ការប្រកួតពានរង្វាន់ធំរបស់អឺរ៉ុប Euro នឹងចាប់ផ្ដើមលេងនៅពាក់កណ្ដាលខែក្រោយនេះហើយ ក្រោយពីបានលើកពេលពីឆ្នាំមុន មកលេងឆ្នាំនេះវិញ។
ពានរង្វាន់ដែលមានសុទ្ធតែក្រុមខ្លាំងៗនៅអឺរ៉ុបលេងនេះ ត្រូវបានលោក Luis Enrique គ្រូបង្វឹកក្រុមជម្រើសជាតិអេស្ប៉ាញមានទំនុកចិត្តថាកូនក្រុមរបស់លោកនឹងធ្វើបានល្អជាក់ជាមិនខាន។ អតីតគ្រូបង្វឹករបស់ក្រុម FC Barcelona រូបនេះ ថែមទាំងជឿជាក់ថាសមត្ថភាពរបស់ក្រុមអេស្ប៉ាញពេលនេះ គឺអាចឈ្នះពានរង្វាន់នេះបានថែមទៀត។
ការប្រកួតពានរង្វាន់ Euro ឆ្នាំនេះមាន២៤ក្រុមចូលរួម ហើយការប្រកួតវិញប្រើទីលានរហូតដល់ទៅ១២ទីលានផ្សេងគ្នាឯណោះទៅតាមប្រទេសនានានៅអឺរ៉ុប។ ដោយវគ្គផ្ដាច់ព្រ័ត្រនឹងត្រូវធ្វើឡើងនៅប្រទេសអង់គ្លេស។ ការប្រកួតមិនខុសពីលើកមុននោះទេ ដែលបែងចែកជា៦ពូល ១ពូលមាន៤ក្រុម ប្រកួតសន្សំពិន្ទុ ដើម្បីស្វែងរកក្រុម១៦ចុងក្រោយ៕ប្រភព៖ MARCA
