អ្នកគាំទ្រដែលទន្ទឹងរង់ចាំព្រឹត្តិការណ៍ប្រកួតដែលមានសុទ្ធនារីក្នុងប្រវត្តិសាស្ត្ររបស់ ONE Championship នឹងត្រូវរង់ចាំបន្តទៀត។ ស្ថាប័នប្រដាល់ធំបំផុតក្នុងពិភពលោកគ្រោងរៀបចំការប្រកួតផ្សាយផ្ទាល់ ONE: EMPOWER នៅកីឡដ្ឋាន Singapore Indoor Stadium នាថ្ងៃសុក្រ ទី២៨ ខែឧសភានេះ ប៉ុន្តែឥឡូវនេះត្រូវបានពន្យារពេល ដោយសារស្ថានភាពកូវីដ-១៩បានកំពុងរាលដាលនៅប្រទេសសិង្ហបុរី។
សម្រាប់កាលបរិច្ឆេទថ្មីនៃការប្រកួតព្រឹត្តិការណ៍ ONE: EMPOWER នឹងត្រូវប្រកាសនៅពេលក្រោយទៀត។ទោះបីជាយ៉ាងណា អ្នកគាំទ្រក៏នឹងមិនខកចិត្តខ្លាំងដែរដោយសារថ្ងៃទី២៨ ខែឧសភានេះ ក៏នឹងមានការចាក់ផ្សាយជូនព្រឹត្តិការណ៍ប្រកួត ONE: FULL BLAST។
ព្រឹត្តិការណ៍នេះគ្រោងនឹងចាក់ផ្សាយនៅថ្ងៃទី១១ ខែមិថុនា ប៉ុន្តែត្រូវបានលើកយកមកផ្សាយនៅថ្ងៃទី២៨ ខែឧសភានេះវិញដែលមានជើងខ្លាំងថៃចំណាត់ថ្នាក់លេខ១ Saemapetch Fairtex ប្រកួតជាមួយជើងខ្លាំងចំណាត់ថ្នាក់លេខ៣ “Left Meteorite” Kulabdam Sor. Jor. Piek Uthai ក្នុងតំណែងគូឯក។
កីឡាករថៃទាំងពីរនេះតាមពិតទៅត្រូវជួបគ្នាក្នុងវគ្គផ្តាច់ព្រ័ត្រដណ្តើមខ្សែក្រវាត់ ONE Bantamweight ដែលមានបេក្ខភាពប្រជែងគ្នា៤នាក់កាលពីខែសីហា ឆ្នាំ២០២០ ប៉ុន្តែដោយសារ Saemapetch មានរបួសក៏បានដកខ្លួនចេញពីការប្រកួត។ ដូច្នេះអ្វីដែលអ្នកគាំទ្រចង់ឃើញអ្នកទាំងពីរជួបគ្នាគឺមកដល់ហើយនាព្រឹត្តិការណ៍ ONE: FULL BLAST។
ជាមួយគ្នានេះ គូឯករងប្រចាំព្រឹត្តិការណ៍ តារាប្រដាល់ឥណ្ឌា Kantharaj “Kannadiga” Agasa នឹងបង្ហាញមុខលើកដំបូងដើម្បីបញ្ចប់ពេលវេលាដែលរូបគេរង់ចាំយូរហើយដោយត្រូវជួបនឹងកីឡាករចិន “The Hunter” Xie Wei ដែលបានផ្តួលអ្នកលេងគុនចម្រុះលេខ១កម្ពុជា ចាន់ រតនា កាលពីខែធ្នូ។
ខាងក្រោមជាសមាសភាពគូប្រកួតព្រឹត្តិការណ៍ ONE: FULL BLAST។
សមាសភាពគូប្រកួតពេញ ONE: FULL BLAST
Saemapetch Fairtex ប្រកួតជាមួយ Kulabdam Sor. Jor. Piek Uthai (មួយថៃ)
Kantharaj Agasa ប្រកួតជាមួយ Xie Wei (គុនចម្រុះ)
Santino Verbeek ប្រកួតជាមួយ Miles Simson (ឃីកបុកសីង)
Ahmed Faress ប្រកួតជាមួយ Edward Kelly (គុនចម្រុះ)
Anthony Do ប្រកួតជាមួយ Liang Hui (គុនចម្រុះ)