ការប្រកួតនៅជើងទី ២ វគ្គពាក់កណ្ដាលផ្ដាច់ព្រ័ត្រ Champions League នឹងឈានចូលមកដល់នៅពាក់កណ្តាលសប្តាហ៍នេះ ដោយវេលាម៉ោង ០២:០០ រំលងអាធ្រាត្រឈានចូលថ្ងៃពុធ ក្រុម Man City នឹងត្រូវបើកកីឡដ្ឋានស្វាគមន៍ក្រុម PSG ហើយរំលងទៅថ្ងៃស្អែកក្រុម Chelsea ត្រូវប៉ះ Real Madrid នៅឯកីឡដ្ឋាន Stamford Bridge។
បើយើងមើលទៅ ២ គូនេះ យើងឃើញថា PSG អាចនឹងមានហានិភ័យខ្ពស់ ព្រោះនៅជើងទី ១ ពួកគេបានរងបរាជ័យក្រោមលទ្ធផល ២-១ ហើយចាញ់នៅទឹកដីខ្លួនឯងទៀត។ យ៉ាងណានៅអត្ថបទនេះ យើងចុះផ្សាយជាពិសេសសម្រាប់អ្នកគាំទ្រក្លឹបយក្សបារាំង ដោយទៅរំឭកពីអតីតកាល ៦ លើក ជុំវិញក្រុមដែលបានចាញ់នៅជើងទី ១ តែអាចវាយបកយកឈ្នះនៅជើងទី ២ វគ្គពាក់កណ្ដាលផ្ដាច់ព្រ័ត្រ និងឆក់យកបានកៅអីនៅវគ្គផ្ដាច់ព្រ័ត្រ ធ្វើឲ្យពិភពបាល់ទាត់មានការភ្ញាក់ផ្អើលជាខ្លាំង៖
៦) Ajax ទល់ក្រុម Panathinaikos
នៅរដូវកាល ១៩៩៥/៩៦ កាលពីជើងទី ១ ក្នុងទឹកដីហូឡង់ ក្រុមម្ចាស់ផ្ទះ Ajax បានចាញ់ក្រុមនៅប្រទេសក្រិចគឺ Panathinaikos ដោយលទ្ធផល ១-០។
លុះមកដល់ជើងទី ២ នៅឯប្រទេសក្រិច ស្រាប់តែ Ajax សម្ញែងសាច់ដុំបង្កើតលទ្ធផលមិនគួរឲ្យជឿ យកឈ្នះ ៣-០ វិញ ហើយអាចទទួលបានឱកាសឡើងទៅវគ្គផ្ដាច់ព្រ័ត្រ។ ប៉ុន្តែសោកស្តាយ សម្រាប់ការខិតខំរបស់ Ajax ពុំទទួលនូវលទ្ធផលដែលពួកគេចង់បាននោះទេ ដោយនៅវគ្គចុងក្រោយបានចាញ់ Juventus នៅបាល់ថែមម៉ោងប៉េណាល់ទីក្រោមលទ្ធផល ៤-២។
៥) Juventus ទល់ក្រុម Real Madrid
ជាការប្រកួតដ៏ស្វិតស្វាញដោយនៅជើងទី ១ ក្នុងទឹកដីអេស្ប៉ាញរបស់ Real Madrid ក្រុមសេះបង្កង់ Juventus បានចាញ់ ២-១ ដូចដែល PSG ចាញ់ Man City កាលពីសប្តាហ៍មុនអ៊ីចឹង។
ប៉ុន្តែចូលមកដល់ជើងទី ២ ពួកគេ Comeback បានយ៉ាងល្អ ដោយយកឈ្នះ ៣-១ នាំឲ្យលទ្ធផលសរុបទាំងពីរជើង Juventus យកឈ្នះ Real Madrid ៤-៣។ យ៉ាងណាវាសនារបស់ Juventus នៅរដូវកាលឆ្នាំ ២០០៣ គឺដូចទៅនឹង Ajax ដែរ នោះគឺចាញ់នៅវគ្គផ្ដាច់ព្រ័ត្រដោយសារបាល់ប៉េណាល់ទី ក្រោមលទ្ធផល ៣-២ ហើយ AC Milan ជាក្រុមឈ្នះជើងឯក។
៤) AC Milan ទល់ Man Utd
ត្រលប់ទៅរដូវកាល ២០០៦/០៧ នៅជើងទី ១ រវាង AC Milan និង Man Utd បានបញ្ចប់ទៅក្រោមលទ្ធផល ២-៣ នៅឯទឹកដីអង់គ្លេស លុះឆ្លងមកដល់ជើងទី ២ ខាងក្រុមអ៊ីតាលីបានវាយបកយកឈ្នះយ៉ាងចាស់ដៃ ដោយលទ្ធផល ៣-០ វិញ នាំឲ្យលទ្ធផលសរុបទាំងពីរជើងគឺ Milan ឈ្នះ ៥-៣។
ការពុះពាររបស់ AC Milan ក៏ទទួលបានលទ្ធផលជាទីគាប់ចិត្តត្រលប់មកវិញនៅវគ្គផ្តាច់ព្រ័ត្រ បន្ទាប់ពីយកឈ្នះ Liverpool ២-១។
៣) Liverpool ទល់ Chelsea
នៅរដូវកាល ២០០៦/០៧ ដដែលនេះ Liverpool ក៏ទទួលបានលទ្ធផលបរាជ័យនៅជើងទី ១ ដូចគ្នា ដោយពួកគេចាញ់ Chelsea នៅទឹកដី Stamford Bridge ១-០ តែមកដល់ជើងទី ២ នៅ Anfield ខាងLiverpool ក៏យកឈ្នះ ១-០ វិញ។
លទ្ធផលនេះនាំឲ្យការប្រកួតត្រូវបន្ថែមម៉ោង ១៥ នាទីពីរដង ហើយបន្តរហូតដល់ការស៊ុតប៉េណាល់ទី ដែល Liverpool ធ្វើបានយ៉ាងល្អ ដោយយកឈ្នះ ៤-១ ទៅលើ Chelsea។ ប៉ុន្តែសោកស្តាយនៅវគ្គផ្តាច់ព្រ័ត្រ ពួកគេបានត្រឹមក្លាយជាក្រុមជើងឯករង ក្រោយចាញ់ AC Milan។
២) Tottenham ទល់ Ajax
ត្រលប់ទៅឆ្នាំ ២០១៩ នៅ Champions League ជឿថាអ្នកគាំទ្រប្រាកដជាមិនភ្លេចនោះទេ នូវរឿងរ៉ាវអាភិនិហាជាច្រើនដែលបានកើតឡើង។
ក៏មានលទ្ធផលរបស់ Spurs ទល់ Ajax មួយដែរ ដោយនៅជើងទី ១ ខាងក្រុមអង់គ្លេស Tottenham ចាញ់ក្នុងដី ១-០ លុះដល់ជើងទី ២ Spurs បានយកឈ្នះ ៣-២ នៅទឹកដីហូឡង់វិញ។ សរុបគ្រាប់បាល់ទាំងពីរជើង យើងឃើញថាស្មើ ៣-៣ ប៉ុន្តែគ្រាប់បាល់ក្រៅដីគឺ Spurs មានដល់ទៅ ៣ គ្រាប់ច្រើនជាង Ajax មានត្រឹមតែ ១ គ្រាប់។
១) Liverpool ទល់ Barcelona
ជោគជ័យដែល Liverpool ធ្វើបានកាលពីរដូវកាល ២០១៨/១៩ កាន់តែធ្វើឲ្យក្រុមជាច្រើន ជឿជាក់ថា ក្តីសង្ឃឹម ១ ភាគរយដែលសេសសល់ នៅតែអាចកើតមាន ហើយក៏ជាគ្រោះក្នុងលាភ ប្រសិនណាពួកគេនៅតែបន្តខិតខំ។
កាលនោះនៅទឹកដី Camp Nou ក្រុមហង្សក្រហមបានរងបរាជ័យ ៣-០ លុះចូលមកដល់ជើងទី ២ នៅ Anfield ទីលានមរណៈមួយនេះ បានជួយឲ្យ Liverpool លុត Barcelona ៤-០ នាំឲ្យលទ្ធផលទាំងពីរជើងសមល្មមអាចជួយឲ្យហង្សឆ្ពោះទៅវគ្គផ្តាច់ព្រ័ត្រ។ នៅវគ្គចុងក្រោយ UCL ក្រុមដឹកនាំដោយលោក Jurgen Klopp ក៏បន្តទទួលជ័យជម្នះដែរ ដោយបានយកឈ្នះ Spurs ២-០ លើកពានអឺរ៉ុបជាលើកដំបូង បន្ទាប់ពីខកខានអស់រយៈពេល ១៤ ឆ្នាំ៕