ក្រុមកីឡាបាល់ទាត់ជម្រើសជាតិកម្ពុជានឹងអាចបោះជំរុំហ្វឹកហាត់នៅក្រៅប្រទេស ឬនៅកន្លែងមានសុវត្ថិភាព ណាមួយ ដើម្បីត្រៀមការប្រកួតជាមួយម្ចាស់ផ្ទះ ក្រុមជម្រើសជាតិ បារ៉ែន នាថ្ងៃទី០៣ ខែមិថុនា ឆ្នាំ២០២១ ដែលជាប្រកួតទី៦ (បង្គ្រប់កិច្ច) នៃវគ្គជម្រុះជុំទី២ ក្នុងពូល C នៃពានរង្វាន់ បាល់ទាត់ពិភពលោក នៅប្រទេសកាតា ឆ្នាំ២០២២ (FIFA World Cup Qatar 2022) ដែលពេលវេលានៃការប្រមូលផ្តុំហ្វឹកហាត់របស់ក្រុមរហ័សនាមគោព្រៃ កម្ពុជាកាន់តែ ខើចទៅៗ ខណៈស្ថានភាពវិបត្តិជំងឺកូវីដ-១៩នៅតែបន្តគំរាមកំហែង។
លោក កែវ សារ៉េត អគ្គលេខាធិការ សហព័ន្ធកីឡាបាល់ទាត់កម្ពុជាមានប្រសាសន៍ថា ក្រុមការងារក្រុមជម្រើសជាតិកម្ពុជា ដែលបានជួបប្រជុំតាមប្រព័ន្ធអនឡាញជាមួយ លោក Keisuke Honda អ្នកចាត់ការទូទៅក្រុមជម្រើសជាតិកម្ពុជា កាលពីសប្តាហ៍ មុនថ្មីៗ នេះ គឺគ្រាន់តែពួកគាត់បានលើកឡើងពីបញ្ហាប្រឈមនឹងជំងឺកូវីដ-១៩ ស្របពេលដែល ការប្រកួតលីគកំពូលកម្ពុជាត្រូវផ្អាកទាំងស្រុងជាបណ្តោះអាសន្ន ហើយក្រុមកីឡាករ ជម្រើសជាតិក៏មិនទាន់អាចធ្វើការប្រមូលផ្តុំបាននៅឡើយដែរ ដោយត្រូវរង់ចាំមើល ស្ថានភាពជាក់ស្តែងបន្តិចទៀតសិន។ លោកបានបន្ដថា តាមការគ្រោងទុកក្រុមជម្រើស ជាតិកម្ពុជានឹងត្រូវចេញដំណើរនាថ្ងៃទី២៨ ខែឧសភា ឆ្នាំ២០២១ ដើម្បីទៅប្រកួតជាមួយ ម្ចាស់ផ្ទះ ក្រុមជម្រើសជាតិបារ៉ែន នាថ្ងៃខែមិថុនា ឆ្នាំ២០២១ វគ្គជម្រុះជុំទី២ ក្នុងពូល C ព្រឹត្តិការណ៍បាល់ទាត់ពិភពលោក (FIFA World Cup Qatar 2022)។
លោកអគ្គលេខាធិការបន្ថែមថា តាមពិតគោលបំណងរបស់យើងចង់ឱ្យក្រុមជម្រើសជាតិកម្ពុជាបោះជំរុំហ្វឹកហាត់នៅក្រៅប្រទេស ឬនៅកន្លែងណាមួយ ដែលស្ងប់ស្ងាត់និងសុវត្ថិភាពល្អ ដើម្បីត្រៀមការប្រកួតជម្រុះនេះឲ្យបានល្អប្រសើរ ព្រោះក្រុមដែល ត្រូវជួប៣ប្រកួតចុងក្រោយ (បង្រ្គប់កិច្ច) សុទ្ធតែជាក្រុមជម្រើសជាតិខ្លាំងៗក្នុងទ្វីបអាស៊ី។ សម្រាប់ការប្រមូលផ្តុំហ្វឹកហាត់នៅសល់ពេលប្រហែល១ខែ ហើយការសម្រេចយ៉ាងណា នោះលោកនឹងជម្រាបជូននៅពេលក្រោយដោយរង់ចាំមើលស្ថានភាព បញ្ហាជំងឺកូវីដ-១៩ សិន។
សម្រាប់វគ្គជម្រុះជុំទី២ នៃព្រឹត្តិការណ៍ FIFA WORLD CUP Qatar 2022 នេះ គឺកម្ពុជានៅសល់៣ប្រកួតចុងក្រោយគឺជួបប្រកួតជាមួយម្ចាស់ផ្ទះបារ៉ែន នាថ្ងៃទី០៣ ខេមិថុនា, ជួបជាមួយម្ចាស់ផ្ទះ អ៊ីរ៉ាក់ នាថ្ងៃទី០៧ ខែមិថុនា និងទទួលធ្វើម្ចាស់ផ្ទះ១ប្រកួតចុងក្រោយ ជាមួយក្រុមភ្ញៀវ អ៊ីរ៉ង់ នាថ្ងៃទី១១ ខែមិថុនា ឆ្នាំ២០២១។ កាលពីជើងទី១ ក្រុមម្ចាស់ផ្ទះ កម្ពុជាបានប្រកួតចាញ់ក្រុមភ្ញៀវបារ៉ែន ដោយលទ្ធផល ០ទល់១ កាលពីថ្ងៃទី១០ ខែកញ្ញា ឆ្នាំ២០១៩។
ក្នុងពូលCនេះ មាន៥ក្រុម គឺកម្ពុជា, បារ៉ែន, ហុងកុង, អ៊ីរ៉ាក់ និងអ៊ីរ៉ង់ ឆ្លងកាត់៥ប្រកួត កន្លងមកមិនធ្លាប់ឈ្នះ ស្មើ១ជាមួយក្រុមហុងកុង ១-១ និងចាញ់៤ប្រកួត។ ប្រវត្តិ១ប្រកួត ដែលកម្ពុជារបូតគ្រាប់បាល់ច្រើនជាងគេ គឺចាញ់ម្ចាស់ផ្ទះ អ៊ីរ៉ង់ រហូតដល់ ១៤ទល់០ កាលពីថ្ងៃទី១០ ខែតុលា ឆ្នាំ២០១៩។
សូមបញ្ជាក់ថា បច្ចុប្បន្ន ក្រុមជម្រើសជាតិកម្ពុជាមិនទាន់ប្រកាសបញ្ជីសមាសភាពកីឡាករជាផ្លូវការនៅឡើយទេ ប៉ុន្តែក្រុមកម្ពុជាស្ថិតក្រោមការដឹកនាំពីអ្នកចាត់ការទូទៅ និងគ្រូបង្គោលជាជនជាតិជប៉ុនដូចគ្នា គឺលោក RYU HIROSE និងលោក Keisuke Honda ដោយលោកនឹងបន្តដឹកនាំក្រុមគោព្រៃកម្ពុជាឆ្ពោះទៅរៀបចំធ្វើជាម្ចាស់ផ្ទះ ការប្រកួត កីឡា ថ្នាក់តំបន់ដ៏ធំប្រចាំអាស៊ីអាគ្នេយ៍ គឺ ស៊ីហ្គេម លើកទី៣២ ឆ្នាំ២០២៣ផងដែរ៕