មុនមានបច្ចេកវិទ្យា Goal Line Technology ដាក់ឲ្យដំណើរការ ដើមឡើយនៅក្នុងវិស័យបាល់ទាត់យើងនេះ គឺឆ្លងកាត់ការវិនិច្ឆ័យសុទ្ធសាធ ១០០ ភាគរយ ដោយភ្នែកអាជ្ញាកណ្ដាលខ្សែបន្ទាត់ ក្នុងការកំណត់ថា តើបាល់នោះចូលទី ឆ្លងផុតខ្សែគំនូសបង្គោលទីឬអត់?
រឿងរ៉ាវចម្រូងចម្រាសនិងអភូតហេតុនៅក្នុងប្រអប់ទីបាននាំឲ្យកើតមានការចាប់អារម្មណ៍ជាបន្តបន្ទាប់ពីមួយឆ្នាំទៅមួយឆ្នាំ ហើយហេតុការណ៍ខ្លះបានធ្វើឲ្យដក់ជាប់ក្នុងអារម្មណ៍អ្នកគាំទ្រមកទល់សព្វថ្ងៃ ជាពិសេសគឺអ្នកគាំទ្រដែលបានឃើញផ្ទាល់នៅឯកីឡដ្ឋាន។
ក្នុងអត្ថបទនេះ CTS Sports លើកជ្រុងមួយមកបង្ហាញពាក់ព័ន្ធនឹងការដែលខ្សែការពារអាច Clear បាល់មិនឲ្យចូលទី ឬផុតខ្សែគំនូសបង្គោលទី ដែលជារឿងមិនគួរឲ្យជឿ ៧ លើកធ្លាប់កើតឡើងក្នុងវិស័យបាល់ទាត់៖
៧) Raul Albiol ទល់ក្លឹប Sevilla
នៅខែមករា ឆ្នាំ ២០១១ ក្លឹប Real Madrid បានយកឈ្នះ ១-០ ទៅលើ Sevilla។ កាលនោះខាង Sevilla មានខ្សែប្រយុទ្ធ Luis Fabiano បានអូសបាល់ផុតដៃអ្នកចាំទី Iker Casillas ហើយស៊ុតសំដៅទៅក្នុងបង្គោលទី ក៏ស្រាប់តែខ្សែការពារ Albiol រត់មក Slide រារាំងបាល់មិនឲ្យចូលទី។ ដើមឡើយការ Slide ដំបូង បាល់នៅតែហូរធ្លាក់មកវិញ រហូតដល់ខ្សែការពារកណ្ដាលរូបនេះព្យាយាមប្រើជើងរុញបាល់ចេញម្តងទៀត ទើបអាចផ្តាច់ឱកាសតាមស្មើរបស់ Sevilla បាន។
៦) Ashley Young ទល់ក្លឹប Stoke City
នៅខែកុម្ភៈ ឆ្នាំ ២០១៤ ក្លឹប Man Utd ប៊ិះតែបាត់បង់ឱកាសយកបាន ៣ ពិន្ទុ ពីក្លឹប Stoke City តែសំណាងល្អបានការ Clear បាល់ដោយថ្វីជើងរបស់ Ashley Young នៅចុងម៉ោង។
ពេលនោះគឺខ្សែប្រយុទ្ធ Mame Diouf មានឱកាសបញ្ចប់ទីត្រឹមបាល់ចម្ងាយជាង ៣ ម៉ែត្រពីបង្គោលទី ដែលអ្នកចាំទី David de Gea មិនអាចរត់មកសង្រ្គោះបាល់ទាន់ទេ តែល្អវិញនៅសល់ខ្សែការពារស្លាប Ashley Cole ដែលគេអាចរត់មកយាជើងរារាំងបាល់បានដោយជោគជ័យ។
៥) Raphael Varane ទល់ក្លឹប Barcelona
ជាប្រកួត El Clasico ដំបូងរបស់ Varane ហើយកាលនោះគេទើបតែមានអាយុ ១៩ ឆ្នាំប៉ុណ្ណោះ តែការលេងរបស់គេ ត្រូវបានអ្នកគាំទ្រមើលឃើញថាជាខ្សែការពារពោរពេញដោយគុណភាពមួយរូប។
ពេលនោះខ្សែបម្រើ Fabregas របស់ Barcelona បានបង្វិលខ្លួនកាត់បាល់ក្នុងប្រអប់ឲ្យ Xavi Hernandez ហើយ Xavi ក៏គេស៊ុតបានយ៉ាងល្អផុតដៃអ្នកចាំទី Diego Lopez បម្រុងនឹងចូលទីដែរ តែស៊យអី Raphael Varane បានរត់មកឈររាំង នាំឲ្យបាល់លោតចេញទៅក្រៅវិញ។
៤) David Luiz ទល់ជម្រើសជាតិអេស្ប៉ាញ
នៅពានរង្វាន់ Confederation Cup វគ្គផ្តាច់ព្រ័ត្រ ឆ្នាំ ២០១៣ ក្រុមជម្រើសជាតិប្រេស៊ីលបានធ្វើឲ្យអ្នកគាំទ្រមានការសាទរជាខ្លាំង តាមរយៈជ័យជម្នះ ៣-០។ ខាងអេស្ប៉ាញប៊ិះតែមានឱកាសរកបានមួយគ្រាប់យ៉ាងធូរ ដោយការស៊ុតរបស់ Pedro ពីផ្នែកខាងស្តាំក្នុងប្រអប់។ ដ្បិតបើបច្ចេកទេសស៊ុតរបស់ Pedro អាចស៊ុតផុតដៃអ្នកចាំទី Julio Cesar តែមិនអាចផុតជើងរបស់ខ្សែការពារ Luiz ដែលព្យាយាមរត់ទៅ Slide ពេលនោះទេ។
៣) Jerome Boateng ទល់ជម្រើសជាតិអាល្លឺម៉ង់
នៅព្រឹត្តិការណ៍ Euro ឆ្នាំ ២០១៦ គ្រាប៉ះគ្នារវាងអាល្លឺម៉ង់ និងអ៊ុយក្រែន ក៏បានកើតមាននូវ Clearance Goal ដ៏អស្ចារ្យមួយដែរ។
នៅពេលដែលកីឡាកររបស់អ៊ុយក្រែនលើកបាល់ក្នុងប្រអប់ ទៅជ្រុងខាងស្តាំ Yevhen Konoplyanka ក៏បានរត់មកកាប់បាល់ពាក់កណ្តាល Volley យ៉ាងស្អាត ប៊ិះតែនឹងចូលទីទៅហើយ តែត្រូវបាន Boateng រត់មករារាំង ធ្វើឲ្យបាល់លោតប៊ិះក្លាយទៅជាបាល់ Own Goal តែគេបានព្យាយាមផ្តាច់វាចេញទៅវិញ ដល់ថ្នាក់ខ្លួនឯងដួលអុកគូទទៅនឹងសំណាញ់ទីខាងក្រោយ។
២) Marcelo ទល់ Bayern Munich
ជាខ្សែការពារស្លាបឆ្វេងដ៏អស្ចារ្យមួយរូបក្នុងលោក ជាពិសេសនៅប៉ុន្មានឆ្នាំមុនគ្រាដែល Real Madrid ឈ្នះពានរង្វាន់ Champions League បណ្តាក់គ្នា។ កាលនោះកីឡាករប្រេស៊ីលធ្លាប់ធ្វើរឿងភ្ញាក់ផ្អើលមួយ នៅជំនួបទល់ Bayern Munich ដោយនៅពេលដែល David Alba កាត់បាល់មកឲ្យ Arjen Robben បញ្ចប់ទី ហើយកីឡាករហូឡង់លួចស៊ីបាល់លើអស់ចង្កេះ Keylor Navas តែមានឯណានៅសល់ Marcelo ដែលគេរត់មកតែតបាល់ Clear ចេញបានយ៉ាងល្អ។
១) Neven Subotic ទល់ Bayern Munich
នៅប្រកួតវគ្គផ្តាច់ព្រ័ត្រ ឆ្នាំ ២០១៣ រវាង Bayern Munich និង Borussia Dortmund ដោយពេលនោះខ្សែប្រយុទ្ធរបស់ Bayernn គឺ Muller បានកាត់បាល់ផុតដៃអ្នកចាំទីរបស់ Dortmund តម្រង់មកទី ត្រៀមនឹងបញ្ចប់ដោយ Arjen Robben តែត្រូវបានរាំងស្ទះដោយខ្សែការពារ Neven Subotic ដែលគេរត់មក Slide ពីក្រោយ ទាញបាល់ចេញបានយ៉ាងល្អ។ យ៉ាងណាការប្រកួត Bayern នៅតែក្លាយជាក្រុមជើងឯក ដោយឈ្នះ ២-១៕