ខ្សែប្រយុទ្ធ Edinson Cavani បានសម្រេចបន្ដកុងត្រា១ឆ្នាំទៀតជាមួយក្លឹបបិសាចក្រហម Manchester United ហើយ ជាមួយតម្លៃពលកម្ម ២៥០ ០០០ផោនក្នុង១សប្ដាហ៍។
កាលពីប៉ុន្មានសប្ដាហ៍មុននោះ មានដំណឹងថាអតីតកីឡាករ PSG ចង់ចាកចេញពីអង់គ្លេសទៅលេងនៅស្រុកកំណើតវិញហើយ ព្រោះរូបគេមិនចូលចិត្តការរស់នៅអង់គ្លេសនោះទេ។ តែបន្ទាប់ពីមានការបញ្ចុះបញ្ចូល និងទម្រង់លេងក្រុមបានល្អផងនោះ ក៏ស្រាប់តែរូបគេប្ដូរចិត្តវិញ ហើយក៏សម្រេចបន្ដកុងត្រា១ឆ្នាំទៀតជាមួយក្រុមបិសាចក្រហម។
រកបាន៨គ្រាប់ក្នុងការលេង៩ប្រកួតចុងក្រោយឱ្យ Man Utd កន្លងមកនេះ Cavani ត្រូវបានអ្នកគាំទ្រពេញចិត្តយ៉ាងខ្លាំង។ រហូតដល់ការបន្ដកុងត្រា១ឆ្នាំទៀតនេះ គឺមានតម្លៃពលកម្ម ២៥០ ០០០ផោនក្នុង១សប្ដាហ៍ឯណោះ។ ខណៈដែលកុងត្រាចាស់កន្លងទៅ របស់ខ្សែប្រយុទ្ធវ័យ៣៤ឆ្នាំនេះ គឺ ២០០ ០០០ផោនក្នុង១សប្ដាហ៍៕
ប្រភព៖ dailymail