Liverpool បានយកឈ្នះ ៣-០ ទៅលើ Burnley កាលពីយប់មិញ ដែលលទ្ធផលនេះនាំឲ្យពួកគេបន្តក្ដោបក្ដាប់ក្ដីសង្ឃឹមអាចរក្សាចំណាត់ថ្នាក់ Top 4 ដើម្បីមានសិទ្ធលេង Champions League រដូវកាលក្រោយ។
បើមើលពេញមួយរដូវកាលនេះទៅ ដ្បិតបើសល់ ១ ជុំទៀតក្ដី តែយើងអាចនិយាយបានថា Liverpool ២០២០/២១ ឡើងចុះពិន្ទុមិនគួរឲ្យជឿ ដោយប្រៀបបាននឹងផ្លូវរទេះភ្លើង Rollercoaster អ៊ីចឹងដែរ។ បច្ចុប្បន្នហង្សឈរលេខ ៤ មាន ៦៦ ពិន្ទុ ស្មើ Leicester ដែលឈរលេខ ៥ និងចាញ់ ១ ពិន្ទុធៀបនឹង Chelsea ឈរលេខ ៣។
យោងមើលទៅកាលពីថ្ងៃទី ១ មករា ឆ្នាំ ២០២១ ពួកគេបានឈរនៅចំណាត់ថ្នាក់កំពូលតារាងនៅ Premier League ដែលមានក្ដីសង្ឃឹមអាចឈ្នះពាន លុះកីឡាកររបួសគរជើងគ្នាជាបន្តបន្ទាប់ ក៏នាំឲ្យក្រុមដឹកនាំដោយលោក Jurgen Klopp ធ្លាក់មកលេខ ៨ វិញ រហូតទើបតែមកដល់ថ្ងៃទី ១៩ ឧសភា ក្រុមហង្សក៏ឡើងមកដល់លេខ ៤ តែមិនទាន់ច្បាស់នោះទេថា អាចធ្វើបានឬអត់ ដោយរង់ចាំអុតមើលជុំទី ៣៨។
នៅជុំទី ៣៨ ហង្សត្រូវប៉ះ Crystal Palace ខណៈដែល Leicester City ត្រូវប៉ះ Tottenham Hotspur និង Chelsea ត្រូវប៉ះ Aston Villa។ ការប្រកួតនឹងមានផ្សាយផ្ទាល់លើទំព័រ CTS Sports៕
ប្រភព៖ BR/Football