Luis Suarez កាលពីអតីតកាលធ្លាប់ជាដៃគូបញ្ចប់ទីរួមគ្នានៅក្លឹប Barcelona ជាមួយនឹង Lionel Messi តែនៅឆ្នាំ ២០២០ គេបានផ្ទេរចេញ និងមកចូលរួមជាមួយក្លឹប Atletico Madrid វិញ។
យ៉ាងណាទំនាក់ទំនងរវាងកីឡាករអាហ្សង់ទីន-អ៊ុយរុយហ្គាយនៅតែត្រូវបានគេទទួលស្គាល់ ថាបន្តមានភាពល្អជាមួយគ្នាដដែល ហើយលេចលឺថាពេលវេលាចុងក្រោយមុនបញ្ចប់អាជីពជាកីឡាករ ពួកគេចង់រួមក្លឹបជាមួយគ្នានៅទឹកដីសហរដ្ឋអាមេរិកទៀតផង។
ថ្មីៗនេះ Suarez បានប្រាប់ Daily Mirror អំពីឈ្មោះក្លឹបដែល Messi គួរតែឈរជើងនៅរដូវកាលក្រោយ ហើយគេជឿថា Barcelona នៅតែសក្តិសមបំផុតសម្រាប់ខ្សែប្រយុទ្ធវ័យ ៣៣ ឆ្នាំ។
Suarez និយាយ៖ “កន្លែងដែលគាត់អាចបញ្ចប់អាជីព គឺជាកន្លែងដែលគាត់អាចរីករាយបំផុត ហើយបើសួរខ្ញុំក្នុងនាមជាមិត្តភ័ក្ដិម្នាក់ ខ្ញុំនៅតែឆ្លើយថាគ្មានទីណាល្អជាង Barcelona នោះទេសម្រាប់គាត់ តែវាក៏ស៊ីសងលើគាត់ផ្ទាល់ជាអ្នកសម្រេចចិត្តដែរ ដោយ Barcelona ជាក្រុមដែលអាចផ្តល់គ្រប់យ៉ាងឲ្យគាត់ ហើយគាត់ក៏បានផ្តល់នូវរឿងជាច្រើនទៅកាន់ក្លឹបដូចគ្នា”៕
ប្រភព៖ Caughtoffside