នៅវេលាម៉ោង ០២:០០ នាទីរំលងអាធ្រាត្រឈានចូលព្រឹកថ្ងៃព្រហស្បតិ៍ ទី ២៦ ឧសភា ឆ្នាំ ២០២១ នឹងមានការផ្សាយផ្ទាល់នៅជំនួប Man Utd ទល់ Villarreal នាវគ្គផ្ដាច់ព្រ័ត្រ Europa League ដែលវាជាប្រកួតសំខាន់ទី ២ បន្ទាប់ពីព្រឹត្តិការណ៍ UEFA Champions League នៅចុងសប្តាហ៍។
មុនឈានដល់ការប្រកួត អ្នកចាត់ការលោក Ole Gunnar Solskjaer ក៏បានថ្លែងនៅសន្និសីទសារព័ត៌មានបែបនេះថា៖ “គ្រប់កីឡាករទាំងអស់ដែលបានឡើងមកដល់វគ្គផ្តាច់ព្រ័ត្រគឺតែងតែទទួលរងសម្ពាធ និងការរំពឹងទុកនូវជ័យជម្នះ អ្នកត្រូវរៀបចំខ្លួនដើម្បីឈ្នះ ហើយយើងធ្វើអ្វីដែលបានរំពឹងទុក គ្រាន់តែខ្ញុំក៏ច្បាស់ថា Unai [Emery] គេក៏មានអារម្មណ៍ដូចយើងអ៊ីចឹងដែរ”។
លោកបន្តថា៖ “វាជាការប្រកួតជម្រុះដ៏វែងឆ្ងាយមួយ មុនតែយើងអាចឈានជើងមកដល់ចំណុចនេះ អ៊ីចឹងវគ្គនេះគឺ ៥០-៥០ ហើយ ដោយខ្ញុំមានទំនុកចិត្តថាយើងត្រៀមខ្លួនរួចរាល់សម្រាប់ការប្រកួត ហើយគ្រប់យ៉ាងគឺវាអាចកើតឡើងនៅវគ្គផ្តាច់ព្រ័ត្រ”។
គួររំឭកថា លោក Ole Gunnar Solskjaer មិនធ្លាប់ភ្លក់រសជាតិឈ្នះពាន Europa League នាមជាអ្នកចាត់ការនោះទេ ខណៈដែលលោក Unai Emery អាចរាប់ថាជាស្តេចពាន UEL ដោយលោកធ្លាប់ឈ្នះ ៣ លើក ជាមួយ Sevilla ហើយយប់នេះអាចនឹងក្លាយជាលើកដំបូងសម្រាប់ Villarreal៕
ប្រភព៖ AF