អតីតរាជនីសង្វៀនពីរប្រភេទកីឡា Stamp Fairtex បានកំពុងសម្លឹងរកឱកាសបោះជំហានទៅរកខ្សែក្រវាត់ពិភពលោកក្នុងប្រភេទកីឡាទី៣នៅពេលនាងវិលមកកាន់សង្វៀន ONE: EMPOWER ចុងខែនេះ។
នៅថ្ងៃទី២៨ ខែឧសភា ខាងមុខ កីឡាការិនីថៃនឹងប្រកួតជាមួយជើងខ្លាំងចំណាត់ថ្នាក់លេខ៣ទម្ងន់ atomweight មកពីប្រទេសអ៊ុយក្រែន Alyona Rassohyna វគ្គ៨នាក់ចុងក្រោយខ្សែក្រវាត់ពិភពលោក ONE Women’s Atomweight World Grand Prix ដែលប្រជុំដោយកីឡាការិនីទាំងអស់មិនធ្លាប់មានក្នុងព្រឹត្តិការណ៍។
វាជាឱកាសដែល Stamp ត្រូវជម្រះបញ្ជីឲ្យដាច់ស្រឡះ បន្ទាប់ពីបរាជ័យលើកដំបូងទាំងចម្រូងចម្រាសមិនអស់ចិន ហើយប្តេជ្ញាឡើងទៅកាន់វគ្គពាក់កណ្តាលផ្តាច់ព្រ័ត្រ។
កីឡាការិនីដើមកំណើតខេត្តបាតាយ៉ា បាននិយាយថា ៖«ការប្រកួតពិតជាសំខាន់ណាស់សម្រាប់ខ្ញុំ។ ជាផ្នែកនៃព្រឹត្តិការណ៏ដ៏ធំថំបំផុតក្នុងប្រវត្តិសាស្ត្រកីឡាគុនចម្រុះសម្រាប់នារី។ វាជាឱកាសរបស់ខ្ញុំដើម្បីកែកំហុសពីអ្វីដែលខ្ញុំធ្វើឲ្យមានកំហុសឆ្គង់កាលប្រកួតចុងក្រោយ»។
«ខ្ញុំចង់បង្ហាញឲ្យច្បាស់ថា ខ្ញុំពិតល្អជាងនាង និងអាចយកឈ្នះនាងបានទេ។ ខ្ញុំកំពុងធ្វើអ្វីគ្រប់យ៉ាងដើម្បីឈ្នះការប្រកួតនេះ»។
Stamp ដែលជាអតីតជើងឯកឃីកបុកសីង និងមួយថៃពិភពលោក ONE Atomweight តែងតែចង់ក្លាយជាបុគ្គលទី១ដែលឈ្នះខ្សែក្រវាត់ពិភពលោក៣ប្រភេទកីឡា។ សិស្សក្លឹប Fairtex បានធ្វើដំណើរយ៉ាងល្អក្នុងអាជីពគុនចម្រុះរបស់នាងដោយទទួលបានជ័យជម្នះ៥លើកជាប់គ្នាក្នុងឈ្នះដោយផ្តួលដៃគូពាក់កណ្តាលទី៤ដង និងឈ្នះពិន្ទុ១ដង។
បន្ទាប់មក នាងបានប្រកួតជាមួយ Rassohyna កាលពីខែកុម្ភៈកន្លងទៅនេះនៅព្រឹត្តិការណ៍ ONE: UNBREAKABLE III ដែលនាងធ្វើបានយ៉ាងល្អតាមរយៈជំនាញវ៉ៃឈររបស់នាងស្ទើរតែផ្តួលក្នុងទឹកទី១ទៅហើយ។ នៅទឹកទី២ នាងនៅតែបន្តដាក់គំនាបយ៉ាងល្អដែលមើលទៅមានប្រៀបតែម្តង។ នៅទឹកទី៣ នាងក៏នៅតែធ្វើបានល្អហើយច្បាស់ណាស់ថា នាងនឹងឈ្នះពិន្ទុដាច់ ប៉ុន្តែនៅប្រហែលជា២០វិនាទីចុងក្រោយ កីឡាការិនីអ៊ុយក្រែនមានឱកាសអោប និងឃ្លេជាប់ ហើយអ្វីៗបានប្រែប្រួលទាំងស្រុង។
នៅពេលនោះ Rassohyna បានរឹត និងឃ្លេដៃបន្ថែមករបស់កីឡាការិនីថៃម្នាក់នេះ។ នៅសល់តែ៧វិនាទីនឹងចប់ការប្រកួតទៅហើយ ស្រាប់តែនាងលើកដៃគោះស្មារបស់កីឡាការិនីអ៊ុយក្រែង ហើយអាជ្ញាកណ្តាលឃើញសកម្មភាពនេះក៏បញ្ឈប់ការប្រកួតតែម្តង។
ក្រោយចប់ការប្រកួត Stamp បានតវ៉ាថា នាងមិនបានមិនមានចេតនាគោះដៃចុះចាញ់ទេ។
នាងនិយាយថា ៖«ខ្ញុំអត់មានន័យថា គោះដៃចុះចាញ់ទេ។ នៅគោលជំហរនោះ ខ្ញុំបានធ្វើអ្វីដែលខ្ញុំបានរៀនពីការហ្វឹកហាត់។ ខ្ញុំនៅអាចដកដង្ហើមបាន ហើយអាចងើបមុខចេញពីដៃគូបាន»។
«នៅពេលនោះ ខ្ញុំអាចដកដង្ហើមបានធម្មតា។ ខ្ញុំកំពុងព្យាយាមយកដៃទៅចាប់មុខរបស់នាង តែអាជ្ញាកណ្តាលយល់ខុសថា ខ្ញុំគោះដៃចុះចាញ់។ យ៉ាងណា ខ្ញុំយល់ពីប្រតិកម្មរបស់អាជ្ញាកណ្តាលដើម្បីសុវត្ថិភាពអត្តពលិក»។
ពេលនោះនាងបានធ្វើការតវ៉ាដែរ ប៉ុន្តែលទ្ធផលមិនអាចកែប្រែបាន។ នាងនិយាយថា ៖«ខ្ញុំទទួលស្គាល់ថា ខ្ញុំពិតជាខឹងអាក្រក់ណាស់ ដូចឃើញក្នុងវីដេអូស្រាប់។ បន្ទាប់មក ខ្ញុំបានទៅបន្ទប់សណ្ឋាគារ ខ្ញុំបានផ្តួលខ្លួន និងយំស្ទើរពេញមួយយប់។ ខ្ញុំមិនមែនជាមនុស្សដែលចូលចិត្តរអ៊ូរទាំតាមបណ្តាញទំនាក់ទំនង ឬសាធារណៈទេ។ ខ្ញុំបានធ្វើការតវ៉ា ពិតមែន តែខ្ញុំមិនដឹងអ្នកដទៃគិតយ៉ាងយ៉ាងណា តែខ្ញុំចង់បញ្ជាក់ថា ខ្ញុំគ្មានចេតនាគោះដៃចុះចាញ់ទេ»។
យ៉ាងណា ភាពជូរចត់ទាំងអស់នោះនឹងត្រូវជម្រះចេញឲ្យស្រឡះនៅថ្ងៃទី២៨ ខែឧសភា ខាងមុខនេះ។ បន្ទាប់ពីឆ្លងកាត់៣ទឹកកាលពីលើកមុនណ សិស្សក្លឹប Fairtex ហាក់ស្គាល់ច្បាស់ពីចំណុចខ្លាំង និងខ្សោយរបស់ Rassohyna ដែលនាងជឿថា នាងអាចយកឈ្នះបាន។
កីឡាការិនីថៃនិយាយថា ៖«នាងពិតជាល្អជំនាញក្រោមគឺយើងឃើញច្បាស់ហើយ។ ការឃ្លេដៃរបស់គាត់ពិតជាបច្ចេកទេសដ៏គ្រោះថ្នាក់បំផុត តែកាលប្រកួតលើកមុន ខ្ញុំបានគេចផុតគ្រប់ពេលវេលា។ ខ្ញុំនឹងត្រៀមខ្លួនឲ្យបានរួចរាល់សម្រាប់ទប់ទល់នឹងក្បាច់ក្រោមរបស់គាត់។ ជាពិសេសនោះ ខ្ញុំនឹងបង្ហាញអ្វីម្យ៉ាងដែលថ្មីចូលកាន់សង្វៀនលើកនេះ ហើយប្រាកដច្បាស់ថា ខ្ញុំនឹងឈ្នះការប្រកួតនេះ»។
ការនាំយកអ្វីដែលថ្មីគឺសំដៅលើជំនាញរបស់សម្លាប់ដៃគូរបស់នាងដែលមានឱកាសហើយតែមិនផ្តាច់។ ប៉ុន្តែឥឡូវនេះ នាងបានដឹងខ្លួន និងបានអភិវឌ្ឍហើយដើម្បីឱកាសឆ្ពោះទៅកាន់វគ្គពាក់កណ្តាលផ្តាច់ព្រ័ត្រខ្សែក្រវាត់ ONE Women’s Atomweight World Grand Prix semifinals។
នាងបាននិយាយថា ៖«ការប្រកួតចុងក្រោយជាមេរៀនមួយសម្រាប់ខ្ញុំ។ លើកនេះ បើមានឱកាសគឺខ្ញុំនឹងផ្តាច់ផ្តាច់ហើយ មិនទុកឱកាសទេ។ ខ្ញុំនឹងអ្វីគ្រប់យ៉ាងដើម្បីបញ្ឈប់ការប្រកួតមួយនេះ ហើយដើរចេញពីសង្វៀនក្រោយពេលដៃរបស់ខ្ញុំត្រូវបានអាជ្ញាកណ្តាលលើកឡើងលើ»៕