អនាគតរបស់ Lionel Messi មិនទាន់សម្រេចចេញនោះទេ ថាត្រូវបន្តឈរជើងឲ្យក្លឹប Barcelona ឬផ្ទេរចេញទៅក្លឹបថ្មីណាមួយ។ ប៉ុន្តែអនាគត Leo Messo ក្មេងប្រុសតូចអាយុ ១០ ឆ្នាំ នៅរដូវកាល ២០២១/២២ គឺបានសម្រេចរួចរាល់ហើយ ដោយគេបានផ្ទេរមកថ្នាលយុវជនរបស់ Arsenal។
សារព័ត៌មានធំៗជាច្រើននៅអឺរ៉ុបមានដូចជា ESPN, Goal និង Marca បានចុះផ្សាយព្រោងព្រាតពីរឿងរ៉ាវ Leo Messo ហើយក៏នាំឲ្យអ្នកគាំទ្រផ្ទុះការចាប់អារម្មណ៍ ដោយចង់ដឹងកាន់តែស៊ីជម្រៅអំពីប្រវត្តិក្មេងតូចម្នាក់នេះ និងមូលហេតុដែលគេមានឈ្មោះស្រដៀងតារាឆ្នើមប្រចាំក្លឹប Barcelona។
Messo ជាក្មេងប្រុសជនជាតិកេនយ៉ា ដែលបច្ចុប្បន្នគេរស់នៅជាមួយគ្រួសារនៅឯទីក្រុងឡុង ចក្រភពអង់គ្លេស។ គេមានឪពុកឈ្មោះ Benson Messo ជាអតីតកីឡាករបាល់ឱបពោរពេញដោយទេពកោសល្យមួយរូបនៅឯប្រទេសកេនយ៉ា។ បើសួរថា ហេតុអ្វីបានជាឪពុកដាក់ឈ្មោះកូនប្រុសខ្លួនថា Leo Messo?
សំណួរនេះក៏គ្មានចម្លើយចេញពីសាមីខ្លួនផ្ទាល់នោះដែរ តែតាមការជឿជាក់ ក៏ប្រហែលដោយសារលោក Benson ជាអ្នកគាំទ្ររបស់ Messi មួយរូប ហើយសង្ឃឹមអាចឃើញកូនប្រុសខ្លួនក្លាយជាកីឡាករបាល់ទាត់ដូចជា Messi និងគួបផ្សំឈ្មោះដើមរបស់ខ្លួន Messo ស្រាប់ផង អ៊ីចឹងក៏ថែម Leo ពីមុខ ដើម្បីតោងកាលីបតារាឆ្នើមអាហ្សង់ទីនតែម្ដងទៅ។
ពន្លឺនៃក្តីស្រមៃក៏បានលេចចេញជាបណ្តើរៗនៅពេលនេះ បន្ទាប់ពី Leo Messo បានមានឱកាសមកចូលរួមនៅថ្នាលយុវជនរបស់ Arsenal ក្រោយពីចាយពេលហ្វឹកហាត់នៅឯទ្រនំថ្នាល West Ham United កាលពីពេលមុន។ បើរាប់ទាំងឈុតតូចឈុតធំ ការនាំយក Messo ជាការចុះហត្ថលេខាដំបូងបង្អស់ហើយរបស់ Arsenal នៅទីផ្សារដោះដូររដូវក្ដៅ។
កុមារាអាយុ ១០ ឆ្នាំ គេទទួលបានការស្វាគមន៍យ៉ាងកក់ក្ដៅ ដោយបានថតរូបកាន់អាវលេខ ៩ មានឈ្មោះ Messo ជាមួយនឹងគ្រូបង្វឹកថ្នាលយុវជននៅក្លឹប Arsenal លោក Per Mertesacker។ ជាងនេះលោកក៏បានផ្តល់នូវកាដូពិសេស ដែលជា FIFA Card មានឈ្មោះរបស់ Messo ថែមទៀតផង។
ដ្បិត Messo មិនទាន់ឈានដល់ឱកាសបង្កើតផ្លែផ្កាជោគជ័យជាដុំកំភួនណាមួយក្ដី តែនេះគឺជាក្តីសង្ឃឹមសម្រាប់យុវជនកេនយ៉ាឯទៀត ថាឱកាសនៃការប្រលូកមកចូលរួមជាមួយក្លឹបលំដាប់អន្តរជាតិគឺនៅតែមាន ហើយពួកគេមិនត្រូវបោះបង់ក្តីសង្ឃឹមនោះឡើយ ប្រសិនជាមានឆន្ទៈចង់ក្លាយជាកីឡាករបាល់ទាត់ពិតប្រាកដ។
កេនយ៉ាដែលជាប្រទេសតូចមួយនៅតំបន់អាហ្វ្រិកខាងកើត នៅចំណាត់ថ្នាក់ FIFA Ranking ពួកគេឈរនៅលេខរៀងទី ១០២ ដែលធ្លាប់ហក់ឡើងខ្ពស់បង្អស់នៅឆ្នាំ ២០០៨ កាលនោះឡើងមកដល់លេខរៀងទី ៦៨ ហើយធ្លាក់ចុះខ្លាំងបង្អស់នៅឆ្នាំ ២០០៦ មកដល់លេខរៀងទី ១២៧។
មិនជាមានកីឡាករល្បីៗណាមួយដែលកើតចេញពីប្រទេសកេនយ៉ានោះទេ ដោយលេចធ្លោបំផុតមានតែខ្សែបម្រើ Victor Wanyama ដែលគេធ្លាប់ជាអតីតកីឡាករនៅក្លឹប Spurs និង Southampton ហើយសព្វថ្ងៃកំពុងប្រកបអាជីពឲ្យក្លឹបនៅអាមេរិក Montreal Impact។ មួយផ្សេងទៀតដូចជាអតីតខ្សែប្រយុទ្ធស្លាប Dennis Oliech ដែលធ្លាប់លេងឲ្យក្លឹបនៅបារាំង FC Nantes ក៏ដូចជាធ្លាប់ឈរជើងនៅព្រឹត្តិការណ៍ UEFA Champions League បាន ៥ ប្រកួត។
តែកុំទាន់មើលស្រាល សម្រាប់ពន្លកថ្មី Messo ថាមិនត្រូវទៅថ្ងៃមុខ គេអាចក្លាយជាកីឡាករលំដាប់កំពូលមួយរបស់ Arsenal និងជាគ្រាប់ពេជ្រតំណាងឲ្យជម្រើសជាតិកេនយ៉ា ឬមានឱកាសជាប់ទៅលេងឲ្យជម្រើសជាតិអង់គ្លេសផ្ទាល់ក៏ថាបាន។
Kenyan Leo Messo officially joins Arsenal Youth Academy. A dream come true for the young lad! pic.twitter.com/cALQU6rlDl
— john vaselyne (@vaselyne) May 19, 2021
បញ្ជាក់ថា កីឡាករដែលធ្លាប់ឆ្លងកាត់ការហ្វឹកហាត់នៅថ្នាលយុវជនរបស់ Arsenal ហើយទទួលបានជោគជ័យ និងមានឈ្មោះបោះសំឡេងក្នុងវិស័យបាល់ទាត់ រួមមានដូចជា Wojciech Szczesny, Emiliano Martinez, Cesc Fabregas, Serge Gnabry, Eddie Nketiah, Bukayo Saka, Ashley Cole និង Hector Bellerin ជាដើម។ ចុះអ្នកបន្ទាប់ តើអាចក្លាយជារលកថ្មី Leo Messo នេះដែរឬទេ?