អ្នកចាត់ការលោក Jose Mourinho បានបាត់បង់តំណែងជាមួយក្លឹប Spurs កាលពីថ្ងៃទី ១៩ មេសា ឆ្នាំ ២០២១ ក្រោយពីចាយពេលដឹកនាំនៅទីនោះបាន ៨៦ ប្រកួត។
មកទល់ពេលនេះមិនទាន់មានដំណឹងផ្លូវការណាមួយបង្ហើបនៅឡើយថា តើបុរសរហស្សនាម “Special One” នឹងបន្តទៅបម្រើអាជីពជាគ្រូបង្វឹកនៅក្លឹបណាបន្ទាប់ទៀត?
យ៉ាងណាបើតាមរបាយការណ៍ចុងក្រោយពី Duncan Castles បានចុះផ្សាយថាមានក្លឹបចំនួន ៣ ហើយដែលកំពុងចាប់អារម្មណ៍ និងបានទាក់ទងទៅលោក Mourinho ក្នុងនោះរួមមានក្លឹប Celtic នៅលីគស្កុតឡែន ក្លឹប AS Roma នៅលីគអ៊ីតាលី និង Valencia នៅក្លឹបអេស្ប៉ាញ។
គេមិនច្បាស់នោះទេថាសាមីខ្លួននឹងសម្រេចជ្រើសយកក្លឹបណាមួយ តែបើតាមដឹងប្រសិន Mourinho ចង់រង់ចាំការដឹកនាំក្លឹបធំ គឺមិនអាចនោះទេនៅស្ថានភាពបច្ចុប្បន្ននេះ ព្រោះក្លឹបទាំងអស់សុទ្ធតែមានគ្រូបង្វឹករៀងខ្លួន ហើយក៏មិនឃើញជួបបញ្ហាអ្វីទៀត។ បើថា Bayern Munich ពួកគេក៏ទំនេរតំណែងអ្នកចាត់ការបានប៉ុន្មានសប្តាហ៍ក្រោយ Flick ប្រកាសគ្រោងចាកចេញ តែឥឡូវក៏បានបំពេញដោយការដាក់ Julian Nagelsmann ចូលទៅហើយ៕
ប្រភព៖ SoccerLaduma