អ្នកចាត់ការលោក Xavi Hernandez របស់ក្លឹប Al Sadd នៅឯប្រទេសកាតា ហាក់កំពុងស្ថិតក្នុងមន្ទិលសង្ស័យ ដោយមិនច្បាស់ថាលោកអាចបន្តការឈរជើងនៅរដូវកាលថ្មី ឬត្រូវចាកចេញ។ ខណៈដែលពេលនេះ មានក្លឹបជាច្រើនតាមចរចាចង់បានលោកឥតឈប់។
ដ្បិតបើទើបបន្តកុងត្រាថ្មី ដែលមានសុពលភាពដល់ឆ្នាំ ២០២៣ ក្តី តែ Xavi ក៏នៅតែមានភាគរយចាកចេញ ហើយខាងក្លឹប Al Sadd ក៏មិនព្យាយាមរាំងស្ទះដំណើររបស់លោកនោះដែរ ឲ្យតែជ្រើសរើសទៅក្លឹបដែលគិតថាត្រឹមត្រូវ។
បើតាមរបាយការណ៍ពី AS បានចុះផ្សាយថា អតីតខ្សែបម្រើរបស់អ្នកមានបុណ្យរូបនេះ កំពុងស្ថិតក្នុងក្រសែភ្នែកចង់បានពីសំណាក់ក្លឹបនៅអាល្លឺម៉ង់ គឺ Borussia Dortmund ដែលចង់បានឲ្យទៅដឹកនាំរយៈពេល ៣ រដូវកាល។ ក្រៅពីនេះគឺមានក្រុមជម្រើសជាតិប្រេស៊ីលមួយផ្សេងទៀត ដែលសហព័ន្ធបាល់ទាត់នៅទីនោះបានទាក់ទងមក Xavi ចង់ឲ្យទៅធ្វើជាជំនួយការគ្រូបង្វឹករបស់លោក Tite ត្រៀមសម្រាប់ព្រឹត្តិការណ៍ធំ World Cup ២០២២ នៅឆ្នាំក្រោយ។
យ៉ាងណា Xavi បានបដិសេធសំណើទាំង ២ ដោយមិនយល់ព្រមនោះទេ។ នេះបើតាមប្រភពបានបញ្ជាក់ច្បាស់ ហើយក្នុងចិត្តរបស់លោក គឺមានតែក្លឹប ២ គត់ បើមិនបន្តឈរជើងនៅ Al Sadd គឺមានតែផ្ទេរទៅដឹកនាំនៅក្លឹប Barcelona៕
ប្រភព៖ AS