Arjan “Singh” Bhullar បានបង្កើតកំណត់ត្រាជាប្រវត្តិសាស្ត្រថ្មីនៅព្រឹត្តិការណ៍ ONE: DANGAL។ បុរសវ័យ ៣៤ ឆ្នាំសញ្ជាតិឥណ្ឌាបានបញ្ចប់ម្ចាស់ខ្សែក្រវាត់ទម្ងន់ធ្វន់ heavyweight កីឡាករ Brandon “The Truth” Vera ដោយការផ្ដួលឲ្យសន្លប់នៅទឹកទី២ និងក្លាយជាម្ខាស់ខ្សែក្រវាត់ ONE Heavyweight ថ្មីនៅល្ងាចថ្ងៃទី ១៥ ខែ ឧសភា ម្សិលមិញនេះ។
ជ័យជម្នះនេះ នាំឲ្យ Bhullar ក្លាយជាកីឡាករគុនចម្រុះឥណ្ឌាដំបូងគេដែលឈ្នះខ្សែក្រវាត់កម្រិតពិភពលោកនៅ ONE Championship ។គ្រាន់តែស្នូរកណ្ដឹងចាប់ផ្ដើមភ្លាមៗ អ្នកលេងគុនចម្រុះទម្ងន់ធ្ងន់ heavyweights ទាំងពីរចាប់ផ្ដើមបញ្ចេញសាច់ដុំដោយការប្រើក្បាច់ឈរ។
Bhullar មើលទៅខំរិះរកវិធីដើម្បីដើរចូលរហូតខណៈដែល កីឡាករហ្វីលីពីន-អាមេរិក ប្រើស្នៀតដូចរាល់ដង គឺ វាយបកមួយៗសងវិញអមដោយការទាត់ក្រោមដើម្បីគំរាមដល់គូប្រជែង។ “Singh” នៅតែបន្តដើរចូល ដោយប្រើកណ្ដាប់ដៃឆ្វេង និង ថែមស្ដាំមួយដៃចំគោលដៅដែលធ្វើឲ្យម្ចាស់ខ្សែក្រវាត់ផ្ងាកទៅរេញ។
ហើយបន្ទាប់មកបុរសឥណ្ឌាមិនសន្ធាប់ពេកទេ ប៉ុន្តែ រូបគេខិតខំស្វែងរកចន្លោះប្រហោង ឬ បម្លាស់ទីដើម្បីគាបសង្កត់ Vera។ “The Truth” ក៏ចាប់ផ្ដើមតាំងចិត្តឡើងវិញនិងបានប្រើកណ្ដាប់ដៃសំដៅលើ “Singh” ខ្លះដែរ។ នៅសល់ ២ នាទីមុនបញ្ចប់ទឹក “Singh” បានហក់ទៅផ្ដួល Vera ប៉ុន្តែ កីឡាករហ្វីលីពីនគាបដៃ កីឡាករឥណ្ឌាជាប់។ ពួកគេមិនធ្វើអ្វីគ្នាបានទេ រហូតដល់ចប់ទឹកទី១។
ពេលចូលទឹកទី២ កីឡាករទាំងពីរ ប្រើវិធីវ៉ៃឈរដដែល។ Bhullar នៅតែដើរចូលដើម្បីគាបសង្កត់ម្ចាស់ខ្សែក្រវាត់ ប៉ុន្តែ Vera ប្រើជើងឆ្វេងស្ដាំដើម្បីទាត់ក្រោមគំរាមកំហែងដល់កីឡាករឥណ្ឌាកុំឲ្យហ៊ានចូលទៀត។ មិនយូរប៉ុន្មាន Bhullar ប្រើកណ្ដាប់ដៃពេញចូលផ្ទៃមុខរបស់ Vera ដែលនាំឲ្យម្ចាស់ខ្សែក្រវាត់សឺៗ ហាក់បាត់ស្មារតី។
បន្ទាប់កីឡាករហ្វីលីពីន-អាមេរិក រងកណ្ដាប់ដៃពេញចូលពោះទឹកម្ដងទៀត ពី Bhullar។ រំពេចនោះកីឡាករឥណ្ឌាហក់ចូលចាប់ម្ចាស់ខ្សែក្រវាត់ឲ្យដួល និងបន្តជំហរនៅពីលើស្របគ្នា (Vera ក្រាបអោនមុខ)។
Bhullar ខំប្រឹងប្រែងទប់ដើម្បីកុំឲ្យ Vera រើរួច ហើយកៀរដៃគូប្រកួតចេញដើម្បីប្រើកណ្ដាប់ដៃឆ្វេងស្ដាំស្របពេលជើង គាបយ៉ាងណែន។ ទីបំផុត អ្នកលេងគុនចម្រុះឥណ្ឌាខំសំពងកណ្ដាប់ដៃ ហើយសំពងទៀត រហូតដល់អាជ្ញាកណ្ដាលចូលឃាត់តែម្ដង។តារាទម្ងន់ធ្ងន់ឥណ្ឌា
ផ្ដួល Vera ឲ្យសន្លប់ដោយបច្ចេកទេស បន្ទាប់ពីអាជ្ញាកណ្ដាល Justin Brown ហក់ទៅឃាត់នៅនាទីទី ៤:២៧ នៃទឹកទី២។ ជ័យជម្នះធ្វើឲ្យគេសម្រេចដូចអ្វីដែលរូបគេតាំងចិត្តមុនឡើងប្រកួតអីចឹង ជាពិសេសការប្រើក្បាច់ចំបាប់គាបជើង និង កណ្ដាប់ដៃធ្ងន់មហាសាលរបស់ខ្លួនដើម្បីបញ្ចប់ម្ចាស់ខ្សែក្រវាត់។
ក្នុងជ័យជម្នះជាប្រវត្តិសាស្ត្រនេះ Bhullar បញ្ចប់ម្ចាស់ខ្សែក្រវាត់ទម្ងន់ធ្ងន់ដែលបានគ្រងខ្សែក្រវាត់នេះ ៥ ឆ្នាំកន្លះមកហើយ និងក្លាយជាម្ចាស់ខ្សែក្រវាត់ ONE Heavyweight ទី២ប្រចាំស្ថាប័ននេះ។
ពេលក្លាយជាកីឡាករឥណ្ឌាទី១ គ្រងខ្សែក្រវាត់លំដាប់ពិភពលោក វាបើកផ្លូវមួយសម្រាប់កីឡាករឥណ្ឌាជំនាន់ក្រោយដើម្បីជំរុញឲ្យពួកឈានជើងចូលទីផ្សារ និង ប្រកួតលំដាប់អន្តរជាតិនានា។