ការរៀបចំរបស់ក្រុមជម្រើសជាតិថៃដែលត្រូវប្រឈមមុខនឹងការប្រកួតជម្រុះ World Cup ឆ្នាំ ២០២២ នាខែមិថុនាត្រូវផ្អាក នៅពេលដែលកីឡាករ ២ នាក់និងបុគ្គលិក ៤ នាក់បានធ្វើតេស្តិ៍វិជ្ជមានកូវីដ១៩ ក្នុងការធ្វើតេស្ដលើកចុថងក្រោយលើក្រុមទាំងមូលកាលពីព្រឹកមិញ។
ជាលទ្ធផលកម្មវិធីហ្វឹកហាត់របស់ពួកគេត្រូវបានផ្អាក ហើយកីឡាករទាំងអស់ត្រូវធ្វើចត្តាឡីស័ករហូតដល់ពួកគេទទួលបានលទ្ធផលអវិជ្ជមានឡើងវិញ នៅក្នុងការធ្វើតេស្តិ៍បន្ទាប់។
កន្លងមកកីឡាករ និងមន្ត្រីទាំងអស់របស់ក្រុមបានទទួលការចាក់វ៉ាក់សាំងរួចហើយ ហើយគេរំពឹងថាស្ថានភាពនឹងប្រសើរឡើងរហូតដល់ពួកគេចាកចេញទៅ UAE នៅថ្ងៃទី ២១ ខែឧសភាឆ្នាំ ២០២១ ។
អវត្តមាននៃការហ្វឹកហាត់រយៈពេលជាច្រើនថ្ងៃក៏ជះឥទ្ធិពលដល់កម្រិតកាយសម្បទា និងទម្រង់លេងរបស់កីឡាករថៃ ខណៈដែលឱកាសរបស់ពួកគេក្នុងការទទួលបានកៅអីស្វ័យប្រវត្តិសម្រាប់ព្រឹត្តិការណ៍អាស៊ីឆ្នាំ ២០២៣ កាន់តែខើចទៅៗ។ តាមពិតរដូវកាល Thai League ២០២០/២០២១ បានផ្អាករួចទៅហើយចាប់តាំងពីខែមុន ហើយកីឡាកររបស់ជម្រើសជាតិថៃមិនបានលេងក្នុងការប្រកួតប្រជែងលីគអស់រយៈពេលជាច្រើនសប្តាហ៍។
ក្រុមរបស់លោក Akira Nishino បច្ចុប្បន្នស្ថិតនៅចំណាត់ថ្នាក់លេខ ៣ ក្នុងពូល G នៅពីក្រោយវៀតណាម និងម៉ាឡេស៊ី។ ពួកគេត្រូវការយ៉ាងហោចណាស់ ៧ ពិន្ទុដើម្បីស្ថិតនៅក្នុងតារាងចំណាត់ថ្នាក់ល្អបំផុតទី ២ ។
ទោះយ៉ាងណា! គោលដៅបានក្លាយជាការលំបាកកាន់តែខ្លាំងឡើង ដើម្បីសម្រេចបានបន្ទាប់ពីជំរំហ្វឹកហាត់របស់ពួកគេ ត្រូវបានរំខានដោយការរីករាលដាលនៃការរាតត្បាតកូវីដ១៩។ បច្ចុប្បន្នប្រទេសថៃមានអ្នកឆ្លងកូវីដ១៩ ជិត ២០០០ ករណីក្នុងមួយថ្ងៃ ហើយក្នុងពេលដំណាលគ្នានេះដែរ ករណីនេះបានធ្វើឲ្យមានហានិភ័យឱ្យកីឡាករនិងមន្ត្រីក្រុមមួយចំនួនឆ្លងជំងឺនេះមុនពេលចាកចេញទៅប្រទេសអារ៉ាប់រួម៕