Liverpool បានយកឈ្នះ ៣-០ ទៅលើ Burnley ដែល ៣ ពិន្ទុទទួលបានអាចស្អំចិត្តឲ្យពួកគេបន្តក្តីសង្ឃឹមនៅការឈរចំណាត់ថ្នាក់ Top 4 នាបញ្ចប់រដូវកាល។
ក្រោយចប់ការប្រកួតកាលពីយប់មិញ លោក Jurgen Klopp ជាអ្នកចាត់ការបានបង្ហាញអារម្មណ៍សប្បាយរីករាយ និងនិយាយថាវាប្រៀបបានដូចជាការប្រកួតនៅវគ្គពាក់កណ្តាលផ្តាច់ព្រ័ត្រនៃពានរង្វាន់មួយអ៊ីចឹង។ លទ្ធផលជុំទី ៣៨ គឺហង្សទាមទារយកជ័យជម្នះជាចាំបាច់ ដើម្បីទទួលបានកៅអី Top 4 ឬបានត្រឹមស្មើ ហើយពឹងផ្អែកលើលទ្ធផលរបស់ Leicester។
ថ្លែងប្រាប់ Sky Sports បុរសសញ្ជាតិអាល្លឺម៉ង់និយាយថា៖ “វាដូចជាវគ្គពាក់កណ្តាលផ្តាច់ព្រ័ត្រ ដោយយើងបានគិតថាត្រូវតែឈ្នះ ហើយពេលនេះយើងក៏ធ្វើបាន ពោលវាជាអ្វីដែលយើងសក្តិសមនឹងទទួល ព្រោះការលេងរបស់យើងគឺស្ថិតនៅកម្រិតកំពូល”។
លោកបន្តថា៖ “យើងក៏បានដឹងមុនការប្រកួតហើយដែរ ថាវាជាប្រកួតដ៏តានតឹង គួបផ្សំការដែលពួកគេមានមនុស្ស ៣ ៥០០ នាក់នៅខាងគេ [សំដៅដល់អ្នកគាំទ្រ] ដែលបរិយាកាសបែបនេះ ជះឥទ្ធិពលខ្លាំងបំផុតក្នុងវិស័យបាល់ទាត់”៕
ប្រភព៖ Goal