អគ្គលេខាធិការ CAMSOC បានអះអាងថា គិតរាប់ចាប់ពីថ្ងៃទី០៥ ខែឧសភា ២០២១ រហូតដល់ថ្ងៃទី០៥ ឧសភា ២០២៣ គឺជាខួបរាប់ថយក្រោយ ២ឆ្នាំពេញ នៃព្រឹត្តិការណ៍កីឡាស៊ីហ្គេម លើកទី៣២ និងអាស៊ានប៉ារ៉ាហ្គេម (កីឡាជនពិការ) (SEA GAMES-ASEAN PARA GAMES 2023) ដែលព្រះរាជាណាចក្រកម្ពុជាកំពុងតែបោះជំហានប្រកបដោយភាពជឿជាក់ ម៉ឺងម៉ាត់ ហ្មត់ចត់លើគ្រប់ផែនការសកម្មភាពការងាររបស់ខ្លួន ដើម្បីសម្រួចគោលដៅដ៏ធំចម្បងរបស់ខ្លួនឱ្យទទួលបានជោគជ័យជាប្រវត្តិសាស្ត្រជាលើកដំបូងនៃព្រឹត្តិការណ៍កីឡាថ្នាក់តំបន់មួយនេះ។
ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ ហៅកាត់ គ.ជ.ប.អ (CAMSOC) បានបញ្ជាក់ថា ២ឆ្នាំ គឺជាពេលវេលាសេសសល់ សម្រាប់ CAMSOC រួមចិត្ត រួមគិត រួមធ្វើ រួមទទួលខុសត្រូវ ហើយ ថ្ងៃនេះ ២ឆ្នាំឆ្ពោះទៅទទួលរៀបចំធ្វើជាម្ចាស់ផ្ទះ ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣។ ឯកឧត្ដមបានបន្ដថា ដើម្បីត្រៀមព្រឹត្តិការណ៍ដ៏ធំប្រចាំតំបន់មួយនេះ កម្ពុជាបានត្រៀមខ្លួនជាច្រើនឆ្នាំ ដោយសារតែនេះគឺជាការរៀបចំជាលើកដំបូង ពោលគឺកម្ពុជាបានចាប់ផ្តើមចេញដំណើរចាប់តាំងពីឆ្នាំ២០១៦មកម្លេះ ដែលរាជរដ្ឋាភិបាលកម្ពុជាបានបង្កើតគណៈកម្មាធិការជាតិ CAMSOC ដែលមានមានសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC។
ការប្រកួតកីឡាស៊ីហ្គេម លើកទី៣១ និងអាស៊ានប៉ារ៉ាហ្គេម ចុងឆ្នាំ២០២១ នឹងត្រូវប្រារព្ធធ្វើនៅប្រទេសវៀណាមរួចហើយ ដែលនឹងចូលមកដល់ ស៊ីហ្គេម លើកទី៣២-អាស៊ានប៉ារ៉ាហ្គេម លើកទី១២ ឆ្នាំ២០២៣ នៅកម្ពុជាហើយ។ ឯកឧត្ដមបានបន្ដទៀតថា ព្រឹត្តិការណ៍កីឡារៀងរាល់២ឆ្នាំម្តងនេះតែងតែរៀបចំ ស៊ីហ្គេម និងការប្រកួតកីឡាជនពិការ អាស៊ានប៉ារ៉ាហ្គេម ចន្លោះពីគ្នាប្រមាណ២សប្តាហ៍ លើកលែងតែការប្រកួតអាស៊ានប៉ារ៉ាហ្កេម លើកទី១០ នៅប្រទេសហ្វីលីពីន កាលពីចុងឆ្នាំ២០១៩និងដើមឆ្នាំ២០២០
ត្រូវបានលុបចោលដោយសារបញ្ហាម្ចាស់ផ្ទះហ្វីលីពីនពន្យាពេលរហូតដល់ពេលផ្ទះកូវីដ-១៩ ជាសកលតែម្តង។ ចំពោះការត្រៀមទទួលធ្វើម្ចាស់ផ្ទះ ស៊ីហ្គេម ឆ្នាំ២០២៣ គឺកម្ពុជាត្រៀមប្រភេទកីឡាចន្លោះពី៣០ ទៅ៣៥ប្រភេទកីឡា ដើម្បីដាក់ឱ្យបណ្តាប្រទេសក្នុងអាស៊ីអាគ្នេយ៍ចូលរួមប្រកួតប្រជែងមេដាយ ហើយពហុកីឡដ្ឋានជាតិមរតកតេជោ ស្ថិតក្នុងខណ្ឌជ្រោយចង្វារ រាជធានីភ្នំពេញ នឹងរៀបចំធ្វើជាកន្លែងប្រារព្ធពិធីបើក-បិទស៊ីហ្គេម ឆ្នំា២០២៣ និងជាកន្លែប្រកួតលើប្រភេទកីឡាមួយចំនួនផងដែរ។
កាលពីស៊ីហ្គេម លើកទី៣០ ឆ្នាំ២០១៩ នៅប្រទេសហ្វលីពីន គឺកម្ពុជាដណ្តើមបានមេដាយមាស០៤គ្រឿង ប្រាក់០៦គ្រឿង និងសំរឹទ្ធិ៣០គ្រឿង សរុប ៤៦គ្រឿង ដោយកម្ពុជាឈរនៅចំណាត់ថ្នាក់លេខ៨ ក្នុងចំណោម១១ប្រភេទក្នុងអាស៊ីអាគ្នេយ៍។ ចំពោះស៊ីហ្គេម ឆ្នាំ២០២១ នៅប្រទេសវៀតណាម គឺកម្ពុជាចាត់ទុកថាជាហ្គេមយុទ្ធសាស្ត្រចុងក្រោយ ដើម្បីឆ្ពោះទៅរៀបចំស៊ីហ្គេម ឆ្នាំ២០២៣នៅកម្ពុជា។
កម្ពុជាធ្លាប់បានប្រារព្ធពិធីរាប់ថយក្រោយ១០០០ថ្ងៃជាផ្លូវការ កាលពីថ្ងៃទី០៧ ខែសីហា ឆ្នាំ២០២០ នៅពហុកីឡដ្ឋានជាតិមរតកតេជោ ខណ្ឌជ្រោយចង្វារ រាជធានីភ្នំពេញ ក្រោមអធិបតីភាពដ៏ខ្ពង់ខ្ពស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC ព្រមទាំងស្ថានតំណាងអង្គទូតនានា និងភ្ញៀវអន្តរជាតិនានា ដើម្បីប្រកាសសជាផ្លូវការពីដំណើរឆ្ពោះទៅរៀបចំស៊ីហ្គេម-អាស៊ានប៉ារ៉ាហ្គេម ២០២៣៕