពានរង្វាន់ធំមួយដែលកីឡាករអាហ្សង់ទីនមាន ហើយ Neymar មិនមាននោះគឺ Ballon d’Or។
ប៉ុន្តែបើបញ្ច្រាសមកវិញ ពានបុគ្គលដែល Neymar មាន ហើយ Messi មិនមាន នោះគឺជាពានកីឡាកររកបានគ្រាប់បាល់ល្អបំផុត FIFA Puskas ដែលកីឡាករប្រេស៊ីលទទួលបាននៅឆ្នាំ ២០១១។ កាលនោះគឺជាគ្រាប់បាល់ដែល Neymar ធ្វើបានយ៉ាងល្អ កាលលេងឲ្យ Santos ទល់ក្រុម Flamengo នៅឯប្រទេសប្រេស៊ីល។
៤) ក្លាយជាឪពុកនៅអាយុ ១៩ ឆ្នាំ
មិនមែនថាប្រៀបធៀបរកចាញ់ឈ្នះអ្វីនោះទេ តែបើនិយាយពីការពិត រឿងមានកូននេះ គឺ Neymar មានប្រៀបជាង Messi ទៀតហើយ។ ខ្សែប្រយុទ្ធស្លាបរបស់ PSG មានកូនប្រុសឈ្មោះ Davi Lucca តាំងពីគេមានអាយុ ១៩ ឆ្នាំ ខណៈ Messi បានកូនដំបូងនៅអាយុ ២៥ ឆ្នាំឯណោះ។
ពាក់ព័ន្ធនឹងរឿងនេះ Neymar ដើរតាមគន្លងរបស់ Cristiano Ronaldo ដោយកូនច្បងរបស់គេ គឺពុំត្រូវបានទម្លាយឲ្យស្គាល់នូវអត្តសញ្ញាណម្ដាយបង្កើតនោះឡើយ។
៣) គេរកបានគ្រាប់បាល់ទី ១០០ នៅចំថ្ងៃកំណើតអាយុ ២០ ឆ្នាំ
នៅថ្ងៃទី ៥ កុម្ភៈ ឆ្នាំ ២០១២ កំឡុងពេល Neymar ឈានដល់អាយុ ២០ ឆ្នាំ ចំថ្ងៃកំណើតផ្ទាល់តែម្តង គឺគេអាចរកបានគ្រាប់បាល់ទី ១០០ ក្នុងអាជីព ដែលស្ថិតិនេះមិនជាមានកីឡាករច្រើននោះទេអាចធ្វើបាន។ វាកើតឡើងនៅមុនឆ្នាំ ២០១៣ ដែល Neymar បានផ្ទេរទៅ Barcelona ក្នុងតម្លៃខ្លួន ៨៨,២ លានអឺរ៉ូ។
២) West Ham ជាក្លឹបដែលប៊ិះតែនឹងយកបាន Neymar
Neymar ត្រូវបានគេចាប់អារម្មណ៍ខ្លាំង កំឡុងស្រករពេលគេមានអាយុ ១៧-១៨ ឆ្នាំ ហើយដំបូងបង្អស់គឺក្លឹប West Ham United ដែលបានដាក់សំណើទៅកាន់ក្លឹបប្រេស៊ីល Santos មុនគេបង្អស់។
នោះគឺនៅឆ្នាំ ២០១០ ក្លឹបអង់គ្លេសបម្រុងនឹងចាយលុយ ១២ លានផោន ច្រើនបង្អស់ក្នុងប្រវត្តិសាស្ត្រក្លឹប លើការនាំយកកីឡាករវ័យ ១៨ ឆ្នាំ Neymar មកកាន់ទឹកដីអង់គ្លេស ប៉ុន្តែ Santos បានបដិសេធសំណើខាងលើ ដើម្បីអូសបន្លាយរក្សាទុកគេឲ្យតម្លៃឡើងតម្លៃខ្លួនខ្ពស់ជាងហ្នឹងទៀត។
១) គេប៊ិះតែនឹងផ្ទេរទៅក្លឹប Real Madrid តាំងពីអាយុ ១៤ ឆ្នាំ
តាមពិតទៅ Neymar មុនផ្ទេរមក Barcelona កាលពីអតីតកាល គេក៏ធ្លាប់ជាប់ពាក់ព័ន្ធនឹងការផ្ទេរទៅក្លឹបគូប្រជែង Real Madrid ដែរ។
នោះគឺតាំងពេលដែលគេមានអាយុ ១៤ ឆ្នាំ ដោយមានឱកាសមកហ្វឹកហាត់រយៈពេលខ្លីនៅទ្រនំថ្នាលយុវជនរបស់ Real Madrid ហើយអ្នកចាត់ការនៅទីនោះ ក៏រៀបចំផ្តល់សំណើដើម្បីថ្ពក់យកក្មេងតូចសញ្ជាតិប្រេស៊ីលរូបនេះដែរ តែដោយសារម្តាយឪពុករបស់គេគិតចង់ឲ្យកូនធំធាត់នៅប្រទេសកំណើតប្រេស៊ីល ទើបសម្រេចនាំយក Neymar ត្រលប់ទៅវិញ៕
ប្រភព៖ Sportskeeda