ជឿជាក់ថាមានប្រិយមិត្តអ្នកគាំទ្រជាច្រើន ប្រាកដជាកើតមានចម្ងល់ក្រោយឃើញច្រើនលើកមកហើយ ដែលតារាឆ្នើម Cristiano Ronaldo ហាក់បង្ហាញកាយវិការខឹងសម្បា និងមិនគោរពទៅលើជនជាតិអ៊ីស្រាអែល មិនថាតែសំណាក់កីឡាករ អ្នកសារព័ត៌មាន ក៏ដូចជាគណៈគ្រប់គ្រងជាន់ខ្ពស់ក្នុងការប្រកួតនីមួយៗ។
ដោយតាមពិតទៅនៅពីក្រោយនោះ គឺមានហេតុផលគួរឲ្យគោរព ដែលនាំឲ្យ Ronaldo ទម្លាប់មានកាយវិការមិនល្អទៅលើជនជាតិអ៊ីស្រាអែល។ នោះគឺពាក់ព័ន្ធនឹងភាពចម្រូងចម្រាសរវាងប្រទេសអ៊ីស្រាអែល-ប៉ាឡេស្ទីន ដែលត្រូវបានគេរាប់ចូលជាទំនាស់មានអាយុកាលចំណាស់ជាងគេបង្អស់មួយក្នុងលោក។
ប្រជាជនស្លូតត្រង់របស់ប្រទេសប៉ាឡេស្ទីន និងអ៊ីស្រាអែលរាប់ពាន់រាប់មុឺននាក់ ជាពិសេសគឺក្មេងតូចៗ បានបាត់បង់ជីវិតជាបន្តបន្ទាប់ ចាប់តាំងពីទំនាស់ផ្ទុះឡើងនៅឆ្នាំ ១៩៤៨ មកទល់ពេលបច្ចុប្បន្ន។ តែយ៉ាងណា Ronaldo ដែលមានឈ្មោះជាបុគ្គលមានឥទ្ធិពលមួយរូបក្នុងលោក ហាក់បានបង្ហាញកាយវិការមិនពេញចិត្តទៅលើជនជាតិអ៊ីស្រាអែល និងឈរលើគោលជំហរគាំទ្រប្រជាជនប៉ាឡេស្ទីន។
នៅឆ្នាំ ២០១២ លេចលឺថា Ronaldo បានបរិច្ចាគប្រាក់ ១,៨ លានដុល្លារទៅជួយក្មេងៗប៉ាឡេស្ទីននៅតំបន់ Gaza ហើយកាលពីប៉ុន្មានឆ្នាំមុន ខ្សែប្រយុទ្ធវ័យ ៣៦ ឆ្នាំ ក៏ធ្លាប់បានផ្ញើសារវីដេអូខ្លី ដោយនិយាយលើកទឹកចិត្តនិងគាំទ្រដល់ប្រជាជនប៉ាឡេស្ទីនបែបនេះថា៖ “សួស្ដី វីដេអូនេះសម្រាប់ក្មេងៗនៅស៊ីរី ដោយយើងដឹងថាអ្នករាល់គ្នាបានឆ្លងកាត់ការឈឺចាប់ជាច្រើន ដោយខ្ញុំជាកីឡាករបាល់ទាត់ល្បីឈ្មោះមួយរូប តែអ្នកគឺជាវីរបុរសពិត សូមអ្នកកុំអស់សង្ឃឹម ពួកយើងនឹងតែងតែនៅជាមួយអ្នក បារម្ភពីអ្នក រួមទាំងខ្ញុំជាពិសេសផងដែរ”។
មួយផ្សេងទៀតត្រលប់ទៅឆ្នាំ ២០១៦ កំឡុងការចាយពេលនៅក្លឹប Real Madrid តារាឆ្នើម Cristiano ក៏ធ្លាប់ផ្តល់ឱកាសឲ្យក្មេងប្រុសប៉ាឡេស្ទីនមួយរូប ដែលនៅរស់រានមានជីវិត ក្រោយការបំផ្ទុះគ្រាប់បែកពីសំណាក់ក្រុមជ្រុលនិយមជ្វីហ្វ។ ក្មេងប្រុសអាយុ ៥ ឆ្នាំម្នាក់នោះ ត្រូវបានក្លឹប Real Madrid ផ្តល់ភាពកក់ក្ដៅជាខ្លាំង មិនថាតែពីសំណាក់កីឡាករ Ronaldo និងកីឡាករឯទៀតក្នុងក្លឹប ទន្ទឹមដែលគេជាក្មេងប្រុសគួរឲ្យអាណិត ព្រោះឪពុកម្ដាយនិងបងប្អូនបង្កើតរបស់គេបានបាត់បង់ជីវិតដោយសារសង្គ្រាមនោះអស់ទៅហើយ។
ដោយឡែកតទៅនេះយើងបង្ហាញ ៣ លើកធំៗ ដែល CR7 ធ្លាប់បង្ហាញនូវកាយវិការមិនពេញចិត្តទៅលើជនជាតិអ៊ីស្រាអែល ក្នុងវិស័យកីឡាបាល់ទាត់៖
៣) Ronaldo បដិសេធមិនចាប់ដៃជាមួយគណៈគ្រប់គ្រងជាន់ខ្ពស់អ៊ីស្រាអែល
ក្នុងទីក្រុង Jeddah ប្រទេសអារ៉ាប៊ីសាអូឌីត នៅឆ្នាំ ២០១៨ សេះបង្កង់ Juventus បានយកឈ្នះទៅលើ AC Milan នៅពានរង្វាន់ Supercoppa Italiana។ នៅពេលដែលប្រគល់ពានរង្វាន់ Ronaldo ពុំបានបង្ហាញការសាទរឬទឹកមុខរីករាយជាមួយគណៈគ្រប់គ្រងជនជាតិអ៊ីស្រាអែលនៅទីនោះទេ ដ្បិតបើបុរសម្នាក់នោះហុចដៃចង់ចាប់ដៃ ក៏ Ronaldo បានបដិសេធហើយដើរបង្ហួស។
២) Ronaldo បដិសេធមិនដោះដូរអាវជាមួយកីឡាករអ៊ីស្រាអែល
https://youtu.be/l2EQ26Aw1W4
កំឡុងព្រឹត្តិការណ៍ FIFA World Cup ឆ្នាំ ២០១៨ នៅការប្រកួតរវាងព័រទុយហ្គាល់-អ៊ីស្រាអែល ក្រោយចប់ការប្រកួត កីឡាករនៃសំណាក់ក្រុមទាំងពីរក៏បានដោះដូរអាវគ្នាទៅមក តែ Ronaldo បានបដិសេធពុំព្រមប្រគល់អាវរបស់ខ្លួនទៅឲ្យកីឡាកររបស់អ៊ីស្រាអែលនោះឡើយ។ សូម្បីតែជាមួយអាជ្ញាកណ្ដាលជនជាតិអ៊ីស្រាអែលក៏លោកបដិសេធមិនចាប់ដៃនោះដែរ។ សារនេះគេកាន់តែយល់ច្បាស់ថា Ronaldo ពិតជាបានគាំទ្រចលនាតស៊ូរបស់ប៉ាឡេស្ទីនពិតមែន។
១) កាយវិការខឹងសម្បាកាលពីឆ្នាំ ២០១៣
នៅការប្រកួតវគ្គជម្រុះបឋម World Cup ២០១៤ កាលនោះព័រទុយហ្គាល់ ត្រូវប៉ះគ្នាជាមួយអ៊ីស្រាអែល។ ក្នុងការប្រកួតគេឃើញ Ronaldo ដូចជាលេងកាចជាងប្រកួតសព្វមួយដង តែលោកក៏កាន់តែខឹងសម្បា ជួនពេលដែលកីឡាករអ៊ីស្រាអែលព្យាយាមតាមធ្វើទុក្ខបុកម្នេញមកលើលោកឲ្យដួលច្រើនលើកច្រើនសា ហើយគេក៏ឃើញ Ronaldo ទៅបង្ហាញការមិនពេញចិត្តដាក់អ្នកចាត់ការជម្រើសជាតិអ៊ីស្រាអែលផ្ទាល់ផងដែរ។
សរុបហេតុផលទាំងអស់នេះហើយ ដែលគេជឿថា Cristiano Ronaldo ពិតជាមានចិត្តគាំទ្រទៅដល់ប្រជាជនប៉ាឡេស្ទីន ហើយមិនពេញចិត្តនោះទេទៅលើទង្វើញាំញីរបស់អ៊ីស្រាអែល៕
បញ្ជាក់៖ អត្ថបទនេះ មិនមានន័យថាយើងលំអៀងទៅកាន់ជាតិសាសន៍ណាមួយនោះទេ តែត្រឹមប្រើប្រាស់អំណះអំណាងពីភាពជាក់ស្តែងនៃរូបភាព និងឯកសារយោងមួយចំនួនមកចុះផ្សាយចែករំលែកតែប៉ុណ្ណោះ!
