ការប្រកួតនៅលីគកំពូលទាំង ៥ ប្រចាំតំបន់អឺរ៉ុប នឹងឈានមកដល់វគ្គបញ្ចប់នៅចុងសប្តាហ៍នេះ ហើយយើងក៏នឹងសម្រេចរកឃើញនូវឈ្មោះក្រុមឈ្នះជើងឯក ក៏ដូចជាក្រុមមានកៅអីទៅចូលរួមនៅការប្រកួតពានអឺរ៉ុបរបស់ UEFA នៅរដូវកាលក្រោយ។
ក្នុងចំណោមលីគកំពូលទាំង ៥ គឺមានតែ Bundesliga មួយគត់ ដែលបានសម្រេចរួចរាល់ហើយ ដ្បិតបើការប្រកួតសល់ ១ ជុំទៀតក្តី។ នោះគឺក្រុមឈ្នះជើងឯកបានទៅលើ Bayern Munich ហើយក្រុមអាចលេងនៅ UCL មាន RB Leipzig, Dortmund និង Wolfsburg។
យ៉ងណាអ្វីដែលរង្គោះរង្គើអារម្មណ៍អ្នកគាំទ្រខ្លាំងបំផុតនៅចុងសប្តាហ៍នេះ គឺនៅលីគចំនួន ៤ ផ្សេងទៀត ដែលក្រុមទាំងអស់មានពិន្ទុប្រកៀកប្រកិតគ្នាខ្លាំង តែគ្រប់យ៉ាងក៏នឹងត្រូវសម្រេចត្រឹមរយៈពេល ១ សប្តាហ៍ចុងក្រោយនេះ។
១) ក្របខ័ណ្ឌ La Liga
នៅលីគកំពូលអេស្ប៉ាញ អ្វីដែលអ្នកគាំទ្រទន្ទឹងរង់ចាំចង់ដឹងបំផុតនោះ គឺក្រុមដែលនឹងត្រូវឈ្នះពាន រវាង Atletico Madrid និង Real Madrid។ នៅជុំទី ៣៧ ក្រុមដឹកនាំដោយលោក Diego Simeone មាន ៨៣ ពិន្ទុ ខណៈក្រុមដឹកនាំដោយលោក Zinedine Zidane មាន ៨១ ពិន្ទុ។
លទ្ធផលសម្រេចយើងនឹងបានឃើញនៅយប់ថ្ងៃអាទិត្យទី ២៣ ឧសភា ដោយ Atletico Madrid ត្រូវប៉ះ Valladolid ខណៈ Real Madrid ត្រូវប៉ះ Villarreal។ ក្នុងករណីដែល At ឈ្នះ ពួកគេនឹងក្លាយជាក្រុមឈ្នះពាន ដោយមិនខ្វល់ពីលទ្ធផលរបស់ Real តែបើ At ស្មើ ហើយ Real ឈ្នះ នោះគេនឹងប្រៀបធៀបស្ថិតិ Head To Head ដើម្បីសម្រេចយកក្រុមឈ្នះពាន។ មួយផ្សេងទៀតនៅករណីដែល At ចាញ់ ហើយ Real ឈ្នះ នោះ Real នឹងក្លាយជាក្រុមឈ្នះពាន ដោយនាំមុខ ១ ពិន្ទុ។
២) ក្របខ័ណ្ឌ Ligue 1
ដូចគ្នាទៅនឹង La Liga ដែរ ដោយនៅ Ligue 1 គិតត្រឹមជុំទី ៣៧ ក្រុម Lille កំពុងឈរកំពូលតារាង ដោយមាន ៨០ ពិន្ទុ នាំមុខ ១ ពិន្ទុគត់ទៅលើ PSG។
នៅជុំទី ៣៨ នាយប់រំលងអាធ្រាត្រឈានចូលព្រឹកថ្ងៃចន្ទ ទី ២៤ ឧសភា Lille នឹងត្រូវប៉ះ Angers ខណៈ PSG នឹងត្រូវប៉ះ Brest នៅកាលបរិច្ឆេទតែមួយ។ Lille ដែលខកខានលើកពានតាំងពីឆ្នាំ ២០១១ នឹងអាចឈ្នះពានសារជាថ្មី ក្នុងករណីដែលអាចយកបាន ៣ ពិន្ទុនៅជុំចុងក្រោយ ឬស្មើយកបាន ១ ពិន្ទុ តែក៏ទាមទារឲ្យ PSG ស្មើឬចាញ់នៅជុំចុងក្រោយនោះដែរ។
៣) ក្របខ័ណ្ឌ Serie A
នៅលីគកំពូលអ៊ីតាលី គេដឹងរួចហើយពីក្រុមឈ្នះជើងឯកដែលបានទៅលើ Inter Milan តែក្រុមណាជាប់ Top 4 ខ្លះនោះ គឺពិបាកនឹងស្មាន ព្រោះលំដាប់ពិន្ទុប្រកៀកគ្នាខ្លាំង មិនថាតែក្រុមឈរលេខ ២ Atalanta មកដល់ក្រុមឈរលេខ ៥ Juventus។
ក្នុងចំណោម ៤ ក្រុមមាន Atalanta, Napoli, AC Milan និង Juventus នឹងត្រូវមាន ១ ដែលត្រូវធ្លាក់ទៅលេងនៅ Europa League ហើយសេះបង្កង់គឺជាក្រុមដែលមានភាគរយធ្លាក់ ខ្ពស់ជាងគេបង្អស់បើគិតត្រឹមជុំទី ៣៧ នេះ។ Juventus មាន ៧៥ ពិន្ទុ ចាញ់ AC Milan ១ ពិន្ទុ ចាញ់ Napoli ២ ពិន្ទុ និងចាញ់ Atalanta ៣ ពិន្ទុ។ បើសួរថា Juventus រំពឹងអាចជាប់ Top 4 បានដោយរបៀបណានោះ? ចម្លើយ៖ គឺដាច់ខាត Juventus ត្រូវតែឈ្នះ ហើយរង់ចាំអ៊ុតមើលលទ្ធផលប្រកួតរបស់ក្រុមទាំង ៣ បើពួកគេស្មើ ឬចាញ់ នោះគឺបានឡើង តែបើពួកគេឈ្នះនៅជុំចុងក្រោយទី ៣៨ នោះពាក្យថា “Ronaldo ត្រូវទៅលេងនៅ Europa League” គឺប្រាកដជាកើតមានហើយនៅរដូវកាលក្រោយ។
៤) ក្របខ័ណ្ឌ Premier League
Man City គេក្លាយជាក្រុមឈ្នះជើងឯក លែងខ្វល់ពីនរណាហើយ ខណៈ Man Utd ក៏លំដាប់ពិន្ទុរបស់គេ អាចធានាបានថានឹងឈរ Top 4 ១០០ ភាគរយដែរ។ នៅឡើយតែ Leicester City, Chelsea និង Liverpool ដែលកំពុងខ្វល់ចិត្ត ព្រោះមាន ១ ក្នុងចំណោម ៣ ត្រូវធ្លាក់ទៅលេងនៅ Europa League។
គិតត្រឹមជុំទី ៣៦ Liverpool សង្ឃឹមទាបជាងគេ ព្រោះហង្សកំពុងឈរនៅលេខ ៥ មាន ៦៣ ពិន្ទុ ខណៈ Chelsea មាន ៦៤ ពិន្ទុ និង Leicester City មាន ៦៦ ពិន្ទុ។ ការប្រកួត ២ ជុំចុងក្រោយនឹងកើតឡើងក្នុងសប្ដាហ៍តែមួយ ដោយ៖
Leicester City ត្រូវប៉ះ Chelsea នៅថ្ងៃពុធ ហើយប៉ះ Tottenham នៅថ្ងៃអាទិត្យ
Chelsea ត្រូវប៉ះ Leicester នៅថ្ងៃពុធ ហើយប៉ះ Aston Villa នៅថ្ងៃអាទិត្យ
Liverpool ត្រូវប៉ះ Burnley នៅថ្ងៃព្រហស្បតិ៍ ហើយប៉ះ Crystal Palace នៅថ្ងៃអាទិត្យ
លទ្ធផលនៅ Premier League ចុងក្រោយនេះ យើងសុំឲ្យអ្នកគាំទ្រ CTS Sports ធ្វើការទស្សន៍ទាយដោយផ្ទាល់តែម្តង ថាតើក្រុមណាមួយដែលនឹងត្រូវធ្លាក់ទៅលេងនៅ Europa League នារដូវកាលក្រោយ អាចជា Leicester City, Chelsea ឬក៏ Liverpool?
ប្រភព៖ BRFootball