កាលពីយប់ថ្ងៃអាទិត្យកន្លងទៅនេះ បានកើតមានរឿងរ៉ាវគួរឲ្យចាប់អារម្មណ៍ជាច្រើនក្នុងវិស័យបាល់ទាត់ ដោយមានទាំងរឿងគួរឲ្យសាទរ និងរឿងវឹកវរដែលធ្វើឲ្យគ្រប់គ្នានឹកស្មានមិនដល់។
និយាយពីលីគធំៗទាំង ១០ នៅតំបន់អឺរ៉ុប យើងឃើញថាមានលីគចំនួន ២ ហើយដែលរកឃើញក្រុមឈ្នះជើងឯក ក្នុងនោះមានលីគហូឡង់ Eredivisie និងលីគអ៊ីតាលី Serie A។ ស្របពេលដែលលីគអង់គ្លេស Premier League ក៏ប៊ិះតែនឹងឃើញលទ្ធផលនៅយប់មិញដែរ ប្រសិនក្រុម Man Utd ទទួលរងបរាជ័យនៅជំនួបទល់ Liverpool ប៉ុន្តែមិនទាន់ប្រកួតផង ក៏ស្រាប់តែមានភាពវឹកវរពីអ្នកគាំទ្រកើតឡើង ហើយនាំឲ្យសម្រេចផ្អាកការប្រកួតមុនរយៈពេលជាង ១ ម៉ោង។
ខាងក្រោមយើងបង្ហាញពីក្រុម ដែលបានក្លាយជាក្រុមឈ្នះជើងឯកចំនួន ២ នៅយប់មិញ និងបង្ហាញត្រួសៗពីស្ថានភាពនៅ Premier League៖
៣) លីគកំពូលអ៊ីតាលី Serie A
ត្រឹមជុំទី ៣៤ នៅលីគ Serie A ក៏រកឃើញក្រុមឈ្នះជើងឯក ដោយបានទៅលើក្រុម Inter Milan។ លទ្ធផលនេះកើតឡើងបន្ទាប់ពីក្រុមដឹកនាំដោយលោក Antonio Conte យកឈ្នះ ២-០ ទៅលើ Crotone កាលពីថ្ងៃសោរ៍ ហើយនៅយប់ថ្ងៃអាទិត្យក្រុមតាមប្រកៀកពិន្ទុ Atalanta បានត្រឹមស្មើទល់ក្រុម Sassuolo។
នាំឲ្យលំដាប់ពិន្ទុរបស់ Inter Milan មានដល់ ៨២ ពិន្ទុ វ៉ាដាច់ ១៣ ពិន្ទុធៀបនឹងក្រុមឈរលេខ ២ គឺ Atalanta ដែលមាន ៦៩ ពិន្ទុ។ ស្របពេលដែលការប្រកួតសល់តែ ៤ ជុំទៀត បែបនេះក៏សមល្មមសម្រេចឲ្យ Inter ក្លាយជាក្រុមឈ្នះជើងឯកត្រឹមជុំទី ៣៤ នេះតែម្ដង។
បញ្ជាក់ដែរថា Inter Milan ខកខានឈ្នះពានរង្វាន់លីគកំពូលអ៊ីតាលីរយៈពេល ១១ ឆ្នាំមកហើយ ដោយលើកចុងក្រោយសម្រាប់ពួកគេគឺនៅឆ្នាំ ២០១០។ ក្រោយៗមក AC Milan ឈ្នះបាន ១ លើក ហើយ Juventus ម៉ៅដាច់ ៩ ឆ្នាំជាប់ៗគ្នា។
២) លីគកំពូលហូឡង់ Eredivisie
នៅការប្រកួតបាល់ទាត់លីគកំពូលហូឡង់ នឹងត្រូវបញ្ចប់នៅជុំទី ៣៤ ហើយមកទល់ជុំទី ៣១ កាលពីយប់មិញ គឺបានរកឃើញក្រុមឈ្នះជើងឯកហើយ។
រដូវកាល ២០២០/២១ ពានរង្វាន់ Eredivise នៅតែបន្តធ្លាក់ទៅដល់ដៃក្រុម Ajax ដែលមាន ៧៩ ពិន្ទុនាំមុខ ១៤ ពិន្ទុធៀបនឹងក្រុម PSV ដែលឈរលេខ ២។ ប្រកួតកាលពីម្សិលមិញដែលសមល្មមនឹងសម្រេចឲ្យ Ajax ក្លាយជាក្រុមឈ្នះជើងឯកបាននោះ គឺជ័យជម្នះ ៤-០ ទៅលើ FC Emmen។
បញ្ជាក់ថានេះជាពានរង្វាន់ Eredivisie លើកទី ៣៥ ហើយសម្រាប់ Ajax ហើយកាលពីរដូវកាលមុនពួកគេបានឈ្នះត្រឹមជុំទី ២៥ បន្ទាប់ពីសហព័ន្ធបាល់ទាត់ហូឡង់ប្រកាសបញ្ចប់រដូវកាលមុនកាលកំណត់ ក្រោយផ្ទុះជំងឺរាតត្បាត COVID-19។
១) លីគកំពូលអង់គ្លេស Premier League
និយាយពីលីគកំពូលទាំង ៥ ប្រចាំតំបន់អឺរ៉ុប បើដក Serie A គឺមានតែ Premier League មួយទៀតប៉ុណ្ណោះ ដែលក្រុមឈរកំពូលតារាងមានគម្លាតពិន្ទុដាច់ឆ្ងាយធៀបនឹងក្រុមឈរលេខ ២។
យ៉ាងណាកាលពីយប់មិញ Man City ក៏អាចរង់ចាំអុតមើលឱកាសក្លាយជាក្រុមឈ្នះជើងឯករបស់ខ្លួនផងដែរ ប្រសិនណាការប្រកួតរវាង Man Utd និង Liverpool អាចដំណើរការបាន។ នោះគឺប្រសិនណា Man Utd ទទួលរងបរាជ័យ វានឹងទាញឲ្យគម្លាតពិន្ទុរវាង City/United មានដល់ ១៣ ពិន្ទុនៅជុំទី ៣៤ បែបនេះសល់ ៤ ជុំចុងក្រោយ បើទោះបី City ជិះសេះព្រលែងដៃមិនយកបានសូម្បី ១ ពិន្ទុ ក៏ពួកគេនៅតែឈ្នះពានដោយស្វ័យប្រវត្តិដែរ។
ការផ្អាកដំណើរការប្រកួតនៅកីឡដ្ឋាន Old Trafford កាលពីយប់មិញ ក៏ដោយសារផ្ទុះការតវ៉ា និងការសម្រុកចូលកីឡដ្ឋានពីសំណាក់អ្នកគាំទ្រ ក្រោមហេតុផលចង់ឲ្យត្រកូល Glazer ដែលជាម្ចាស់ក្លឹប Manchester United លក់ភាគហ៊ុនធំរបស់ខ្លួន ហើយចុះចេញពីតំណែង។ ការប្រកួតដ៏សំខាន់នេះក៏មិនច្បាស់ថានឹងលើកទៅថ្ងៃណានោះដែរ តែគេជឿថា នឹងមិនលេងនៅពាក់កណ្តាលសប្តាហ៍ឡើយ ហើយស៊ូលើកប្រកួតផ្សេងមកលេងនៅពាក់កណ្តាលសប្តាហ៍ ដើម្បីប៉ះប៉ូវឲ្យក្រុមទាំងពីរអាចតតាំងគ្នានៅចុងសប្តាហ៍នេះជំនួសវិញ៕