នៅក្នុងវិស័យកីឡាបាល់ទាត់មានការវាយតម្លៃធំៗ ៣ ជារៀងរាល់ឆ្នាំ ដោយរួមមានតម្លៃប្រព័ន្ធកីឡាកររួម តម្លៃយីហោ និងតម្លៃទ្រព្យរួមនៃក្លឹប។
ដោយឡែកថ្មីៗនេះ បើផ្អែកតាមទិន្នន័យពី Brand Finance ក៏បានចេញផ្សាយនូវបញ្ជីឈ្មោះក្លឹបបាល់ទាត់ទាំង ៥០ ដែលមានតម្លៃយីហោថ្លៃបំផុតប្រចាំឆ្នាំ ២០២១ ហើយនៅ Top 10 គឺមានក្លឹប ៣ ដែលបានប្រែប្រួលចំណាត់ថ្នាក់ បើធៀបនឹងឆ្នាំទៅ ២០២០៖
១០) ក្លឹបអង់គ្លេស Arsenal ចំណាត់ថ្នាក់នៅថេរ មានតម្លៃយីហោ ៧៩២ លានដុល្លារ
៩) ក្លឹបអង់គ្លេស Tottenham Hotspur ចំណាត់ថ្នាក់នៅថេរ មានតម្លៃយីហោ ៨៤៩ លានដុល្លារ
៨) ក្លឹបអង់គ្លេស Chelsea ចំណាត់ថ្នាក់នៅថេរ មានតម្លៃយីហោ ៩០៤ លានដុល្លារ
៧) ក្លឹបបារាំង Paris Saint-Germain ចំណាត់ថ្នាក់នៅថេរ មានតម្លៃយីហោ ១ ០៤២ លានដុល្លារ
៦) ក្លឹបអង់គ្លេស Liverpool ធ្លាក់ ២ លេខ មានតម្លៃយីហោ ១ ១៤៣ លានដុល្លារ
៥) ក្លឹបអាល្លឺម៉ង់ Bayern Munich ឡើង ១ លេខ មានតម្លៃយីហោ ១ ២៥៥ លានដុល្លារ
៤) ក្លឹបអង់គ្លេស Manchester City ឡើង ១ លេខ មានតម្លៃយីហោ ១ ៣១៣ លានដុល្លារ
៣) ក្លឹបអង់គ្លេស Manchester United ចំណាត់ថ្នាក់នៅថេរ មានតម្លៃយីហោ ១ ៣២៧ លានដុល្លារ
២) ក្លឹបអេស្ប៉ាញ Barcelona ចំណាត់ថ្នាក់នៅថេរ មានតម្លៃយីហោ ១ ៤៨៧ លានដុល្លារ
១) ក្លឹបអេស្ប៉ាញ Real Madrid ចំណាត់ថ្នាក់នៅថេរ មានតម្លៃយីហោ ១ ៤៩៩ លានដុល្លារ
បើតាមប្រភពពី Brand Finance បានកត់សម្គាល់ថា ហេតុផលដែល Real Madrid បន្តឈរឈ្មោះជាក្លឹបមានតម្លៃយីហោថ្លៃជាងគេបង្អស់នេះ ក៏ដោយសារតែពួកគេអាចរក្សាកៅអីលេងនៅ Champions League ជារៀងរាល់ឆ្នាំនៅទសវត្សចុងក្រោយ ដែលវាដើរតួយ៉ាងសំខាន់ក្នុងការវាយតម្លៃពីភាពជោគជ័យនៃក្លឹបទាំងមូល។
ដោយឡែកក្លឹប Liverpool តាមមើលហេតុផលដែលពួកគេធ្លាក់លេខ ក៏ដោយសារនៅរដូវកាល ២០២០/២១ ក្រុមបានធ្លាក់កូដខ្លាំងនៅការប្រកួតក្នុងក្របខ័ណ្ឌ Premier League ហើយមិនទាន់ធានាបាននូវកៅអីលេង UCL រដូវកាលក្រោយថែមទៀត។
ផ្ទុយពី Man City និង Bayern Munich ពួកគេជោគជ័យខ្លាំង ហើយជាក្លឹបតែ ២ គត់ក្នុងចំណោមក្លឹបទាំង ១០ ដែលមានការកើនឡើងតម្លៃយីហោ ធៀបនឹងឆ្នាំទៅ ខណៈក្លឹបឯទៀតសុទ្ធតែមានការធ្លាក់ចុះ គ្រាន់តែខ្លះចុះថយតិចខ្លះថយច្រើន។ ក្រុមរបស់លោក Pep Guardiola អាចនឹងកើនឡើងចំណាត់ថ្នាក់បន្ថែមទៀតនៅឆ្នាំក្រោយ ប្រសិននៅចុងខែឧសភានេះ ពួកគេអាចជោគជ័យនូវការឈ្នះពានរង្វាន់ Champions League។
ដោយឡែកចំពោះក្លឹបបាល់ទាត់ផ្សេងទៀតមានដូចជា Juventus ឈរនៅលេខ ១១, ក្លឹប Atletico Madrid ឈរនៅលេខ ១៣, ក្លឹប Leicester City ឈរនៅលេខ ១៧ និងក្លឹប Schalke 04 ឈរនៅលេខ ២០ ជាដើម៕
ប្រភព៖ Brand Finance