ជើងខ្លាំងមួយថៃចំណាត់ថ្នាក់លេខ១ក្នុងទម្ងន់ Bantamweight កីឡាករ Saemapetch Fairtex ដឹងថា ខ្លួនជាអ្នកប្រដាល់ដែលមានអាវុធ និងបច្ចេកទេសគ្រោះថ្នាក់ម្នាក់។ ដូច្នេះរូបគេហាក់មិនប្រារម្ភនៅពេលជួបមិត្តរួមជាតិ “Left Meteorite” Kulabdam Sor. Jor. Piek Uthai។
Saemapetch ត្រូវជួបមិត្តរួមជាតិចំណាត់ថ្នាក់លេខ៣ក្នុងតំណែងគូឯកនៅព្រឹត្តិការណ៍ ONE: FULL BLAST នាថ្ងៃសុក្រ ទី២៨ ខែឧសភា ខាងមុខនេះ ហើយមិនខ្វល់ពីកេរ្តិ៍ឈ្មោះ និងអាវុធគ្រោះថ្នាក់របស់ដៃគូឡើយ។
កីឡាករមកពីក្លឹប Fairtex បាននិយាយថា ៖«Kulabdam មានរបៀបវ៉ៃដាក់គំនាបដៃគូ។ គាត់បោះជំហានទៅមុខតិចៗ ហើយចេញអាវុធសាហាវ។ គាត់ល្បីរឿងចេញអាវុធបានល្អទាំងព្រមដូចជា ទាត់ក្រោម និងកណ្តាប់ដៃធ្ងន់ តែអ្វីដែលខ្ញុំឃើញគាត់ខ្សោយគឺល្បឿន។ គាត់យឹតជាងខ្ញុំដូច្នេះខ្ញុំអាចបិទអាវុធគាត់បាន»។
«និយាយទៅ គ្មានអ្វីគួរឲ្យខ្លាចសម្រាប់ខ្ញុំទេ ទោះជាគាត់មានស្នៀតប្រកួតដែលមិនអាចមើលស្រាលបាន ហើយក៏ពិបាកយកឈ្នះគាត់ដែរ តែការប្រកួតពីរលើកចុងក្រោយនេះ គាត់មានចំណុចខ្សោយ»។
Saemapetch ដែលមានប្រវត្តិប្រកួតឈ្នះ១២២ដង ចាញ់១៦ដង និងស្មើ១ដង ស្ទើរតែបានជួបគ្នានៅលើសង្វៀននេះម្តងហើយនៅពេលអ្នកទាំងពីរប្រកួតកម្មវិធីដែលមានអ្នកប្រជែង៤រូបកាលពីឆ្នាំមុន។ កាលពីខែសីហា ឆ្នាំ២០២០សិស្សក្លឹប Fairtex បានយកឈ្នះ “The Steel Locomotive” Rodlek PK.Saenchai Muaythaigym ដោយពិន្ទុនៅព្រឹត្តិការណ៍ ONE Bantamweight Muay Thai Tournament នៅវគ្គពាក់កណ្តាលផ្តាច់ព្រ័ត្រ។
ចំណែក Kulabdam នៅវគ្គពាក់កណ្តាលផ្តាច់ព្រ័ត្របានផ្តួលមិត្តរួមជាតិទឹកទី១លើជើងខ្លាំង “The Million Dollar Baby” Sangmanee Klong SuanPluResort។ ជ័យជម្នះវគ្គនេះត្រូវអ្នកទាំងពិរជួបគ្នាជួបគ្នានៅវគ្គផ្តាច់ព្រ័ត្រ។
កំឡុងប្រកួតជាមួយ Rodlek កីឡាករ Saemapetch ថ្វីត្បិតតែឈ្នះ ប៉ុន្តែដោយសារមានរបួស ហើយត្រូវគ្រូពេទ្យពិនិត្យឃើញងថា ត្រូវចំណាយពេលព្យាបាលយូរ ដូច្នេះរូបគេក៏សម្រេចចិត្តខ្លួនពីការប្រកួតវគ្គផ្តាច់ព្រ័ត្រ ហើយត្រូវជំនួសដោយ Rodlek។ ពេលនោះជារឿងគួរឲ្យសោកស្តាយសម្រាប់កីឡាករមិពីបាតាយ៉ាដែលកំពុងមានឆន្ទៈស្វែងរកជ័យជម្នះកម្មវិធីនេះ ហើយឆ្ពោះទៅរកការប្រកួតដណ្តើមខ្សែក្រវាត់ពិភពលោក ONE Bantamweight ជាមួយជើងឯក Nong-O Gaiyanghadao។
Saemapetch បាននិយាយថា ៖«ខ្ញុំពិតជាសោកស្តាយដែលខ្ញុំរបួសមិនអាចបន្តការប្រកួតកាលពីឆ្នាំមុន។ ខ្ញុំបាត់បង់ឱកាសធំដើម្បីទៅប្រជែងខ្សែក្រវាត់ពិភពលោកជាមួយ Nong-O ម្តងទៀត។ នោះជាការបាត់បង់ឱកាសដ៏ធំ»។
Kulabdam បានខកចិត្តនៅវគ្គផ្តាច់ព្រ័ត្រដោយសារប្រកួតចាញ់អ្នកជំនួស Rodlek ដែលវ៉ៃឲ្យរូបគេដួលត្រូវអាជ្ញាកណ្តាលរាប់ និងចប់ការប្រកួតចាញ់ដោយពិន្ទ។
Saemapetch បាននិយាយថា ៖«”Rodlek បានយកឈ្នះ Kulabdam ដាច់តែម្តង តែខ្ញុំធ្លាប់បានយកឈ្នះ Rodlek ដូច្នេះខ្ញុំអាចសន្និដ្ឋានបានខ្លះរវាងខ្ញុំ និងKulabdam។ ខ្ញុំមិនចង់និយាយថា មើលស្រាលគាត់ទេ តែបើ Rodlek យកឈ្នះគាត់ដោយពិន្ទុដាច់ឆ្ងាយ ដូច្នេះខ្ញុំគិតថា ខ្ញុំក៏អាចឈ្នះគាត់បានដែរ»។
Saemapetch មានជំនឿចិត្តខ្លាំងណាស់ តែគាត់ក៏ដឹងខ្លួនថា មិនស្រួលយកឈ្នះមិត្តរួមជាតិម្នាក់នេះដែរ។ Kulabdam ជាម្ចាស់ខ្សែក្រវាត់ពីរគ្រឿងនៅសង្វៀន Lumpinee និងធ្លាប់មានប្រវត្តិប្រកួតឈ្នះ៦៣ដង ចាញ់១១ដង និងស្មើ៥ដង។ ជំនាញរបស់កីឡាកររូបនេះគឺទាត់ក្រោម និងកណ្តាប់ដៃឆ្វេងដែលជាអាវុធពិឃាត។
កីឡាករមកពីក្លឹប Fairtex បានទទួលស្គាល់ថា ដៃគូម្នាក់នេះមានអាវុធគ្រោះថ្នាក់ ជាពិសេសកណ្តាប់ដៃពិឃាត។ គាត់ពិតជាមានកណ្តាប់ដៃឆ្វេងធ្ងន់ណាស់ដែលជាចំណុចខ្ញុំត្រូវប្រុងប្រយ័ត្នជានិច្ច។
Saemapetch និយាយថា ៖«ខ្ញុំច្បាស់ជាត្រូវប្តូរជាមួយ Kulabdam ដែលអាចនិយាយបានថា អ្នកវ៉ៃជំហរស្តាំប៉ះអ្នកវ៉ៃជំហរស្តាំដូចគ្នា។ ខ្ញុំបានត្រៀមអាវុធរបស់ខ្ញុំល្អហើយ តែខ្ញុំនៅតែចាំគាត់ថា តើគាត់មានអ្វីថ្មី។ ខ្ញុំមានកណ្តាប់ដៃ ទាត់ និងកែង។ ខ្ញុំមិនរំពឹងថា ផ្តួលគាត់បានទេ ពីព្រោះគាត់ក៏ជាកីឡាករល្អម្នាក់ដែរ»។
«ប៉ុន្តែជឿខ្ញុំទៅ បើខ្ញុំមានឱកាស ខ្ញុំនឹងផ្តួលគាត់ឲ្យសន្លប់ហើយ។ ខ្ញុំមិនទុកឱកាសចោលទេ»។