អតីតកីឡាការិនីប្រដាល់សកល នៅ ស្រីពៅ ដែលជាម្ចាស់មេដាយសំរឹទ្ធិស៊ីហ្គេម ២០១៩ នៅប្រទេសហ្វីលីពីនកំពុងបង្កើនការហ្វឹកហាត់លើប្រភេទកីឡាថ្មីសម្រាប់ខ្លួន គឺប្រភេទកីឡាឃីគ-បុកស៊ីង (Kick-Boxing) ដើម្បីសម្រេចឆន្ទៈចង់ប្រកួតប្រជែងមេដាយយកមកជូនជាតិ ពីព្រឹត្តិការណ៍កីឡាស៊ីហ្គេម លើកទី៣១ នៅប្រទេសវៀណាម ដែលគ្រោងធ្វើពីថ្ងៃទី២១ ខែវិច្ឆិកា ដល់ថ្ងៃទី០២ ខែធ្នូ ឆ្នាំ២០២១។
កីឡាការិនី នៅ ស្រីពី អះអាងថា ខ្លួនមានភាពស៊ាំនឹងទម្លាប់ល្អជាងមុន ក្រោយចំណាយពេលប្រមូលផ្ដុំហ្វឹកហាត់ជាមួយក្រុមជម្រើសជាតិឃីកបុកស៊ីងកម្ពុជា អស់រយៈពេលជាង៣ខែកន្លងមកនេះ។ កីឡាការិនីវ័យ២៥ឆ្នាំរូបនេះបានសម្រេចចិត្តផ្លាស់ប្ដូរអាជីពពីក្រុមកីឡាប្រដាល់សកលជម្រើសជាតិកម្ពុជាមកចាប់អាជីព និងចូលរួមប្រមូលផ្ដុំហ្វឹកហាត់ជាមួយក្រុមកីឡាឃីកបុកស៊ីងជម្រើសជាតិកម្ពុជាវិញ ក្នុងឆ្នាំ២០២១នេះ។
នៅ ស្រីពៅ បន្ថែមទៀតថា ក្រោយពីចូលប្រឡូកក្នុងប្រភេទកីឡាឃីកបុកស៊ីង នាងបានបោះជុំរុំហ្វឹកហាត់ជាមួយកីឡាករ-កីឡាការិនីផ្សេងៗទៀត ក្រោមការបង្វឹករបស់លោក ជា រិទ្ធ ដើម្បីសម្រួចទិសដៅ ត្រៀមប្រជែងមេដាយស៊ីហ្គេម ឆ្នាំ២០២១ នៅទីក្រុងហាណូយ នាខែវិច្ឆិកាខាងមុខ។ នាងនិយាយថា ដ្បិតកីឡាបីឃីកបុកស៊ីង ជាប្រភេទកីឡាថ្មី សម្រាប់រូបនាង ដែលទើបចាប់អាជីព ក៏ពិតមែន ប៉ុន្តែឆ្លងកាត់ការហ្វឹកហាត់មួយរយៈពេលមកនេះបានធ្វើឱ្យនាងមានទម្លាប់ល្អ និងស៊ីសង្វាក់ជាមួយនឹងប្រភេទកីឡាប្រយុទ្ធមួយនេះ ដោយមិនច្រឡំវ៉ៃក្បាច់គុនប្រដាល់ខ្មែរនោះឡើយ។
ម្ចាស់មេដាយសំរឹទ្ធ ស៊ីហ្គេម ២០១៩រូបនេះកំពុងសំងំហ្វឹកហាត់យ៉ាងខ្លាំង ដើម្បីឈានទៅសម្រេចក្ដីស្រម៉ៃរបស់ខ្លួន ក្នុងការប្រជែងមេដាយជូនជាតិពីស៊ីហ្គេម លើកទី៣១ នៅប្រទេសវៀតណាម ឆ្នាំ២០២១ ក៏ដូចជាការសម្រួចសមត្ថភាពត្រៀមឆ្ពោះទៅការប្រកួតស៊ីហ្គេម ឆ្នាំ២០២៣ នៅកម្ពុជាទៀតផង។ ស្រីពៅ បានចូលរួមប្រកួតកីឡាស៊ីហ្គេម កាលពីឆ្នាំ២០១៩ នៅហ្វីលីពីន ដោយដណ្តើមបានមេដាយសំរឹទ្ធ ក្រោយពីប្រកួតចាញ់ក្នុងវគ្គពាក់កណ្ដាលផ្ដាច់ព្រ័ត្រលើប្រភេទកីឡាប្រដាល់សកល ហើយឆ្នាំ២០២១ នាងបានផ្លាស់ប្តូរមកចាប់អាជីពកីឡាឃីកបុកស៊ីង ដើម្បីត្រៀមការប្រកួតកីឡាស៊ីហ្គេមចុងឆ្នាំនេះ។
បើតាមម្ចាស់ផ្ទះ ស៊ីហ្គេម វៀតណាម បានកំណត់បង្ហាញប្រភេទកីឡាឃីគបុកស៊ីងនេះមាន១២វិញ្ញាសា ក្នុងនោះផ្នែកបុរសមាន៦ប្រភេទទម្ងន់ចាប់ពី៥៤គីឡូក្រាមដល់៦៧គីឡូក្រាម និងនារី៦ប្រភេទទម្ងន់ចាប់ពី៤៨គីឡូក្រាមដល់៥៧គីឡូក្រាម៕