សហព័ន្ធកីឡាបាល់ទាត់កម្ពុជា FFC បានបង្ហាញនូវសកម្មភាពហ្វឹកហាត់ជាប់ជាប្រចាំ នៅសាលាបាល់ទាត់ជាតិបាទី ខេត្តតាកែវ ហើយលោក Kazunori Inoue គ្រូបង្វឹកយុវជនអាយុក្រោម១៥ឆ្នាំនៃសាលាបាល់ទាត់ជាតិបាទីបានលើកឡើងថា ការហ្វឹកហាត់នាពេលបច្ចុប្បន្ននេះ គឺផ្តោតសំខាន់សម្រាប់អនាគតរបស់យុវជនថ្នាល។
គ្រូបង្វឹកជនជាតិជប៉ុនរូបនេះគូសបញ្ជាក់ថា «យើងបានព្យាយាមពង្រឹងកីឡាករយុវជននូវបច្ចេកទេស តាកតិច និងភាពរឹងមាំនៃកាយសម្បទា។ រាល់ពេលហ្វឹកហាត់ យើងផ្តោតបន្ថែមលើចំណុចមួយចំនួនទៀត ដូចជា ការលើកទឹកចិត្ត និងការខិតខំប្រឹងប្រែងជាដើម។ អត្តចរិតរបស់យុវជនទាំងអស់នេះពិតជាល្អណាស់។ ពួកគេមិនទាន់បានចូលរួមប្រកួតណាមួយនៅឡើយទេ ហើយការហ្វឹកហាត់ ពេលបច្បុន្ននេះ គឺផ្តោតសំខាន់សម្រាប់អនាគតរបស់យុវជនថ្នាល មិនចំពោះតែការប្រកួតទេ យើងនឹងបង្ហាត់ពួកគេឱ្យក្លាយជាកីឡាករល្អនៅថ្ងៃអនាគត»។
លោក Kazunori Inoue បានបន្ថែមថា ការស្នាក់នៅហ្វឹកហាត់នៅសាលាបាល់ទាត់ជាតិបាទីនេះ គឺតែងតែថែរក្សាអនាម័យ និងការគោរពតាមវិធានការបង្ការជំងឺកូវីដ-១៩។ យើងគិតគូពីគ្នាជាពិសេស នៅទីនេះបានបិទការចេញចូលដោយគ្មានការអនុញ្ញាត រីឯកីឡាករមិនត្រូវបានអនុញ្ញាតឱ្យចេញក្រៅនោះទេ ដោយត្រូវនៅទីនេះ ដើម្បីរក្សាសុវត្ថិភាព។
លោក កែវ សារ៉េត អគ្គលេខាធិការ សហព័ន្ធកីឡាបាល់ទាត់កម្ពុជាបានលើកឡើងថា ការហ្វឹកហាត់នៅតែបន្តធ្វើជាប់ជាប្រចាំដោយមិនបានផ្អាកនោះទេ ដោយសារនៅសាលាកីឡាបាល់ទាត់ជាតិបាទីមានសុវត្ថិភាព និងមានការត្រួតពិនិត្យយ៉ាងត្រឹមត្រូវ សម្រាប់ការរស់នៅ និងហ្វឹកហាត់។ លោកបានបន្ដថា នេះជាកម្មវិធីហ្វឹកហាត់យូរអង្វែងចាប់ពី១៣-១៤ឆ្នាំឡើងទៅ ដោយសាលាបាល់ទាត់បាទីបណ្តុះបណ្តាលយុវជនចំនួនពីរកម្រិត គឺយុវជនអាយុក្រោម១៥ឆ្នាំ និងយុវជន អាក្រោម១៨ឆ្នាំ ដែលយុវជនទាំងនេះតែងតែចេញទៅប្រកបអាជីពបាល់ទាត់នៅតាមបណ្តាក្លិបនានាជារៀងរាល់ឆ្នាំ ហើយសហព័ន្ធតែងតែជ្រើសរើសយុវជនថ្មីៗចូលបណ្តុះបណ្តាលជារៀងរាល់ឆ្នាំផងដែរ៕