បន្ទាប់ពី Edinson Cavani សម្រេចបន្តកុងត្រាថ្មីជាមួយក្លឹប Man Utd បន្ថែមរយៈពេល ១ ឆ្នាំទៀត នោះក៏នាំឲ្យឈ្មោះរបស់គេផុតចេញពីបញ្ជីកីឡាករត្រៀមទំនេរជើងនៅរដូវក្តៅខាងមុខ។ យ៉ាងណាក៏នៅសេសសល់កីឡាករកំពូលៗជាច្រើនទៀត ដែលខ្លះប្រកាសរួចជាស្រេចហើយថានឹងចាកចេញ និងខ្លះទៀតនៅស្ទាក់ស្ទើរមិនដឹងថា នឹងបន្តឬជ្រើសយកផ្លូវចាកចេញ។
ក្នុងអត្ថបទនេះ CTS Sports នឹងធ្វើការលើកមកបង្ហាញនូវឈ្មោះកីឡាករឆ្នើម ៨ រូប ដែលត្រូវផុតកុងត្រានៅចុងខែមិថុនាខាងមុខ ហើយបង្ហើបពីឈ្មោះក្លឹបថ្មី ដែលពួកគេអាចនឹងផ្ទេរទៅចូលរួម៖
៨) Jerome Boateng
ក្រោយចាយពេល ១០ ឆ្នាំ ទីបំផុតពេលវេលាខ្សែការពារកណ្តាល Boateng ជាមួយនឹងក្លឹបអាល្លឺម៉ង់ ក៏ឈានមកដល់ទីបញ្ចប់។ ភាគរយទាបណាស់ដែលបុរសវ័យ ៣២ ឆ្នាំ អាចទទួលបានកុងត្រាថ្មីពីក្លឹប Bayern Munich។ យ៉ាងណាគេក៏ប្រហែលជាជ្រើសយកដំណើរផ្សងព្រេងថ្មី នៅឯទឹកដីអង់គ្លេស ដោយរួមមានក្លឹប Tottenham, Chelsea ឬអាចជា Arsenal។
៧) Lucas Vazquez
បុរសវ័យ ២៩ ឆ្នាំលេចលឺថាចង់បានប្រាក់ពលកម្មខ្ពស់ជាងមុន លើកុងត្រាថ្មីដែល Real ផ្តល់ឲ្យ តែការដំឡើងប្រាក់ពលកម្មនៅពេលនេះ គឺវាពិតជាមិនអាចកើតឡើងបានឡើយ។ បែបនេះខ្សែបម្រើសញ្ជាតិអេស្ប៉ាញ ក៏សម្លឹងមើលការចាកចេញ ហើយទ្រនំចំនួន ៥ ដែលស្ថិតក្នុងចចាមអារ៉ាមចង់បានគេ រួមមាន Leeds United, Everton, Tottenham, AC Milan និង Bayern Munich។
៦) Gianluigi Donnarumma
ជាអ្នកចាំទីវ័យក្មេង ដែលពោរពេញដោយគុណភាពនិងបទពិសោធន៍ក្រាស់ក្រែលជាមួយក្លឹប AC Milan។ យុវជនវ័យ ២២ ឆ្នាំ តាមថាត្រូវមានតម្លៃផ្ទេរចេញរាប់សិបលានឯណោះ តែដោយសារសុពលភាពកុងត្រារបស់គេឈានមកដល់ទីបញ្ចប់ ហើយគេបដិសេធមិនបន្តកុងត្រាថ្មីរយៈពេល ២ ឆ្នាំជាមួយ AC Milan ផងនោះ ក៏នាំឲ្យគេនឹងមានឈ្មោះជាកីឡាករឥតតម្លៃខ្លួននៅពេលខាងមុខ។ ក្លឹបថ្មី ៤ ដែលអាចចរចាយក Donnaruma រួមមាន Juventus, Manchester United, Real Madrid និង Chelsea។
៥) Georginio Wijnaldum
ខ្សែបម្រើរបស់ Liverpool បានស្ថិតក្នុងចចាមអារ៉ាមនៅការផ្ទេរទៅ Barcelona ច្រើនខែមកហើយ ក៏ដោយសារតែមានលោក Ronald Koeman ជាអ្នកចាត់ការរួមសញ្ជាតិកំពុងឈរជើង។នៅទីនោះ។ យ៉ាងណាក្លឹបម្ចាស់ដី Anfield ក៏លឺថាបានផ្តល់កុងត្រាថ្មីឲ្យកីឡាករហូឡង់ដែរ តែសាមីខ្លួនគេបដិសេធចង់ដើរចេញដោយឥតតម្លៃខ្លួននៅពេលខាងមុខ ហើយជឿជាក់ថា អ្នកមានបុណ្យប្រាកដជាសម្រេចការចរចានាំយកគេ មកទឹកដី Camp Nou ជាក់ជាមិនខាន។
៤) Memphis Depay
កីឡាករហូឡង់រូបនេះ ក៏នឹងផុតកុងត្រាជាមួយក្លឹប Lyon នៅចុងខែមិថុនាខាងមុខដូចគ្នា ហើយគេកំពុងស្ថិតក្នុងគោលដៅចង់បានរបស់ក្លឹបធំ ២ រួមមាន Liverpool និង Barcelona។ យ៉ាងណាមានភាគរយច្រើន គឺ Barcelona នឹងអាចយកបានខ្សែប្រយុទ្ធវ័យ ២៧ ឆ្នាំ ព្រោះក្លឹបមិនចាំបាច់ចំណាយលុយលើតម្លៃផ្ទេរ ដោយត្រឹមចរចាលើថ្លៃពលកម្មប៉ុណ្ណោះ។
៣) Sergio Ramos
ជា Legend កាន់ឆ្នាំមួយរូបនៅក្លឹប Real Madrid តែដោយសារបញ្ហាហិរញ្ញវត្ថុដែលក្លឹបមិនអាចចំណាយតាមតម្រូវការដែល Ramos ចង់បាន ក៏នាំឲ្យចចាមអារ៉ាមនៃការចាកចេញកាន់តែផ្ទុះខ្លាំងឡើង។ មានតែក្លឹប ២ ប៉ុណ្ណោះ ដែលអាចមានលទ្ធភាពឆ្លើយតបទៅនឹងតម្រូវការនៃថ្លៃពលកម្មដែលកីឡាករអេស្ប៉ាញចង់បាន ដោយរួមមាន Paris Saint-Germain និង Manchester United។
២) Sergio Aguero
Man City បានប្រកាសជាផ្លូវការហើយថា Aguero នឹងចាកចេញនៅបញ្ចប់រដូវកាល។ កីឡាករអាហ្សង់ទីនជាប់ឈ្មោះ ជាម៉ាស៊ីនបញ្ចប់ទីរកបានគ្រាប់បាល់ច្រើនបំផុតប្រចាំក្លឹប Man City បែបនេះវត្តមានរបស់គេ នឹងមិនទំនេរជើងលើទីផ្សារដោះដូរបានយូរនោះទេ។
ក្លឹបធំៗជាច្រើនសម្លឹងឃើញការចុះហត្ថលេខាយកគ្រាប់ពេជ្ររបស់មេឃខៀវ ដោយការផ្ទេរឥតតម្លៃខ្លួន រួមមានក្លឹប Chelsea, Barcelona, Real Madrid និង PSG។
១) Lionel Messi
ចម្លើយនៃអនាគតរបស់ Messi នឹងត្រូវបានលាតត្រដាងយូរបំផុតត្រឹមចុងខែឧសភានេះ ដោយប្រសិនណាគេចាកចេញនោះ វានឹងក្លាយជាការបាត់បង់ដ៏ធំធេងមួយសម្រាប់ក្លឹប Barcelona តែប្រសិនគេបន្តនៅ ក៏ស្មើនឹងគេសម្រេចចិត្តឈរជើងឲ្យក្លឹបអេស្ប៉ាញពេញមួយអាជីព។
គុណភាពរបស់ Messi នៅតែមាន តែអ្វីដែលជាបញ្ហាគឺការចំណាយលើថ្លៃពលកម្មដែលមួយឆ្នាំត្រូវផ្តល់ឲ្យ M10 ប្រមាណ ១០៧ លានផោន។ មានក្លឹបមិនច្រើននោះទេ ដែលអាចមានលទ្ធភាពផ្តល់ឲ្យកីឡាករអាហ្សង់ទីននូវប្រាក់ដ៏ច្រើនសន្ធឹកបែបនេះ ពោលគឺមានតែ Paris Saint-Germain និង Manchester City តែប៉ុណ្ណោះ៕
ប្រភព៖ AF