ក្រោយខកខានឡើងសង្វៀនអស់រយៈពេលជាង ២ ឆ្នាំ អ្នកប្រដាល់ Floyd Mayweather និង Manny Pacquiao បានប្រកាសជាផ្លូវការ នូវកាលបរិច្ឆេទវិលមកប្រកួតសារជាថ្មី ហើយសារនេះនៅតែដូចមុនគឺ Floyd ឃើញលុយជាធំ ដោយត្រៀមប៉ះដៃថ្មីដែលជាតារា YouTube ខណៈ Pacquiao ណាត់ជួបអ្នកខ្លាំងពិតនៅឯទឹកដីអាមេរិក។
១) ការប្រកួតរវាង Floyd Mayweather និង Logan Paul
ពួកគេទាំងពីរផ្ទុះសង្រ្គាមពាក្យសម្តីទៅមកច្រើនខែមកហើយ ទម្រាំតែសម្រេចមកជួបគ្នាលើសង្វៀននៅថ្ងៃទី ៦ មិថុនា ឆ្នាំ ២០២១ ខាងមុខ ដែលជាប្រកួតមិត្តភាព។ កម្មវិធីនឹងធ្វើឡើងនៅឯកីឡដ្ឋាន Hard Rock ក្នុងទីក្រុង Miami រដ្ឋ Florida ហើយជាប្រកួត ៦ តឹក ដែលក្នុងមួយតឹកមានរយៈពេល ៣ នាទី។
គីឡូរវាងអ្នកប្រដាល់ទាំងពីរ គឺខុសគ្នាច្រើនណាស់ ដោយ Floyd តឲ្យ Logan ដល់ទៅជាង ១៣ គីឡូក្រាមឯណោះ ពោលគឺ Floyd ត្រូវបានកំណត់មិនឲ្យលើស ៧២,៥ គីឡូក្រាម ហើយ Logan មិនឲ្យលើស ៨៦ គីឡូក្រាម។
បញ្ជាក់ថា Mayweather ធ្លាប់ឆ្លងកាត់ការប្រកួតសរុប ៥០ លើក ឈ្នះទាំង ៥០ មិនស្គាល់ពាក្យថា “ចាញ់” ហើយធ្លាប់ផ្តួលគូប្រកួតឲ្យសន្លប់ដល់ទៅ ២៧ លើក។ ប្រកួតលើកចុងក្រោយរបស់ Floyd កើតឡើងនៅខែមករា ឆ្នាំ ២០១៨ ដោយកាលនោះយកឈ្នះទៅលើ Kickboxer របស់ជប៉ុនគឺ Tenshin Nasukawa ត្រឹមតឹកទី ១ ដែលនាំឲ្យបុរសជនជាតិអាមេរិករកបាន ៩ លានដុល្លារ ចាយពេលត្រឹមតែ ១៣៩ វិនាទីលើសង្វៀន។
ខណៈដែល Logan Paul មិនធ្លាប់ប្រកួតទល់អ្នកប្រដាល់អាជីពដូចជា Floyd ពីមុនមកទេ ដោយកន្លងមកធ្លាប់ប៉ះ KSI ដែលជា YouTuber និង Rapper តែមួយលើកនោះគត់ ហើយទទួលបានត្រឹមលទ្ធផលស្មើ ក្រោយឆ្លងកាត់ការប្រកួត ៦ តឹក។
យ៉ាងណាប្រកួតនេះ Floyd នៅតែជឿថា នឹងអាចបង្កើតចំណូលរួមដល់ខ្ទង់ ១០០ លានដុល្លារប្រហែលកាលប៉ះ Conor McGregor នៅឆ្នាំ ២០១៧ ដែរ។ សម្រាប់ចំណែករបស់លោកផ្ទាល់ អាចនឹងទទួលបាន ៥០ លានដុល្លារ។
២) ការប្រកួតរវាង Manny Pacquiao និង Errol Spence Jr.
អ្នកប្រដាល់លំដាប់ពិភពលោកទាំងពីរ បានព្រមព្រៀងតតាំងគ្នានៅថ្ងៃទី ២១ សីហា ឆ្នាំ ២០២១ ក្នុងទីក្រុង Las Vegas សហរដ្ឋអាមេរិក។ នេះទើបជាអ្នកខ្លាំង ប៉ះអ្នកខ្លាំងពិត ដោយប៉ាគីអៅជាស្តេចប្រដាល់ប្រចាំប្រទេសហ្វីលីពីន និងតំណាងឲ្យតំបន់អាស៊ី ហើយ Spence ជាអ្នកប្រដាល់មិនស្គាល់ពាក្យថា “ចាញ់” របស់អាមេរិក ដែលរក្សាខ្សែក្រវាត់ IBF ប្រភេទទម្ងន់ Welterweight តាំងពីឆ្នាំ ២០១៧ និង WBC តាំងពីឆ្នាំ ២០១៩។
ប្រកួតចុងក្រោយរបស់ ប៉ាគីអៅ កើតឡើងនៅថ្ងៃ ១៩ កក្កដា ឆ្នាំ ២០១៩ ដោយបានយកឈ្នះទៅលើអ្នកប្រដាល់ Keith Thurman ដោយលទ្ធផលកាត់សេចក្តី ១២ តឹក ហើយសរុបការប្រកួត ៧១ លើក គេឈ្នះ ៦២ លើក ស្មើ ៧ លើក ចាញ់ ២ លើក និងធ្លាប់ផ្តួលគូប្រកួតឲ្យសន្លប់ ៣៩ លើក។
រីឯ Errol Spence គេមានអាយុទើបតែ ៣១ ឆ្នាំទេ ហើយសរុប ២៧ ប្រកួត ឈ្នះទាំង ២៧ លើក និងធ្លាប់ផ្តួលគូប្រកួតឲ្យសន្លប់ ២១ លើក។ ប្រកួតចុងក្រោយរបស់អ្នកប្រដាល់អាមេរិករូបនេះ គឺជាការប៉ះគ្នាទល់បុរសរួមសញ្ជាតិ Danny Garcia ដែលបានយកឈ្នះដោយលទ្ធផលកាត់សេចក្តី ១២ តឹក។
បើយោងតាមការលើកឡើងរបស់ប្រធានរៀបចំកម្មវិធីឲ្យប៉ាគីអៅ លោក Sean Gibbons បាននិយាយប្រាប់ ESPN ថាការប្រកួតសារនេះ គឺ Spence ជាមនុស្សតែម្នាក់គត់ដែលសក្តិសមនឹងមកប្រជែងជាមួយអ្នកប្រដាល់ហ្វីលីពីន ហើយវាជាការប្រកួតជក់ចិត្ត មិនដូចប្រកួតរបស់ Floyd ដោយទៅធ្វើរឿងលីលាដើម្បីតែលុយនោះទេ។
លោក Gibbons និយាយ៖ “មនុស្សជាច្រើនជឿថា Spence គឺជាអ្នកប្រដាល់ប្រភេទទម្ងន់ Welterweight ល្អបំផុតក្នុងលោក ហើយ Pacquiao គេមិនដែលនិយាយថា ទេ ចំពោះការប្រឈមពិតៗបែបនេះឡើយ ដោយគេនឹងមិនទៅធ្វើរឿងឆ្កួតលីលាដោយយកខ្លួនឯងទៅវាយជាមួយ YouTuber ឬបុរសដែលមានឥទ្ធិពលលើបណ្តាញសង្គមដូចជា Floyd Mayweather បានធ្វើចេញមកនោះទេ ពោលគឺ Pacquiao គេចង់បន្តភាពខ្លាំងពិតប្រាកដរបស់គេ បែបនេះគឺត្រូវតែវាយជាមួយអ្នកខ្លាំង”៕
ប្រភព៖ ESPN