លោក Jorge Mendes ភ្នាក់ងារទីផ្សាររបស់ Cristiano Ronaldo បានបដិសេធថាមិនអាចទៅរួចនោះទេ ដែលខ្សែប្រយុទ្ធរូបនេះនឹងត្រលប់ទៅលេងនៅ Sporting វិញនារដូវក្ដៅខាងមុខ។
កាលពីម្សិលមិញនេះ អ្នកស្រី Dolores Aveiro ម្ដាយរបស់ Ronaldo បាននិយាយថានឹងនាំកូនប្រុសទៅលេងនៅប្រទេសព័រទុយហ្គាល់វិញហើយ ក្រោយពីចំណាយពេលជាច្រើនឆ្នាំលេងនៅក្រៅស្រុកមក។ យ៉ាងណាមិញ ដំណឹងនេះពិតជាបង្កភាពភ្ញាក់ផ្អើលជាខ្លាំង ព្រោះកម្រិតលេងរបស់អតីតកីឡាករ Real Madrid រូបនេះនៅខ្ពស់នៅឡើយ មិនសមណាទៅលេងនៅ Sporting វិញនោះទេ។
ដើម្បីបញ្ចប់មន្ទិលទាំងឡាយ ពេលនេះលោក Mendes ដែលជាភ្នាក់ងារទីផ្សារខ្សែប្រយុទ្ធ Juventus នេះ បានចេញមុខមកអះអាងថាវាមិនអាចទៅរួចឡើយ។ Ronaldo កំពុងសប្បាយចិត្តនិងបន្ដចង់លេងនៅលីគធំៗបន្ដទៀត មិនទាន់គិតដល់ទៅលេងនៅស្រុកកំណើតវិញឡើយ៕ប្រភព៖ GOAL
