លោក Oriol Segura គ្រូបង្វឹកក្រុមអង្គរថាយហ្គឺរនៅតែរំពឹងថា ក្រុមខ្លួននឹងធ្វើបានល្អប្រសើរ ក្នុងជំនួបធំៗ នារដូវកាលនេះ ពិសេសគឺការប្រកួតបន្ទាប់ជាមួយក្រុមការពារដំណែងជើងឯក ២០២០ ក្រុមបឹងកេត នាសប្ដាហ៍ក្រោយ នៃក្របខ័ណ្ឌលីគកំពូលកម្ពុជា រដូវកាល ២០២១នេះ។
គ្រូបង្វឹកសញ្ជាតិអេស្ប៉ាញរូបនេះបានលើកឡើងថា ទោះបីជារាល់លើក ក្រោយពេលត្រឡប់ពីសម្រាកវិញ ដោយសារជំងឺកូវីដ-១៩ តែងតែមានភាពស្មុកស្មាញយ៉ាងណាក្ដី ក៏អង្គរថាយហ្គឺរតែងតែរៀបចំក្រុមជាមួយការប្ដេជ្ញាចិត្តខ្ពស់ ក្នុងការប្រកួតប្រជែងជាបន្តបន្ទាប់ទល់នឹងក្រុមបឹងកេត លើទឹកដីរបស់ខ្លួន និងប្រកួតបន្តបន្ទាប់ ដើម្បីប្រជែង ចំណាត់ថ្នាក់ល្អ ក្នុងរដូវកាល២០២១នេះ។
លោកបន្ថែមថា កូនក្រុមរបស់ខ្លួនតែងតែបង្ហាញការគោរពខ្ពស់ និងមានវិន័យជាក្រុម ដែលទាំងអស់នេះគឺជាស្មារតីស្នូល ក្នុងការជួយបង្កើនឱ្យក្រុមខ្លួនមានភាពល្អប្រសើរ នៅក្នុងការប្រកួតធំៗ ក្នុងរដូវកាលនេះ។ ទោះយ៉ាងណាបច្ចុប្បន្ន គឺជាពេលត្រូវធ្វើការត្រៀមខ្លួនឲ្យបានល្អ និងណែនាំកីឡាករគ្រប់រូបឱ្យយល់ថា អំឡុងពេលប្រកួតពួកគេត្រូវតែមានការខិតខំប្រឹងប្រែងខ្ពស់ និងមានស្មារតីរឹងពឹង ក្នុងការប្រកួតជានិច្ច ។
លោក Oriol Segura បានសម្ដែងក្ដីរីករាយ ចំពោះការប្រកួតត្រឡប់មកវិញ ដើម្បីមានឱកាសប្រកួតប្រជែងជាថ្មី ពិសេសគឺការការប្រកួតជាមួយក្រុមខ្លាំងៗ ដែលវាជាពេលមួយបង្ហាញទៅគ្រប់គ្នាថា ក្រុមអង្គរថាយហ្គឺរ ពិតជាក្រុមមួយដ៏អស្ចារ្យ។បច្ចុប្បន្នអង្គរថាយហ្គឺរកំពុងឈរកំពូលតារាងបណ្ដោះអាសន្ន នៃលីគកំពូលកម្ពុជា បន្ទាប់ពីឆ្លងកាត់៤ប្រកួតឈ្នះ ៣ និងស្មើ១ រកបាន១០ពិន្ទុ។
ចំពោះប្រកួតបន្ទាប់ ក្រោយផ្អាកមួយរយៈ ដោយសារវិបត្តិកូវីដ-១៩ ព្រឹត្តិការណ៍សហគន៍២០កុម្ភៈ និងការបិទខ្ទប់នោះ ក្រុមមានមូលដ្ឋាននៅខេត្តសៀមរាបនេះនឹងត្រូវបើកទ្វារកីឡដ្ឋាន SRU ទទួលក្រុមការពារតំណែងជើងឯកបឹងកេតមុនគេ នាថ្ងៃទី២៣ ខែឧសភា ឆ្នាំ២០២១ ខាងមុខ៕